Room 11

Ɛzɩma mbʋ Ɛsɔ tɔlɔ *Izrɛɛlɩ ñɩma yɔ

¹ Pʋ-yɔɔ mɔnpɔzʋʋ se: Ɛsɔ lɔ *Izrɛɛlɩ ñɩma naa we? Pɩtatɩɩkɛʋ mbʋ kpem! Mbʋ pʋyɔɔ yɔ, ma-maɣmaɣ mɛnkɛ Izrɛɛlɩ tʋ. Mɛnkɛ Abraham liɖe taa tʋ, mɛwɛ Bɛnjamɛɛ cejewiye taa. ² Ɛsɔ tɔlɔ ɛ-ñɩma mba ɛɛlɩzɩ ɖooo lɔŋ yɔ. Pɩlakɩ-m ɛzɩ ɩsɩm Ɛsɔtɔm Takayaɣ taa ɖenɖe pamawa se *Elii kpiɖaɣ Izrɛɛlɩ ñɩma yɔɔ Ɛsɔ ɛsɩndaa yɔ. ³ Ekpiɖaɣ nɛ ɛtɔŋ se: “Kɩpaɣlʋ, pakʋ ñɔ-lɔɔyɩsɩ tɩnaa nɛ pɔyɔkɩ ɖenɖe ɖenɖe palaɣ-ŋ yɔ. Men-ɖeke koŋ pɩsɛɣa nɛ pacaɣ se pɛtɛzɩ-m.” ⁴ Ɛlɛ, Ɛsɔ cosi-i se we? Ecosi-i se: “Mansɩ man-tɩ ɛyaa kutokiŋ lʋbɛ, potoluŋ sɩʋ ŋgʋ payaɣ se Baalɩ*fa* yɔ kɩ-tɛɛ.” \fm a \fr (11.4) \fk Baalɩ: \f *Kanaanɩ ñɩma ɛgɔlɩmɩyɛ naɖɩyɛ. Ɖɩɩwɛɛ nɛ pʋcɔ Izrɛɛlɩ ñɩma wolo pɛwɛɛ peeye. Paayebi Ɛsɔ tɛɛ luŋuu alɩwaatʋ natʋyʋ nɛ poluŋ ɖɩ-tɛɛ nɛ ɛlɛ pana kpanɩ-wɛ. ⁵ Mbʋ ɖɔɖɔ pʋwɛ lɛɛlɛɛyɔ alɩwaatʋ tʋnɛ tɩ-taa: Yuda ñɩma hɛkʋ taa lɛ, Ɛsɔ labɩ nabɛyɛ lootiye nɛ ɛlɩzɩ-wɛ nɛ ɛsɩɩ-wɛ ɛ-tɩ. ⁶ E-lootiye yɔɔ ɛlɩzɩ-wɛ, pɩtɛkɛ pa-tʋmɩyɛ yɔɔ ɛlɩzɩ-wɛ. Pɩtɛkɛ mbʋ, Ɛsɔ lootiye ɛɛtasɩɣ kɛʋ lootiye siŋŋ. ⁷ Ɖɩyɔɔdʋʋ se we yɔ? Ɖɩtɔŋ se Izrɛɛlɩ ñɩma tehiɣ mbʋ pañɩnaɣ yɔ. Ɛlɛ, mba Ɛsɔ lɩzɩ pa-taa yɔ, pe-ɖeke pehiɣni-pʋ nɛ pɩsɛɣ pʋtɔ lɛlaa nɩŋgbaaŋ taa se pataanɩɩ. ⁸ Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se:

“Ɛsɔ yeba nɛ pa-ñʋŋ taa kpa ɖoŋ nɛ

ehuuzi pɛ-ɛza yɔɔ se pataana nɛ

ɛtɔ pa-nɩŋgbaaŋ taa se pataanɩɩ nɛ

pɛwɛɛ mbʋ halɩ nɛ sɔnɔ.”

⁹ Daaviidi mawa ɖɔɖɔ se:

“Pɔ-tɔɔnasɩ ɛpɩsɩ kaamʋʋ nɛ piyuu nɛ

pɩkpa-wɛ nɛ pɔtɔlɩ nɛ pɔhɔ pa-nɩŋgbaaŋ.

