5
पेत्र, याकोब आनं योहान येसुनी मांगं जात
(मतय ४:१८-२२; मार्क १:१६-२०)
1 येक दीवस येसु ✞गनेसरत तळावना काटला हुबा रहीसनं देवना वचन सांगी रहनाल. आनं बरज लोकं तेनी चारीमेर गरदी करीसनं तेना आयकी रनलत. 2 तवं तळावना काटला हुबं रहेल दोन डुंगं तेला दखायनत. कजं का काही मासं मारनारं ते डुंगंसला तई सोडीसनं तेसना जाळा धई रनलत. 3 ते डुंगंस मयथीन येक शीमोनना व्हताल. आनं तेवर येसु चडना आनं डुंगाला काट पईन थोडा मजार ली जावाला सांगना. आनं तो डुंगामं बसीसनं लोकंसला देवना वचन शीकाडाला लागना.
4 आनं जवं तो शीकाडाना बंद करना, तवं शीमोनला सांगना, तुना डुंगाला आजुन थोडा पानी मजार ली जा. आनं तई मासं धरानी करता तुना जाळा खोल पानीमं टाक. 5 पन शीमोन तेला सांगना, गुरुजी, आखी रात आमं कठीन मेहनत करनत पन काही भेटना ना. पन तु सांगय मनीसनं मी जाळा टाकय. 6 आनं जवं ते जाळा टाकनत, तवं तेसना जाळामं पक्कं सावटं मासं वनत. आनं तेसना जाळा फाटाला लागना. 7 तवं मदत करानी करता दुसरा डुंगं मतलं गवांदेसला ते ईशारा करीसनं बलावनत. मंग ते वनत आनं दोनी डुंगंसमं ईतलं मासं भरनत का, ते डुंगं बुडाला लागनत. 8 हाई दखीसनं शीमोन पेत्र येसुना पाय पडीसनं सांगना, परभु, तु मा पईन नींगी जा, कजं का मी येक पापी मानुस सय. 9 येनी करता तो आशा सांगना का, ते पक्कं सावटं मासं धरनंलत आनं हाई दखीसनं तो आनं तेनी संगं जे दुसरलं व्हतलत ते आखंसला नवल वाटनाल. 10 तशाज जबदीनं पोरे याकोब आनं योहान, जे शीमोननं जोडीदारं व्हतलत, तेसला बी पक्का नवल वाटना. तवं येसु शीमोनला सांगना, भीवु नोको. कजं का येथीन मोरं तु मानसंसला मनी बांग वीस्वासमं ली ईशी. 11 मंग ते तेसनं डुंगं काटवर लवनत. आनं ते आखंकाही सोडीसनं तेनी मांगं गयत.
येसु येक कोडी मानुसला बरा करय
(मतय ८:१-४; मार्क १:४०-४५)
12 मंग येकदाव येसु येक गावमं व्हताल. आनं तो गावमं येक कोडी मानुस वना. आनं तो येसुला दखना आनं तेना पाय पडीसनं सांगना, परभु, माला चांगला कर. कजं का जर तुनी ईशा व्हई तं, तु माला चांगला करु शकशी. 13 तवं येसु हात पुडं करीसनं तेला हात लावना आनं सांगना, मनी ईशा सय का, तु चांगला व्हई जा. तवं लगेज तो चांगला व्हई गया. 14 तवं येसु तेला आज्ञा दीसनं सांगना, येनी बद्दल कोनला बी सांगु नोको. पन जाईसनं सोताना शरीरला याजकला दखाड. आनं तुमना चांगला व्हवानी नंतर जा काही चडावाला पायजे मनीसनं मोसा ठरायेल सय, ता लीसनं भेट चडाव. कजं का येनी द्वारा लोकंसला मायती पडी का, तु चांगला व्हई गया सय.
15 पन येसुनी बद्दल जास्त जास्त पसरत गया. तेमन बरज लोकं तेना शीक्षन आयकानी करता आनं तेसना आजार पईन बरा व्हवानी करता तेपन गोळा व्हयनत. 16 पन सुना रानमं जाईसनं तो तई प्राथना कराला लागना.
येसु येक पक्षवादी मानुसला बरा करय
(मतय ९:१-८; मार्क २:१-१२)
17 येकदाव येसु लोकंसला देवना वचन शीकाडी रहनाल. तवं आजारीसला बरा करानी करता देवनी शक्ती तेमं व्हतील. तवं काही परुशी आनं नीयम शीकाडनारं तई बसेल व्हतलत. ते गालील आनं यहुदीया जील्लासनं आनं यरुशलेम शेहेरनं आखं गावंस मयथीन ईयेल व्हतलत. 18 तवं काही लोकं येक पक्षवादी मानुसला झोळीवर ऊचली ली वनत. आनं तेला मजार ली जाईसनं येसुनी समोर ठेवानी करता कोशीत करनत. 19 पन लोकंसनी गरदी मुळे तेसला मजार जावाला वाट भेटनी ना. तेमन ते घरनी वर चडी गयत आनं काही कौलं वसारीसनं वाट करनत. आनं तथाईन तो मानुसला झोळी समत येसुनी समोर सोडनत.
