प्रेरितों 3

लुल मैंसक भल हुण

(प्रेरितों ३:१-२६)

1 थ्‍वाड़ दिनोंक बाद जब पतरस और यहूना प्रार्थनाक करणक लिजी परमेश्‍वरक भवन मिं जाणाछी, 2 तब वां परमेश्‍वरक भवनक सामण एक जनमक लुल मैंस बैठिबेर भीख मांगछी। 3 उ पतरस और यहूना कैं वां उण देखिबेर उनुधैं भीख मांगण लागौ। 4-5 पतरसल उधैं कौ, "हमर तरफ चा।" तब वील के मिलणक आशल उनर तरफ देखौ। 6 लेकिन पतरसल कौ, "हमर पास सुन-चां‍दि न्‍हैं, पर जो हमर पास छु, उ हम तुकैं दिंनू। उठ, नासरत गौंक यीशुक नामल घुम फिर!"

7 तब पतरसल वीक दैण हात पकड़िबेर उकैं ठॉड़ करौ, और झट्‍ट वीक खुटों और जांङड़ों मिं हिटणकि ताकत ऐ गेई। 8 उ उछलण कुदण लागौ, और परमेश्‍वरक महिमा करन-करनै पतरस और यहूनाक दगाड़ परमेश्‍वरक भवनक भितेर गो। 9-10 तब सब मैंसोंल उकैं देखिबेर पछ्‌याण ले कि यौ परमेश्‍वरक भवनक भ्‍यार बे बैठिबेर भीख मांगणी मैंस छु, और उकैं उछलण-कुदण और परमेश्‍वरक महिमा करण देखिबेर उं दंग रै ग्‍याय। 11 और यैक लिजी वां भौत जादे भीड़ जॉम है गेई।

12 पतरसल यौं मैंसों धैं कौ, "ओ भाइयो, तुम इसिक किलै चाणाछा, कि हमुल आपण ताकतल यौ मैंस कैं भल करौ? 13-15 यस न्‍हैं, लेकिन हमुल यौ यीशुक शक्‍तिल करौ! हमर पुरखा इब्राहीम, इसहाक और याकूबक परमेश्‍वरल यीशु कैं भौतै आदर दे, लेकिन तुमुल उनुकैं मरवै दे। उं पवित्र, न्‍यायी और निष्‍पाप छन! राजपाल पिलातुसल लै उनुकैं छोड़णक लिजी कौ, लेकिन तुमुल उधैं बिनती करी, कि यीशुक बदाव हमर लिजी एक खूनी कैं छोड़ि दिओ। तुमुल जिन्‍दगी कैं दिणिवॉल कैं मरवै दे, लेकिन परमेश्‍वरल उनुकैं मरियों मिंबे दुबार ज्‍यून करौ, जैक हम सब गवाह छूं।

16 यौ लुल मैंस कैं ताकत और चंगाइ यीशु मिं विश्‍वास करणक जरियल मिली, जकैं तुम सब देखणाछा। 17 ओ भाइयो, मी जाणनू कि तुमुल और तुमार अधिकारियोंल यौ काम यैक लिजी करौ किलैकि तुमर समझ मिं यौ बात नि आइ, कि उं को छन। 18 लेकिन जो बातों कैं परमेश्‍वरल आपण सेवकोंक जरियल पैलियै कै रॉखछी, कि हमर मुक्‍तिदाता कैं दु:ख-पीड़ उठूण पडे़लि, उकैं परमेश्‍वरल इसिक पुर करौ। 19-20 यैक लिजी ऑब तुम आपण मनों कैं बदइबेर परमेश्‍वरक तरफ लौट आओ, जैल तुमार पाप माफ करी जाओ। तब यस दिन आल, जब परमेश्‍वरक जरियल तुमेरि आत्‍मा कैं लै तरो-ताजगी मिलेलि, और परमेश्‍वर यीशु कैं, जो हम सबोंक मुक्‍तिदाता ठैरौ, दुबार भेजो।" 21 लेकिन ऐल उनुकैं स्‍वर्ग मिं उ बखत तलक रुण छु, जब तलक परमेश्‍वर सब चीजों कैं नई नि करि लियो।

22 जस मोशेशल कौछी, "प्रभु परमेश्‍वर तुमर भैनों मिंबे म्‍यर जस एक सेवक ठॉड़ करल, और जे लै उ तुमुधैं कौल, तुम वीक सुणिया। 23 और जो मैंस वीक बात नि सुणल उ नांश करी जॉल।" 24 इसिक जदुक लै परमेश्‍वरक सेवक आईं, उं सबोंल आजक यौं दिनोंक बारि मिं लै बताछी। 25-26 और जो वैद परमेश्‍वरल हमार पुरखोंक दगाड़ करि रॉखछी, उ वैद तुमर लिजी लै छु। परमेश्‍वरल इब्राहीम धैं कौ कि त्‍यार वंशक जरियल संसारॉक सब मैंस आशीश पाल। और इब्राहीमक यौ वंश यीशु छु! परमेश्‍वरल उनुकैं तुमर पास यैक लिजी भेजौ, कि तुम आपण खराब बॉट छोड़िबेर परमेश्‍वरक तरफ लौट आओ।"