¹⁰ Pɛ-ɛza ɛyʋlʋmɩ nɛ pataana nɛ

pʋwɛɛ pɩnazɩɣ-wɛ.”

¹¹ Pʋ-yɔɔ mɔnpɔzʋʋ se: pucoɖuu Izrɛɛlɩ ñɩma nɛ pɔtɔlɩ yɔ, pɔtɔlaa se kʋyʋʋ fɛyɩ yaa we? Pɩtɛkɛ mbʋ kpem! Ɛlɛ, pɛ-ɛzaɣtʋ yɔɔ lɛ, mba pɛtɛkɛ Yuda ñɩma yɔ, papɩzaa pehiɣ ñʋʋ yabʋ se Yuda ñɩma ɛsɛzɩ ɛzɩyɛ pɔ-yɔɔ. ¹² Mba pɛtɛkɛ Yuda ñɩma yɔ, Yuda ñɩma ɛzaɣtʋ nɛ pɔ-tɔlʋʋ pɔ-yɔɔ pehiɣ Ɛsɔ ñɩm. Ye pɩkɛ mbʋ lɛ, ɛzɩma pʋwɛɣ alɩwaatʋ ndʋ patɩŋa payɩ papɩsɩɣ ñʋʋ yabʋ nʋmɔʋ taa yɔ?

Mba pɛtɛkɛ Yuda ñɩma yɔ pa-ñʋʋ yabʋ tɔm

¹³ Mba mɩ ɩtɛkɛ Yuda ñɩma yɔ, mɩ mɔyɔɔdʋʋnɩ lɛɛlɛɛyɔ: ma lɛ Krɩstʋ *tiyiyu weyi ɛlakɩ tʋmɩyɛ mba pɛtɛkɛ Yuda ñɩma yɔ pɛ-hɛkʋ taa yɔ. Pʋ-yɔɔ lɛ, mamaɣzɩɣ se man-tʋmɩyɛ wɛ wazaɣ siŋŋ. ¹⁴ Malakɩ mbʋ se pʋtɔmaɣ yɔ, me-liɖe taa ñɩma tɛzɩ wɛʋ ɛzɩsɛmɩyɛ nɛ pɩya pa-taa nabɛyɛ ñʋʋ. ¹⁵ Mbʋ pʋyɔɔ yɔ, Ɛsɔ lɔʋ Yuda ñɩma mba yɔ ɛ nɛ ɛyaa lɛlaa peceɣaa. Ye pɩkɛ mbʋ lɛ, ɛzɩma pʋwɛɣ alɩwaatʋ ndʋ ɛɖaɣnɩɣ-wɛ mʋʋ yɔ? Pʋwɛɣ ɛzɩ ɛyʋ sɩkʋʋ nɛ efe nɛ pʋwɛɣ yɔ.

