मैंसों मिं पवित्र आत्मा उं
(प्रेरितों २:१-४०)
2
1 फसलक त्यार जकैं पेंतेकुस्तक त्यार लै कूंनी, मिं जब यीशु मिं विश्वास करणी भौतै मैंस एक जॉग मिं जॉम है राछी। 2 तब अचानक एक जोरदार हाव-ब्यावक अवाजल उ पुर घर भरी गोय। 3 और उनुकैं ऑगक समान अलग-अलग लपक देखीणाछी, और उं ऐबेर सब मैंसों मिं रुकि गोय। 4 और उं सबों मिं पवित्र आत्मा ऐ और उं दुसेरि अलग-अलग भाषाओं मिं लै बुलाण लागीं।5-6 तब भौत मैंस वां यौ देखणक लिजी आईं कि यां के है रौ? और वां ऐबेर उनुल सुणौ, कि अरे, यौं मैंस हमेरि भाषा मिं परमेश्वरक महिमा करणईं, जबकि हम अलग-अलग देशों बे यां ऐ रयूं, और अलग-अलग भाषा बुलांनू! (किलैकि यौ बखत त्यारक कारणल यरुशलेम मिं भौतै मैंस जॉम है राछी)
7 यौ देखिबेर उं दंग हबेर कूण लागी, "के यौं सब गलील प्रदेशॉक मैंस न्हैंतिना? 8-11 फिर यौ के बात छु, कि हमुमिंबे हरेक मैंस इनुकैं आपणि बोलि मिं बुलाण सुणणौ?" 12 और उनुल एक दुसर धैं पुछौ, "यौ के हुणौ!" 13 लेकिन थ्वाड़ मैंसोंल हसि करिबेर कौ, "उं शराब पिबेर नश मिं चूर है रईं!"
14-15 यौ सुणबरे पतरसल जोर-जोरल कौ, "ओ यहूदियो और यरुशलेमॉक मैंसों, तुम मेरि बातों कैं ध्यानल सुणो। हमुल शराब नि पी राखि! 16 लेकिन यौ उ बात छु जो योएल नबीक जरियल भौत साल पैली कई गेछी -
17-21 "परमेश्वर कूंनी, "आखिरी दिनों मिं यस ह्वल कि मी आपणि आत्मा सब मैंसों कैं द्यूंल।
और तुमार च्याल-चेली भविष्यबाणी करॉल और तुमार जवान दर्शन और बुड़ स्वीण देखॉल।
और जो लै मेरि सेवा करनी, मी उनुकैं आपण आत्मा द्यूंल, और उं मैंसों कैं मेरि बात बताल।
यैक अलावा मी धरति और अगाश मिं आपण भौत ठुल-ठुल काम करुंल, और खून, ऑग और धुङ देखियल।
सूर्ज अन्यार मिं बदई जॉल और जून खून जस लाल है जालि।
यैक बाद परमेश्वरक न्याय करणक दिन आल। और जो परमेश्वर कैं धात लगाल, वी बचाई जॉल।।"
22 ओ इस्रायलियो, यौ बात कैं जाण लियो कि नासरत गौंक यीशु एक यस मैंस छन, जनुकैं परमेश्वरल आपण तरफ बे भेजि रॉखछी। जनेरि पछ्याण यौ सामर्थाक और चमतकारॉक काम छन, जनुकैं परमेश्वरल उनर जरियल तुमार सामण करिबेर दिखाईं, जस तुम सब खुद जाणछा, किलैकि यौ सब तुमर बीच मिं हौ। 23 और यौ यीशु कैं जो परमेश्वरक मनसा पुर करणक लिजी पकड़ाई गो, उनुकैं तुमुल सूली मिं लटकैबेर मारि दे। 24 लेकिन परमेश्वरल उनुकैं मरियों मिंबे दुबार ज्यून करौ! और मौत कैं इदुक शक्ति नि छी कि उ उनुकैं ज्यून हुण बे रोक सको।
25-28 जस हमर रॉज दाउदल भौत बखत पैली कै रॉखछी,
"मी हमेशा प्रभुक तरफ देखनै रूंल। किलैकि उं म्यर सामण छन, यैक लिजी मिकैं के परेशानी नि है सकनि।
