भलि खबर अन्य जातियोंक लिजी लै छु
(प्रेरितों १०)
रोमी सुबदार कैं स्वर्गदूतक दर्शन
10
1 कैसरिया नगर मिं कुरनेलियुस नामक एक रोमी सुबदार छी। 2 उ और वीक परिवार धार्मिक और परमेश्वरक भक्त छी, यैक अलावा उ यहूदी गरीब मैंसों कैं दान दिंछी और हर बखत प्रार्थना मिं लागि रुंछी। 3 एक दिन दोफरिक बाद परमेश्वरक दूतल कुरनेलियुस कैं दर्शन दिबेर कौ, "कुरनेलियुस!" 4 तब वील कौ, "प्रभु, के बात छु?" फिर स्वर्गदूतल कौ, "परमेश्वरल तेरि प्रार्थना सुणी, और त्यर दान दिणल उं खुशि छन। 5 यैक लिजी ऑब तु याफा नगर मिं मैंस भेजिबेर शिमोन जकैं पतरस लै कूंनी, उकैं बुलवै ले। 6 उ चमड़क काम करणी शिमोनक घर मिं रुकि रौ, जो समुद्रक किनॉर मिं छु।"7 यैक बाद उ स्वर्गदूत वांबे न्है गोय, और कुरनेलियुसल द्वी दासों और एक धार्मिक सिपै कैं बुलवा। 8 और उनुकैं सब बात भली कै बतैबेर याफा नगर भेजौ।
पतरसक दर्शन
9 जब उं दुसॉर दिन याफा नगरक नजिक पुजीं, उ बखत पतरस आपण घरक पॉख मिं प्रार्थना करणक लिजी गो। 10 जब दोफरिक बखत उकैं भूक लागी और खॉण पाकणौछी, उ बखत वील यौ दर्शन देखौ कि 11 वील एक चधरक चारि क्वे लुकुड़ चारों क्वाड़ों बे लटकी धरति मिं उण देखौ, 12 जमिं सब किसमॉक चौपा, चाड़-प्वथील और सब रिङणी अशुद्ध जीव-जन्तु छी। 13 तब वील यौ अवाज सुणी, "पतरस, उठ और इनुकैं मारिबेर खा।"
14 लेकिन पतरसल कौ, "प्रभु, ना, मी यस नि करि सकन, किलैकि मील कभै क्वे अशुद्ध चीज नि खै राखि!" 15 फिर वील यौ अवाज सुणी, "जकैं परमेश्वरल शुद्ध ठैरै रॉखौ, उकैं तु अशुद्ध नि कौ।" 16 तीन बार यस्सै हुणक बाद, उ चधर दुबार अगाश मिं न्है गोय।
17 यैक बाद जब उ यौ दर्शनक बारि मिं सोचणौछी कि यैक मतलब के ह्वल, तब कुरनेलियुसॉक भेजी मैंस शिमोनक घरक पत्त-पाणि लगैबेर द्वारक सामण ठॉड़ हबेर पुछण लागीं, 18 "शिमोन, जकैं पतरस कूंनी, के उ यैं रुंछा?" 19 तब पवित्र आत्माल पतरस धैं कौ, "देख, तीन मैंस तुकैं पुछणईं। 20 ऑब झट्ट उठ और तेलि जैबेर बेहिचक उनर दगाड़ जा, किलैकि मीलै उनुकैं भेजि रॉखौ।"
21 तब वील तलि जैबेर उनुधैं कौ, "देखो, जकैं तुम पुछणाछा, उ मी छूं, तुम यां किलै ऐ राछा?" 22 तब उनुल कौ, "कुरनेलियुस सुबदार, जो धर्मी छु और परमेश्वर देखि डरुं, और जैक पुर यहूदी जातिक मैंस इज्जत करनी, उकैं एक पवित्र स्वर्गदूतल यौ हुकुम दी रॉखौ कि उ तुमुकैं आपण घर बुलैबेर बचन सुणो।" 23 यौ सुणिबेर पतरसल उनुकैं भितेर बुला, और उदिन उं वैं रईं। तब दुसॉर दिन पतरस और याफाक थ्वाड़ विश्वासी लै उनर दगाड़ बॉट लागीं, और तिसॉर दिन उं सब कुरनेलियुसक पास पुजीं।
कुरनेलियुसक घर मिं
24 कुरनेलियुस आपण पुर परिवार और खाश दगड़ुवोंक दगाड़ उनर इंतजार करणौछी। 25 जब कुरनेलियुसल सुणौ कि पतरस पुजि गो, तब वील जैबेर पतरसक दगाड़ भेट करी, और उकैं चौड़ हबेर पैलाग करौ। 26 लेकिन पतरसल उकैं उठैबेर कौ, "मी लै तुमरै चारि मैंस छूं!" 27 तब पतरस वीक दगाड़ बात-चीत करनै भितेर गो, और वां भौत मैंसों कैं जॉम देखिबेर कूण लागौ, 28 "तुम लै जाणछा कि यहूदियोंक लिजी क्वे अन्य जातिक दगाड़ रिश्त धरण या उनर घर मिं जाण मना छु, लेकिन परमेश्वरल मिकैं बता कि मी क्वे मैंस कैं अशुद्ध नि कूं। 29 यैक लिजी जब तुमुल मिकैं बुलवा, तब मी बेहिचक आयूं। ऑब बताओ, तुमुल मिकैं यां किलै बुलवा?"
