19
1 मंग येसुला ली जाईसनं काकडाघाई हानाला पीलात तेनं सीपाईसला आज्ञा दीना. 2 आनं सीपाई लोकं काटासना येक मुगुट गुफीसनं येसुना डोकावर घालनत. आनं तेला जामळा रंगना कपडं घालनत. 3 मंग घडीघडी ते तेना जवळ ईसनं तेला थापड मारनत आनं तेनी थट्टा करीसनं सांगनत, हे यहुदी लोकंसना राजा, तुनी जय हो.
4 आखु येकदाव पीलात बाहेर वना आनं यहुदी लोकंसला सांगना, तो मानुसला दंड देवानी करता माला आजुन काही दोस सापडना ना. हाई तुमला मायती पडाला पायजे मनीसनं दखा, मी तेला बाहेर तुमनी कडं लई रहना सय. 5 तवं येसुला बाहेर लेवामं वना. आनं तो काटंसना मुगुट आनं जामळा रंगना कपडं घालेल व्हताल. मंग पीलात तेसला सांगना, दखा हाऊ मानुसला.
6 मंग मुख्य याजक लोकं आनं मंदीरनं शीपाई लोकं तेला दखताज जोरमं आराळ्या दीसनं सांगनत, तेला कुरुस खांबावर ठोका. पन पीलात सांगना, तुमं सोता तेला ली जाईसनं कुरुस खांबावर ठोका. पन मनी नजरमं तेला दंड देवानी सारका काही दोस सापडना ना. 7 पन ते यहुदीसनं पुढारी लोकं जोर दीसनं सांगनत, आमना येक नीयम सय का, जे लोकं सोताला देव सांगत तेसला मरन दंड भेटालाज पायजे. आनं हाऊ मानुस सोताला देवना पोर्या सांगय. तेमन तो नीयम प्रमानं येला मरन दंड भेटालाज पायजे.
8 मंग हाई आयकीसनं पीलात आजुन जास्त घाबरी गया. 9 आनं तो परत येसुला राजवाडानी मजार ली जाईसनं तेला वीचारना, तु कथाईन वना सय? पन येसु तेला काही उतर दीना ना. 10 तेमन पीलात तेला सांगना, कजं तु माला काही उतर देय ना? तुला कुरुस खांबावर ठोकाना नातं सोडी देवाना आधीकार मना हातमं सय. हाई तुला मायती ना सय का? 11 मंग येसु तेला सांगना, जर देव तुला आधीकार दीता ना तं, मावर तुना काही आधीकार रहता ना. तेमन जो मानुस तुना हातमं माला सोपी दीना सय, तो तुनी पेक्षा बी मोठा पापना दोसी सय.
12 तवं हाई आयकीसनं पीलात येसुला सोडानी कोशीत करना. पन ते यहुदीसनं पुढारी लोकं येक सारकं आराळ्या दी रनलत. ते सांगी रनलत का, जर तु हाऊ मानुसला सोडी दीना तं, तु राजासना आधीकारी कैसरना सोपती ना सय. कजं का जो कोनी सोताला राजा सांगय, तो कैसरना वीरुद सय.
13 मंग हाई आयकीसनं पीलात येसुला परत बाहेर ली वना. आनं तो न्याय करानी जागामं जाईसनं बसना. ती जागाना नाव फरसबंदी व्हताल आनं ईब्री भाशामं तीला गब्बाथा सांगतत.
14 मंग तो दीवस वल्हांडनना सननी करता तयार कराना दीवस व्हताल. आनं तवं दुफारना टाईम व्हई जायेल व्हताल. तवं पीलात ते यहुदी लोकंसला सांगना, दखा तुमना राजा. 15 मंग ते लोकं आराळ्या दीसनं सांगनत, तेला मारी टाका, तेला कुरुस खांबावर ठोका. पीलात तेसला वीचारना, जो तुमना राजा सय, तेला मी कुरुस खांबावर ठोकु का? मंग मुख्य याजक लोकं सांगनत, कैसरला सोडीसनं आमना आजुन दुसरा राजा ना सय. 16 मंग शेवट येसुला कुरुस खांबावर ठोकानी करता पीलात शीपाईसना हातमं सोपी दीना.