20 मंग तेसना वीस्वास दखीसनं येसु तो मानुसला सांगना, भाऊ, मी तुना पापनी माफी करी दीना सय. 21 तवं काही नीयम शीकाडनारं आनं परुशी लोकं तेसना मनमं वीचार कराला लागनत का, देवना वीरुद बोलनार हाऊ मानुस कोन सय? कजं का फक्त देव शीवाय दुसरा कोनी बी पापनी माफी देवु शकय ना. 22 पन येसु तेसना मनना वीचार वळखी लीना. आनं तेसला सांगना, तुमं तुमना मनमं कजं आशा वीचार करत? 23 जर मी हाऊ पक्षवादी मानुसला फक्त सांगय का, तुना पापनी माफी व्हई गयी सय, तवं तेला माफी भेटनी का ना, हाई तुमला मायती पडावु ना. पन जर मी तेला सांगय का, उठ तुनी झोळी ऊचलीनं नींगी जा, तवं तुमला मायती पडी का, मापन बरा करानी शक्ती सय. 24 आनं आतं मी तुमला दखाडय का, जगमं पापनी माफी देवाना आधीकार मापन सय. (मंग येसु तो पक्षवादी मानुसला सांगना) मी तुला सांगय, उठ आनं तुनी झोळी ऊचलीसनं तुनी घर नींगी जा. 25 मंग तो लगेज ते आखंसनी समोर उठना आनं जी झोळीवर तो पडेल व्हताल, ती ऊचलना आनं देवनी स्तुती करी करीसनं तेनी घर नींगी गया. 26 तवं आखंसला पक्का नवल वाटना आनं ते देवनी स्तुती कराला लागनत. आनं ते पक्का घाबरीसनं येक दुसरंसला सांगनत, आज आपुन येक चमत्कारनी गोस्टं दखनत.
लेवी येसुना चेला बनय
(मतय ९:९-१३; मार्क २:१३-१७)
27 नंतर येसु बाहेर गया आनं ✞लेवी नावना येक कर वसुली करनारला जकात नाकावर बसेल दखना. आनं तेला सांगना, मनी मांगं ये. 28 तवं लगेज तो उठना आनं आखंकाही सोडीसनं तेनी मांगं गया.
29 मंग येसुनी करता लेवी तेना घरमं जेवन तयार करना. आनं तई येसुनी संगं बरज कर वसुली करनारं आनं दुसरं लोकं बी जेवाला बसेल व्हतलत. 30 तवं काही परुशी आनं नीयम शीकाडनारं कुरकुर करीसनं येसुनं चेलंसला सांगनत का, कर वसुली करनारं आनं दुसरं पापी लोकंसनी संगं तुमं कजं जेवन करत? 31 तवं येसु तेसला सांगना, जे लोकं चांगलं सत, तेसला डाक्टरनी गरज ना रहय, पन आजारी लोकंसला रहय. 32 तशाज जे सोताला नीतीवान समजत, ते लोकंसला ना, पन पापी लोकं पस्तावा कराला पायजे मनीसनं तेसला बलावानी करता मी जगमं वना सय.
येसु ऊपासनी बद्दल शीकाडय
(मतय ९:१४-१७; मार्क २:१८-२२)
33 येक दीवस काही लोकं येसुला सांगनत, बापतीस्मा करनार योहाननं चेलं लगेलग ऊपास आनं प्राथना करत. तशेज परुशी लोकंसनं चेलं बी करत. पन तुनं चेलं कजं ऊपास करत ना? 34 येसु तेसला सांगना, जो परन वराडनी संगं नवरदेव सय, तो परन तुमं तेसला ऊपासमं ठेवु शकत ना. 35 पन आशा दीवस येईत का, नवरदेवला तेस मईन लेवामं येई✞. ते दीवसमं ते ऊपास करीत.
36 मंग येसु तेसला आखु येक ऊदाहरन सांगना. कोनी बी नवा कपडा फाडीनं, तो ठीगळ जुना कपडाला लावत ना. जर लावनत तं, तो नवा कपडा नास व्हई जाई आनं तो नवा कपडाना ठीगळ जुना कपडाला बी बरोबर दखाय ना. 37 तशाज कोनी बी नवा द्राक्षसना रसला ✞कातडान्या जुन्या बाटलीसमं भरत ना. जर भरनत तं, नवा द्राक्षसना रस कातडान्या बाटलीसला फोडी टाकी. आनं कातडान्या बाटल्या फुटी जाईत आनं द्राक्षसना रस खाल वताई जाई. आशा दोनी नास व्हई जाईत. 38 तेमन नवा द्राक्षसना रसला कातडान्या नव्या बाटलीसमं भराला पायजे. 39 आनं जो कोनी जुना द्राक्षसना रस पेयेल सत, ते आजुन नवा द्राक्षसना रस पेवानी ईशा करत ना. कजं का ते सांगत का, जुनाज चांगला सय.