यौ खुशील मी गीत गाणयूं, किलैकि परमेश्वर बे मिकैं एक नई ऑश मिली।
उं म्यर प्राण कैं अधोलोक मिं नि छोड़ॉल, और न मिकैं कबर मिं सड़न द्याल।
किलैकि तुमुलै मिकैं जीवनक भल बॉट बता, और तुम म्यर दगाड़ रैबेर मिकैं खुशील भर दिंछा।"
29 फिर पतरसल यौ लै कौ, "दाउदल यौ सब आपण बारि मिं नि कौय, किलैकि उ मरौ और दफनाई लै गो, और वीक कबर आज तलक हमेरि बीच मिं छु। 30 लेकिन उ जाणछी कि परमेश्वरल वीक दगाड़ वैद करि रॉखौ, कि परमेश्वर वीक वंश बे एक मैंस कैं वीक राजगद्दी मिं बैठाल। 31 और वील हुणी बातों कैं पैलियै देखिबेर, हमर मुक्तिदाताक ज्यून हुणक बारि मिं यौ सब कौ, कि उ न तो अधोलोक मिं छोड़ि जॉल और न उकैं सड़न दी जॉल। 32 यौ तब पुर हौ जब परमेश्वरल यौ यीशु मसीह कैं ज्यून करौ, जैक हम सब गवाह छन। वी हमर मुक्तिदाता छु! 33 उं परमेश्वरक दैण हातक तरफ सबों है ठुल पद मिं भैटी छन। परमेश्वरल उनुकैं आपण पवित्र आत्मा दे, और जस परमेश्वरल वैद करि रॉखछी, उसिकै ऐल यीशुल यौ हमुकैं लै दे। यौ वी छु जो तुम ऐल देखणाछा। 36 यैक लिजी इस्रायलॉक सब मैंसों कैं जरूड़ जाणण चैं कि परमेश्वरल यौ यीशु कैं जकैं तुमुल सूली मिं लटका, उकैं प्रभु और मुक्तिदाता द्विवै ठैरा!"
37 जब उं मैंसोंल यौ बात सुणी, तब उनार मन भौत दु:खी हईं। उनुल पतरस और दुसॉर शिष्यों धैं पुछौ, "दाज्यू, ऑब हम के करनू?" 38 तब पतरसल कौ, "पाप बे आपण मन फिराओ और तुम यीशु मसीक नामल पाणिक-बपतिस्मा लियो, जैल तुमुकैं माफि मिलो और तुम पवित्र आत्माक बरदान लै पाओ। 39 उ वैद सब मैंसोंक लिजी छु, जनुकैं परमेश्वर आपण पास बुलाल, चाहे तुम, तुमार नॉनतिन या दूर-दूर रुणिवॉल मैंस क्वे लै हो।" 40 तब पतरसल भौतै लम्ब बखत तलक उनुकैं जोर दी-दिबेर समझा कि आपुं कैं यौ ट्याड़ मैंसों कैं मिलणी वालि सजा बे बचाओ।
नई विश्वासी
(प्रेरितों २:४१-४७)
41 और जो मैंस उ दिन उनर बातों मिं भरौस धरिबेर पाणिक-बपतिस्मा लिबेर उनार दगाड़ मिलीं, उनेरि गिनती तीन हजार छी।
42-47 उं एक दुसरक दगाड़ भेट-घाट करनै रुंछी, और खाश शिष्यों धैं यीशुक बारि मिं सिखनै रुंछी। उं लगातार प्रार्थना करछी, और एक दगाड़ मिलिबेर खॉण लै खांछी। उनर समान लै साजक छी, और जनर पास समान छी, उं उकैं बेचिबेर जस जनेरि जरवत हुंछी, उस उनुकैं बॉट दिंछी। और उं हर बखतै परमेश्वरक भवन मिं ऐबेर उनर अराधना करछी। यैक अलावा खाश शिष्योंक जरियल भौत ठुल चिन्ह और चमतकारॉक काम हईं, उनुकैं देखिबेर सब मैंस भौतै दंग हईं। और यौ देखिबेर भौत मैंस यीशु मिं भरौस करण लागीं जैल उं बचि ग्याय।