येसुला कुरुस खांबावर ठोकत
(मतय २७:३२-४४; मार्क १५:२१-३२; लुक २३:२६-४३)
17 तवं शीपाई लोकं येसुला ताबामं ली लीनत. मंग येसु सोताना कुरुस खांबा ऊचलीनं येक जागामं ली गया. ती जागाना नाव "कवटीनी जागा" व्हतील. आनं ईब्री भाशामं तीला गुलगुथा सांगतत. ती जागा यरुशलेम शेहेरनी बाहेर व्हतील. 18 आनं तई ते येसुला कुरुस खांबावर ठोकनत. आनं येसुनी संगं आखु दोन मानसंसला बी ते ठोकनत. येसुला मजार ठेवनत आनं तेनी आजुबाजुला ते दोन जनंसला ठोकनत.
19 मंग पीलात तेनं शीपाईसघाई येक पाटीवर येक गोस्टं लीखीसनं येसुना कुरुसवर ठोकाला लावना. आनं तई आशा लीखेल व्हताल का, हाऊ नासरेथना येसु, यहुदी लोकंसना राजा सय. 20 मंग बरज यहुदी लोकं तो लीखेलला वाचनत. कजं का जई येसुला कुरुस खांबावर ठोकनत, ती जागा यरुशलेम शेहेरना जवळंज व्हतील. आनं ती गोस्टं लाटीन आनं ग्रीक आनं आरामी भाशासमं लीखेल व्हतील. 21 मंग यहुदीसनं मुख्य याजक लोकं पीलातला सांगनत, 'यहुदी लोकंसना राजा' आशा लीखु नोको, पन 'हाऊ मानुस सांगय का, मी यहुदी लोकंसना राजा सय' आशा लीख. 22 मंग पीलात सांगना, मी जा लीखेल सय, ता लीखेल सय. तेला मी आजुन बदलु शकावु ना.
23 जवं शीपाई लोकं येसुला कुरुस खांबावर ठोकनत, तवं ते तेनं कपडं काडी लीनत आनं चार वाटा पाडनत. आनं येक येक जन येक येक वाटी लीनत. पन तेनी घालेल कुडची सीयेल ना व्हताल, पन येकंज दोराघाई वरथीन तं खाल परन गुफेल व्हतील. 24 तेमन ते येक मेकंसला सांगनत, हाई कपडाला फाडुत ना. पन हाऊ कोन लेवाला पायजे मनीसनं आपुन चीठ्या टाकीसनं नक्की करुत. आनं ते शीपाई तशाज करनत.
आनं देवना वचनमं जा लीखेल सय, ता पुरा व्हवाला पायजे मनीसनं आशा व्हयना. तो वचनमं आशा लीखेल सय का,
✞"ते मनं कपडंसला तेसमं वाटी लीनत, पन मनी कुडचीनी करता चीठ्या टाकनत."
येसु तेनी मायला येक चेलाना हातमं सोपय
25 तवं येसुना कुरुस खांबानी शेजार तेनी माय आनं तेनी मायनी बईन आनं क्लोपानी बायको मरीया आनं मगदला गावनी मरीया हुब्या व्हतल्यात. 26 आनं जो चेलावर तो जास्त मया करता, तो बी तई शेजारज हुबा व्हताल. मंग येसु तेनी मायला दखीसनं सांगना, मा दख, आज पईन हाऊ तुना पोर्या सय. 27 आनं तो चेलाला बी सांगना, भाऊ, आज पईन हाई तुनी माय सय. मंग तवं पईन तो चेला येसुनी मायला तेनी घर ली गया आनं तीना देखभाल कराला लागना.
येसुना मरन
(मतय २७:४५-५६; मार्क १५:३३-४१; लुक २३:४४-४९)
28 मंग येसुला मायती पडी गया का, जे कामं करानी करता देवबाप तेला धाडेल व्हताल, ते आखं तो पुरा करी दीना सय. ✞आनं देवना वचनमं लीखेल आखु काही गोस्टं बी आतं पुरा व्हवाला पायजे मनीसनं तो सांगना, माला तीस लागी रहनी सय.