30 तब कुरनेलियुसल कौ, "आज बे चार दिन पैली यौ बखतै, जब मी प्रार्थना करणौछी, तब एक चमकिल लुकुड़ पैरी मैंस म्यर सामण आ, 31 और वील मिधैं कौ, "परमेश्वरल तेरि प्रार्थना सुणी, और त्यर दान दिणल उं खुशि छन। 32 यैक लिजी कैकणी याफा नगर भेजिबेर शिमोन जकैं पतरस लै कूंनी, उकैं यां बुलवै ले। उ समुद्रक किनॉर चमड़क काम करणी शिमोनक घर मिं रुकि रौ।" 33 यैक बाद मील तुमुकैं यां बुलवा और तुमुल यां ऐबेर बड़ि किरपा करी। ऑब हम सब यां परमेश्वरक सामण यैक लिजी छूं कि जो बात उनुल तुमुकैं बतै रॉखी, हम सब लै वीक बारि मिं जाण सको।"
पतरसक परचार
34 तब पतरसल कौ, "ऑब मेरि समझ मिं भली कै ऐ गो कि परमेश्वर कैकै दगाड़ भेद-भाव नि करन, 35 लेकिन हरेक जातिक मैंस जो परमेश्वर देखि डरनी और धार्मिक काम करनी, परमेश्वर उनुकैं भल मानुं।
36 तुमुकैं यौ बात मालुम छु, कि परमेश्वरल यहूदियोंक पास यीशु मसीक जरियल जो सबोंक प्रभु छन, शांतिक समाचार सुणवा। 37 तुमुल यहूनाक पाणिक-बपतिस्माक बारि मिं लै सुण ह्वल, और मालुम लै छु कि परमेश्वरल नासरत गौंक यीशु कैं पवित्र आत्मा और सामर्थक दान लै दे। 38 उं भलाइक काम करनी और उ सबों कैं जो शैतानक जरियल परेशान छी, भल करनै रुंछी, किलैकि परमेश्वर उनर दगाड़ छी। 39 हम उं सब बातोंक गवाह छूं, जो यीशुल यहूदिया और यरुशलेम मिं करीं, और यौ यीशु कैं मैंसोंल सूली मिं चढै़बेर मारि दे। 40 लेकिन परमेश्वरल उनुकैं तिसॉर दिन मरियों मिंबे ज्यून करिबेर उं मैंसों कैं दिखा जनुकैं परमेश्वरल पैलियै बे छांटि रॉखछी। 41 यैक हम गवाह छूं, और मरियों मिंबे ज्यून हुणक बाद हमुल उनर दगाड़ खा-पी। 42 और उनुल हमुकैं यौ हुकुम लै दे, कि हम मैंसों कैं उनर बारि मिं बतूं और उनर गवाही द्यूं कि परमेश्वरल उनुकैं ज्यूनों और मरियोंक न्याय करणी ठैरै रॉखौ। 43 उनरै बारि मिं सब नबियोंल गवाही लै दे कि जो लै उनुमिं भरौस धरॉल, उनुकैं उनर जरियल पापोंक माफि मिलेलि।"
44 जब पतरस बुलाणै मिं छी, तब पवित्र आत्मा सब सुणणिवॉलों मिं ऐ। 45-46 और उं अलग-अलग बोलि मिं बुलाण और परमेश्वरक अराधना करण लागीं। जो यहूदी विश्वासी पतरसक दगाड़ ऐ राछी, उं यौ सब देखिबेर दंग रै ग्याय कि पवित्र-आत्माक बरदान अन्य जातियों कैं लै मिलणौ।