खाश शिष्योंक जरियल परमेश्वरक काम
यीशुक स्वर्ग मिं उठाई जाण
(प्रेरितों १:१-१०)
1
4 उनुल आपण शिष्यों कैं यौ हुकुम दिबेर कौ, "तुम म्यर जाणक बाद यरुशलेम कैं नि छोड़िया, पर परमेश्वरक बातक पुर हुणक इंतजार करिया, जो मील तुमुकैं बतै रॉखछी। 5 जसिक तुमुल यहूना बे पाणिक-बपतिस्मा ले, उसिकै ऑब तुम परमेश्वर बे पवित्र-आत्माक बपतिस्मा लै पाला।"6 शिष्योंल उधैं पुछौ, "हे प्रभु, के तुम रोमियों कैं हरैबेर इस्रायल राज कैं ऐलै दुबार बणाला?" 7 उनुल जबाब दे, "बखत और कालक बारि मिं जो पिता परमेश्वरल ठेरै रॉखौ, वीक बारि मिं तुम नि सोचौ। 8 पर जब पवित्र आत्मा तुमुमिं आल, तब तुम सामर्थ पाला। और यरुशलेम, यहूदिया, सामरिया और पुर धरतिक वाण-क्वाणों मिं तुम म्यार गवाह ह्वाल।"
9 फिर उनर देखन-देखनै यीशु स्वर्ग मिं उठाई गेईं, और बादोवल ऐबेर उनुकैं उनर ऑखों बे छोप दे।
10-11 जब उं मलिकै चैराछी, तब अचानक सफेद लुकुड़ पैरी द्वी मैंस उनार सामण ठॉड़ हबेर उनुधैं कूण लागीं, "ओ गलीली मैंसों, तुम अगाशक तरफ के चैराछा? यौ यीशु जनुकैं तुम स्वर्ग मिं जाण देखणाछा, एक दिन उं दुबार इसिकै आल।"
यैक बाद शिष्य फिर यरुशलेम आईं।
नई शिष्यक चुनाव
(प्रेरितों १:१२-२६)
12-14 यीशुक स्वर्ग वापिस जाणक बाद उनार शिष्य फिर यरुशलेम आईं। उनार नाम छी - पतरस, यहूना, याकूब, अन्द्रियास, फिलिप्पुस, थोमा, बरतोलोमी मती, हलफईक च्यल याकूब, शमौन जेलोतेस और दुसर याकूबक च्यल यहूदा। और उं रोज जॉम हबेर प्रार्थना करणाछी। इनर दगाड़ यीशुकि इज मरियम और भै लै छी, और थ्वाड़ दुसॉर स्यैणी लै छी। a
15 यैक थ्वाड़ दिनोंक बाद, जब वां एक सौ बीस मैंस जॉम है राछी, तब पतरसल इनर सामण ठॉड़ हबेर कौ, "तुम सबों कैं मालुम छु कि युदस जो हम शिष्यों मिं बे एक छी, वील ध्वक दे और यीशु कैं पकड़वा। यैक बाद जब उकैं आपण गल्ति महसूस है, तब वील आत्म-हत्या करि ले। 21-22 यैक लिजी हम वीक बदाव मिं एक दुसर मैंस कैं छांटनू, ताकी हम फिर बार है जूंल। लेकिन यौ जरूड़ी छु, कि उ मैंस शुरु बे हमर दगाड़ रई हो, जब बे हम यीशुक दगाड़ छी। उ हमार दगाड़ यीशुक फिर ज्यून हुणक गवाह ठैरो।"
23 यैक लिजी उनुल यूसुफ और मत्तियाह नामक द्वी मैंसों कैं ठॉड़ करौ। 24 और यौ प्रार्थना करी, "हे प्रभु, तुम सब मैंसोंक मन कैं जाणछा, यैक लिजी तुम हमुकैं बताओ कि तुमुल यौं द्वी मैंसों मिंबे आपण लिजी ककैं छांटि रॉखौ, 25 कि उ युदसक जॉग मिं तुमर बताई काम करि सको।" 26 जब उनुल उनर नामकि परची खिती, तब उ मत्तियाहक नामकि निकई। यैक लिजी उ इग्यार खाश शिष्योंक दगाड़ शामिल हौ।