रूतकि ब्याकि बात
(रूत ४:१-१२)
4
1 उदिन तब बोअज गौं मिं उणी खाश बॉट मिं गो और जब वील उ मैंस कैं जैक फर्ज नामी कैं समावणक छी उण देखौ, तब वील धात लगैबेर कौ, "ओहो महारॉज, यां ऐबेर बात तो सुणो।" और यौ सुणिबेर उ मैंस वां आ। 2 तब वील नगरॉक दस पधान मैंसों कैं वां बुलैबेर लै बैठाईं, 3 और बोअजल उकैं बता, "नामी जो मोआब देश बे वापिस ऐ गे, उ आपण बैगक गड़ कैं बेचण चां। 4 अगर तुकैं चैं, तब यौ सबोंक सामणी वीक गड़क टुकुड़ कैं खरीद ले, ताकी यौ सब यैक गवाह हो। लेकिन अगर तु यस नि करनै तब लै आपणि मंशा साफ-साफ बतै दे। किलैकि अगर तु नि खरीदनै, तब मी उकैं खरीदनू, किलैकि त्यर बाद यौ म्यर फर्ज छु।" वील कौ, "ठिक छु, मी खरीद ल्यूंल।" a 5 फिर बोअजल उधैं कौ, "जदिन तु नामीक गड़ खरीदलै, उ दिन बे वीक विधाव ब्वारि रूत लै तेरि स्यैणि बणि जालि, जैल उ जमीन पर उनरै खानदानक हक ह्वल।" 6 यौं सब बात सुणिबेर वील कौ, "अगर यौ बात छा, तब मी यस नि कर सकन। किलैकि अगर मी यस करनू तब म्यर पुश्तैनी जमीनक हिस्स कम है सकुं। यैक लिजी मी आपण यौ हक तुमुकैं दिंनू, तुम उ जमीन कैं खरीद लियो।" b 7 उ बखत इस्रायल मिं यौ रीती छी, कि जब क्वे मैंस के लै लेन-देन करछी तब उकैं साबित करणक लिजी उ दुसर कैं आपण ज्वत खोलिबेर दिंछी। 8 यैक लिजी वील आपण ज्वत खोलिबेर बोअज कैं दे और कौ, "तु नामीक गड़ कैं खरीद लै।" 9 तब बोअजल सबनक सामण जो वां छी कौ, "तुम सब यौ बातक गवाह छा कि जो लै एलीमेलेक, और वीक च्याल महलोन और किल्योनक छी, उ सब कैं मी नामी बे खरीदनू। 10 मी महलोनकि विधाव रूत कैं यौ मंशाल आपणि घरवाइ बणूंनू, कि यैक बाद लै वीक जायदाद मिं वीकै खानदानक हक रौल, और उनर वंश यां चलनै रौल, यैक तुम सब गवाह छा। 11 तब प्रधानों और सब मैंसोंल जो वां जॉम छी, उनुल कौ, "हम यौ बातक गवाह छूं, कि तु यौ खरीदणौछै। और प्रभु परमेश्वर तेरि यौ स्यैणि कैं याकूबकि स्यैणी राहेल और लियाकि चारि आशीश दियो, जनुबे इस्रायलक बारि जांनी-मानी वंश पैद हईं। और तु एप्राती कुल मिं परसिद्ध ह्वलै, और पुर बैतलहम गौं मिं त्यर नाम फैलो। 12 और यौ स्यैणि बे त्यर जरियल जो औलाद पैद ह्वेलि वीक जरियल त्यर वंश पेरिसक चारि बणो, जो तामार बे यहूदाक जरियल पैद भौछी।"बोअज और रूतक ब्या
(रूत ४:१३-१७)
13 इसिक बोअजक ब्या रूतक दगाड़ हौ। और रूतल परमेश्वरकि दयाल अङ-भारि हबेर एक च्यल कैं जनम दे। 14 तब स्यैणियोंल नामी कैं यौ कैबेर बधाइ दे, "परमेश्वर कतुक भल छु, जैल तुकैं इतु भल सहार दिणी नाति दी रॉखौ! और त्यर नाति यौ देश मिं परसिद्ध हो। 15 यैल तेरि जिन्दगी दुबार हरि-भरि है गे। और यौ ठुल हबेर त्यर बुढ़ापा मिं तेरि देख-भाल करल, किलैकि यकैं तेरि ब्वारि रूतल जनम दी रॉखौ, जो तुकैं भौत भल मानुं और उ तेरि लिजी सात च्यालों है जादे भलि छु!" 16 वीक बाद नामील यौ भौ कैं पकड़िबेर आपणि छाति लै लगा, और वीकि देख-भाल करण लागी। 17 तब नामीक पड़ोसियोंलि यौ कैबेर कि नामीक च्यल हैरौ, भौक नाम "ओबेद" धरौ, जैक अर्थ छु सेवक। और यौ ठुल हबेर ईशैक बौज्यू और दाउदक बुब बणौ, जो इस्रायलक एक परसिद्ध रॉज हौ, जैक वंश मिं यीशु मसीक जनम हौ।