¹⁶ Ɩtɩlɩ se: ye pafaɣ tindine hɔɔlaɣ kajalaɣ ñɩŋga nɛ paha-kɛ Ɛsɔ yɔ, pɩwɩlɩɣ se ɛnʋ tɩnɩ tindine nɖɩ ɖɩtɩŋa ɖɔɖɔ. Ye pakpaɣ tɩʋ nakʋyʋ lila nɛ paha Ɛsɔ yɔ, ɛnʋ tɩnɩ ki-pilinzi ɖɔɖɔ. ¹⁷ Izrɛɛlɩ ñɩma wɛ ɛzɩ somuu ŋgʋ pɔsɔwa nɛ pɛsɛtɩ ki-pilinzi nasɩyɩ yɔ. Weyi ña ŋtɛkɛ Yuda tʋ yɔ, ŋwɛ ɛzɩ somuu ŋgʋ kʋñɔ tɛyɛ yem yɔ ki-piliŋa. Pɛsɛtɩ-kɛ nɛ pɔsɔ ŋgʋ pɔsɔ kʋsɔʋ yɔ ki-pilinzi nzɩ pɛsɛtaa yɔ si-lone taa: lɛɛlɛɛyɔ, ŋwaɣ ɖɔɖɔ liɖe nɖɩ ɖɩcalɩɣ-kʋ yɔ ɖɩ-yɔɔ. ¹⁸ Pʋ-yɔɔ lɛ, taakpaɣ pilinzi nzɩ pɛsɛtaa yɔ se sɩtɛkɛ pʋyʋ. Ɛbɛ yɔɔ ŋkpazɩɣ ña-tɩ yɔ? Pɩtɛkɛ ñɔ-yɔɔ lila wɛɛ, ɛlɛ, ñɛwɛnɩ lila yɔɔ. ¹⁹ Ŋkaɣ-m heyuu se “Pɛsɛtɩ pilinzi nzɩ se pɔsɔ-m si-lone taa.” ²⁰ Pɩkɛ toovenim. Pɛsɛtɩ-sɩ, mbʋ pʋyɔɔ yɔ, nzɩ lɛ lidaʋ fɛyɩwaa nɛ ña ñɛwɛɛ lone nɖɩ pɔsɔ-ŋ ɖɩ-taa yɔ ñe-lidaʋ wɛnaʋ yɔɔ. Taakpazɩ ña-tɩ, ɛlɛ, sɔɔndʋ ɛkpa-ŋ. ²¹ Mbʋ pʋyɔɔ yɔ, ye Ɛsɔ ɛtɛfɛɛ Yuda ñɩma mba pɛwɛ ɛzɩ kajalaɣ pilinzi yɔ yɔ, ɛɛfɛɣ ña ɖɔɖɔ. ²² Cɔnɩ ŋna Ɛsɔ camɩyɛ lakasɩ nɛ ɛzɩma mbʋ ɛhʋʋnɩ ɛyaa nɛ ɛhɔŋ pa-nɩŋgbaaŋ ɖɔɖɔ yɔ: ɛhʋʋnɩ mba palabɩ kɩwɛɛkɩm yɔ nɛ ɛlakɩ ña ɖeu. Ɛlɛ, pʋwɛɛ se ŋwɛɛ Ɛsɔ camɩyɛ lakasɩ nʋmɔʋ taa. Pɩtɛkɛ mbʋ, ɛsɛtɩɣ-ŋ ɖɔɖɔ ɛzɩ pɛsɛtʋʋ piliŋa yɔ. ²³ Ye Yuda ñɩma eyebi pa-kaañamtʋ nɛ paɖaɣnɩ wɛnaʋ lidaʋ yɔ, Ɛsɔ pɩsɩɣnɩ-wɛ ɖenɖe paawɛɛ yɔ. Mbʋ pʋyɔɔ yɔ, ɛwɛnɩ ɖoŋ se ɛɖaɣnɩ-wɛ sɔʋ. ²⁴ Pʋ-yɔɔ lɛ, weyi ña ŋtɛkɛ Yuda tʋ yɔ, ŋwɛ ɛzɩ somuu ŋgʋ kʋñɔ tɛyɛ yem yɔ ki-piliŋa maɣmaɣ: pɛsɛtɩ-kɛ nɛ pɔsɔ-kɛ ŋgʋ pɔsɔ kʋsɔʋ yɔ kʋ-yɔɔ. Ŋgʋ, ŋtɛkɛ kʋkʋ piliŋa. Ye Ɛsɔ ɛpɩzɩɣ ɛla mbʋ lɛ, ɛzɩma ɛɛpɩzɩɣ ɛpɩsɩnɩ Yuda ñɩma mba pɛwɛ ɛzɩ somuu ŋgʋ pɔsɔ kʋkʋ kʋsɔʋ yɔ ki-pilinzi maɣmaɣ nɛ ɛpɩsɩnɩ ɛsɔ si-lona taa?

Izrɛɛlɩ ñɩma ɖaɣnʋʋ pɩsʋʋ Ɛsɔ cɔlɔ yɔ

²⁵ Man-taabalaa, mancaɣ se mawɩlɩ-mɩ mbʋ pɩɩwɛ mɛsaɣ tɛɛ yɔ nɛ ɩtaakpaɣ mɩ-tɩ se ɩkɛ lɔŋsɩnɖaa: Izrɛɛlɩ ñɩma lɛlaa tamaa, paapɩzɩɣ panɩɩ. Ɛlɛ, pɛwɛɣ mbʋ nɛ pʋkɔɔ pɩsɩnɩ alɩwaatʋ ndʋ mba Ɛsɔ lɩzɩ mba pɛtɛkɛ Yuda ñɩma yɔ pa-taa yɔ patɩŋa payɩ pehiɣ ñʋʋ yabʋ yɔ. ²⁶ Peeye Ɛsɔ kɔŋ yabʋ Izrɛɛlɩ ñɩma tɩŋa ñʋʋ ɛzɩ pamaʋ Ɛsɔtɔm Takayaɣ taa yɔ. Pamawa se:

“Ñʋʋ yaɖʋ kaɣ lɩnaʋ Siiyɔɔ,

ɛlakɩ nɛ Yakɔɔbʋ liɖe taa ñɩma yele pa-kaañamtʋ.

