योहान 20

येसु मरन मयथीन जीवता उठय

(मतय २८:१-८; मार्क १६:१-८; लुक २४:१-१२)

¹ मंग आठोडाना पईला दीवस पाहाटला, जवं आधांराज व्हताल, तवं मगदला गावनी मरीया येसुनी कबरपन वनी. आनं ती दखनी का, कबरना तोंडा वतली मोठी दगड कोनीतरी सरकाई देयेल सय. ² मंग शीमोन पेत्र आनं येसुना दुसरा चेला जेवर येसु जास्त मया करता, तेसनी कडं ती पळत गयी. आनं तेसला सांगनी, परभु येसुना शरीरला ते कबर मयथीन काडी ली जायेल सत. आनं तेला कई ठेयेल सत, ता आमला मायती ना सय.

³ मंग पेत्र आनं तो दुसरा चेला दखानी करता कबर कडं नींगनत. ⁴ आनं ते दोनी जन पळी पळीसनं गयत. आनं तो दुसरा चेला पेत्रला मांगं टाकीसनं तेनी आगुदार कबरपन जाई लागना. ⁵ आनं तो ढोंगा पडीसनं मजार दखाना, पन मजार गया ना. तवं तो दखना का, मजार फक्‍त तागानं कपडं पडेल सत. ⁶ मंग शीमोन पेत्र बी तेनी मांगं मांगं वना आनं लगेज कबरनी मजार घुसी गया. ⁷ आनं तो बी दखना का, ते तागानं कपडं तईज पडेल सत. आनं जो रुमाल येसुना डोकाला बांधेल व्हताल, तो तागानं कपडंसनी संगं ना सय. पन आलंग दुसरी जागामं गुंडाळीसनं पडेल सय. ⁸ तवं तो दुसरा चेला जो पईलं कबरपन जाई लागेल व्हताल, तो बी कबरनी मजार जाईसनं दखना. मंग तो बी वीस्वास ठेवना का, खरज येसु मरन मयथीन जीवता उठेल सय. ⁹ आनं देवना वचनमं जा लीखेल सय, तेला तो परन ते समजु शकनंलत ना. तो वचन आशा सय का, तो मरन मयथीन जीवता उठालाज पायजे.

¹⁰ मंग ते दोनी चेलं यरुशलेम शेहेरमं तेसनी घर परत नींगी गयत.

मगदला गावनी मरीया येसुला दखय

(मतय २८:९-१०; मार्क १६:९-११)

¹¹ मंग मरीया बाई कबरपन परत वनी आनं बाहेर हुबी रहीसनं रडी रहनील. आनं रडी रडीसनं ती ढोंगी पडीसनं कबरनी मजार दखनी. ¹² तवं ती दखनी का, देवनं दोन दुतं धवळंचप कपडं घालीसनं तई व्हतलत. आनं जई येसुना शरीरला ठेयेल व्हताल, तई ते बसेल व्हतलत. आनं तेस मयथीन येक जन जई येसुना डोका व्हताल तई बसेल व्हताल आनं दुसरा जन जई येसुना पाय व्हतलत तई तो बसेल व्हताल.

¹³ मंग ते दुतं तीला वीचारनत, बाई, तु कजं रडी रहनी सय? मंग ती सांगनी, ते मना परभुना शरीरला कईतरी ली गयं सत. आनं ते तेला कई ठेवनं सत, हाई माला मायती ना सय. ¹⁴ आशा सांगीसनं ती मांगं फीरी दखनी. तवं ती येसुला तई हुबा रहेल दखनी. पन तो येसु सय मनीसनं ती वळखु शकनी ना. ¹⁵ मंग येसु तीला वीचारना, बाई, कजं तु रडी रहनी सय? आनं तु कोनला दखी रहनी सय? मंग तीला वाटना का, तो बागना माळी व्हई. तेमन ती तेला सांगनी, भाऊ, जर तु मना परभुना शरीरला कईतरी ली जायेल व्हई तं, माला सांगी दे का, तु तेला कई ठेवना सय. मंग मी जाईसनं तेला ली जासु आनं चांगला रीतथीन कबरमं ठेवसु.

¹⁶ मंग येसु तीला सांगना, मरीया. तवं लगेज ती येसुला वळखी लीनी आनं तीनी कडं फीरीसनं ईब्री भाशामं जोरमं सांगनी, रब्बुनी. येना आर्थ गुरुजी सय. ¹⁷ तवं येसु तीला सांगना, मरीया, माला बीलगीसनं रहु नोको. कजं का आतं परन मी मना देवबाप कडं परत गया ना सय. पन तु जाईसनं मना भाऊसंसला सांग का, जो मना देवबाप सय आनं तुमना बी देवबाप सय, तेपन मी परत जाई रहना सय.