29 मंग आंबना भरेल येक भांडा तई व्हताल. आनं ते आंबमं स्पंजला बुडाईसनं येक येजोबना झाडनी काठीना तोंडावर ठेवनत आनं ऊचलीसनं आनं तेना तोंडमं लाईसनं तेला पेवाला दीनत. 30 तवं येसु तो रस चोखीसनं सांगना, मना काम पुरा व्हई गया सय. मंग मान खाल करीसनं तो तेना जीव सोडी दीना.
31 मंग तो दीवस शब्बाथनी करता तयार कराना दीवस व्हताल आनं दुसरा दीवस खास शब्बाथना दीवस व्हताल. आनं यहुदीसनं पुढारी लोकंसनी ईशा व्हतील का, तो खास दीवसमं कुरुस खांबावर मरेल शरीर नोको रव्हाला पायजे. तेमन ते लोकं पीलातपन जाईसनं सांगनत, कुरुस खांबावर ठोकेल तीनी जन लवकर मरी जावाला पायजे मनीसनं तेसना पायासला मोडी टाकाला आनं ते शरीरंसला खाल ऊतारी देवाला आज्ञा दे. 32 तेमन शीपाई लोकं ते कुरुस खांबासपन वनत आनं येसुनी संगं ठोकेल दोन जनंसना पायासला मोडी टाकनत. 33 पन जवं ते येसु कडं वनत, ते दखनत का, पईला पईन येसु जीव सोडी देयेल सय. तेमन ते तेना पायासला मोडनत ना. 34 तरी बी खरज तो मरना का ना, हाई मायती करानी करता शीपाईस मयथीन येक जन भाला लीसनं येसुनी कुखीमं ढोसलना. तवं लगेज ते मयथीन रंगत आनं पानी नींगी वना. 35-37 आनं देवना वचनमं जा लीखेल सय, ता पुरा व्हवाला पायजे मनीसनं आशा व्हयना. तो वचन आशा सय का,
✞"तेना येक बी हाडुक मोडामं येवावु ना."
आनं आशा बी लीखेल सय का,
✞"जेला ते भाला ढोसलनत, तेलाज लोकं दखीत."
आनं जो मानुस हाई गोस्टं दखेल सय, तो सोता येनी बद्दल तुमला सांगी रहना सय. आनं तो जा सांगी रहना सय, ता खरज सय. तेला मायती सय का, तो खरा बोली रहना सय आनं तुमं येसुवर वीस्वास ठेवाला पायजे मनीसनं तो तुमला हाई सांगी रहना सय.
येसुला कबरमं ठेवत
(मतय २७:५७-६१; मार्क १५:४२-४७; लुक २३:५०-५६)
38 तवं योसेफ नावना येक मानुस व्हताल. तो आरीमथाई शेहेरना व्हताल. आनं तो बी येसुवर वीस्वास ठेवता, पन येनी बद्दल कोनला बी मायती पडु दीता ना. कजं का तो यहुदीसनं पुढारी लोकंसला दखीसनं भीवाय रहनाल.
मंग तो पीलातपन गया आनं कबरमं ठेवानी करता येसुना शरीरला मांगना. मंग पीलात पईन परवानगी भेटानी नंतर तो जाईसनं येसुना शरीरला ली गया. 39 आनं तेनी संगं नीकदेम बी व्हताल. तोज नीकदेम येकदाव रातना टाईमला येसुपन जाईसनं तेला भेटेल व्हताल. मंग तो नीकदेम तेतीस कीलो आगरु नावना सुगंधी वस्तु आतरमं मीळाडीसनं ली वना. 40 मंग ते येसुना शरीरला लीसनं यहुदी लोकंसनी रीत प्रमानं तेवर सुगंधी वस्तु लावनत आनं तेला तागानं कपडंसमं गुंडाळनत.