²⁷ Mbʋ lɛ *nɔɔ haʋ mbʋ meyeki nɛ pʋwɛɛ ma nɛ wɛ ɖɛ-hɛkʋ taa

alɩwaatʋ ndʋ menkpeɣiɣ-wɛ pa-kɩwɛɛkɩm yɔ.”

²⁸ Ye ɛyʋ ɛkpaɣ ɛzɩma mbʋ Yuda ñɩma kizi Laŋhɛzɩyɛ Tɔm yɔ yɔ, pɩwɩlɩɣ se pɛkɛ Ɛsɔ koyindinaa. Pɩlabɩ mbʋ se pʋwazɩ-mɩ. Ɛlɛ, ye ɛyʋ ɛkpaɣ ɛzɩma mbʋ Ɛsɔ lɩzɩ-wɛ yɔ yɔ, pɩwɩlɩɣ se pɛkɛ mba Ɛsɔ sɔɔlɩ-wɛ mbʋ ɛɛɖʋwa se ɛlakɩ pɔ-cɔzɔnaa yɔ pʋ-yɔɔ. ²⁹ Mbʋ pʋyɔɔ yɔ, Ɛsɔ ɛɛmʋʋ mbʋ ɛhawa yɔ kaʋ. Ɛɛlɛɣzɩɣ ɖɔɖɔ lɩmaɣza mba ɛya-wɛ yɔ pɔ-tɔm taa. ³⁰ Toovenim lɛ, ɩtaña Ɛsɔ ɖooo lɔŋ. Ɛlɛ, lɛɛlɛɛyɔ pɩtɩŋnɩ pa-kaañamtʋ yɔɔ nɛ Ɛsɔ na mɩ-pʋtɔdɩyɛ. ³¹ Mbʋ ɖɔɖɔ lɛɛlɛɛyɔ patañam-ɩ nɛ ɛna mɩ mɩ-pʋtɔdɩyɛ. Ɖɩ-yɔɔ pɩtɩŋɩɣna nɛ ɛpɩzɩ ɛna pa-pʋtɔdɩyɛ ɖɔɖɔ. ³² Mbʋ pʋyɔɔ yɔ, Ɛsɔ yeba nɛ ɛyaa tɩŋa wɛɛ ɛzɩ yomaa yɔ pa-kaañamtʋ yɔɔ se ɛna patɩŋa payɩ pa-pʋtɔdɩyɛ.

Pɔɔlɩ saŋʋʋ Ɛsɔ yɔ

³³ Ɛsɔ camɩyɛ lakasɩ ɖɔwa siŋŋ! Ɛ-lɔŋsɩnɖɛ nɛ ɛ-lɛɣtʋ pɛfɛyɩ kamaɣ! Apɩzɩɣ ɛlɩzɩ mbʋ Ɛsɔ ɖʋ ɛ-taa yɔ pʋ-tɔbʋʋ? Apɩzɩɣ ɛnɩɩ mbʋ ɛlakɩ yɔ pʋ-tɔbʋʋ? ³⁴ Pama Ɛsɔtɔm Takayaɣ taa se:

“Asɩm Ɛsɔ lɩmaɣza?

Apɩzɩɣ ɛkɛ ɛ-tɔm tasɩyʋ?

³⁵ Apɩzaa ɛcalɩ-ɩ haʋ pʋyʋ nɛ

pʋwɛɛ se ɛhɛyɩ pʋdʋ pʋ-yɔɔ?”

³⁶ Mbʋ pʋyɔɔ yɔ, ɛ-cɔlɔ pɩtɩŋa pɩlɩɣna. Ɛnʋ yebina pɩtɩŋa pʋwɛɛ se pɩkɛ ɛ-ñɩm. Ɛsɔ hɩɖɛ ɛsɛɛ paa ɖooye! Pɩla mbʋ!