¹⁸ मंग मगदला गावनी मरीया येसुनं चेलंस कडं गयी आनं सांगनी का, मी परभुला दखनी सय. मंग जा काही येसु तीला सांगेल व्हताल, ता आखं ती तेसला सांगनी.

येसुनं चेलं तेला दखत

(मतय २८:१६-२०; मार्क १६:१४-१८; लुक २४:३६-४९)

¹⁹ मंग आठोडाना पईला दीवसना संध्याकाळला येसुनं चेलं येक खोलीमं व्हतलत. आनं ते यहुदीसना पुढारी लोकंसला भीवाय रनलत. तेमन ते खोलीना दार बंद करीसनं मजार व्हतलत. तवं लगेज येसु तेसना मजार प्रगट व्हयना आनं तेसला सलाम सांगानी करता सांगना, तुमला शांती भेटाला पायजे. ²⁰ आशा सांगीसनं येसु सोताना हात आनं कुखी तेसला दखाडना. तवं परभुला दखीसनं चेलंसला पक्‍का आनंद वाटना.

²¹ आखु येसु तेसला सलाम सांगानी करता सांगना, तुमना जीवनमं शांती रव्हाला पायजे. आनं जशा मना देवबाप तेना काम करानी करता माला हाई जगमं धाडेल व्हताल, तशाज मी बी तुमला आतं तेना साठीज धाडी रहना सय. ²² आशा सांगीसनं तो तेसवर तेना सुवास सोडना. आनं तेसला सांगना, तुमं पवीत्र आत्माला तुमना जीवनमं स्वीकार करा. ²³ येनी करता का जे लोकंसला तुमं सांगशात का, तुमना पापनी माफी व्हई गयी सय, तेसला देव बी माफी देई. पन जे लोकंसला तुमं तशा सांगावुत ना, तेसला देव बी माफी देवावु ना.

थोमा येसुला दखय

²⁴ मंग बारा चेलंस मयथीन थोमा नावना येक चेला व्हताल. तेला ते दीदुम बी सांगतत. मंग जवं येसु तेनं चेलंसनी मजार प्रगट व्हयनाल, तवं तो तई ना व्हताल. ²⁵ तेमन दुसरं चेलं तेला सांगनत, आमं परभुला दखनं सत. पन थोमा तेसला सांगना, जो परन येसुना हातमं खीळा ठोकेल नीशानीला मी दखावु ना आनं तेना हातना आनं कुखीना जखममं मना हाथ लाईसनं दखावु ना, तो परन मी तुमनी गोस्टंवर वीस्वास ठेवावुज ना.

²⁶ मंग येक आठोडानी नंतर येसुनं चेलं आखु ती खोलीमं बसेल व्हतलत. तवं थोमा बी तई बसेल व्हताल. ती खोलीना दार बंद व्हताल. तरी बी येसु लगेज ती खोलीमं ईसनं प्रगट व्हयना. आनं तेसला सलाम सांगानी करता तो सांगना, तुमना जीवनमं शांती रव्हाला पायजे. ²⁷ आनं तो थोमाला सांगना, तुना बोट लाईसनं मना खीळा ठोकेल हातला दख. आनं मना कुखीना घावला तुना हात लाईसनं दख. आनं तु शंका सोडीसनं मी परत जीवता व्हयना सय मनीसनं वीस्वास ठेव. ²⁸ मंग थोमा वीस्वास करीसनं सांगना, तुज मना परभु आनं तुज मना देव सय. ²⁹ मंग येसु तेला सांगना, तु मला दखीसनं मावर वीस्वास ठेवना, पन जे लोकं माला बीगर दखीसनं बी मावर वीस्वास ठेवत ते धन्य सत.

³⁰ जवं येसु हाई जगमं व्हताल, तवं तेनं चेलंसनी समोर आजुन बरज चमत्कार तो करना. पन ते आखं चमत्कारंसनी बद्दल हाई पुस्तकमं लीखेल ना सय. ³¹ पन हाई पुस्तकमं जा काही बी लीखेल सय, ते आखं येनी करता लीखेल सय का, येसुज देवना पोर्‍या आनं तेना धाडेल राजा सय, हाई तुमं वीस्वास ठेवाला पायजे. आनं तुमं आशा वीस्वास ठेवनत तं, तुमला तेना नावमं कायमना जीवन भेटी जाई.