TAKAYAƔ KAJALAƔ ÑƖŊGA ŊGA PƆƆLƖ MA
KƆRƐNTƖ ÑƖMA
YƆ
Sɛtʋ
1
1-2 Ma Pɔɔlɩ lɛ, pɩkɛdɩnɩ Ɛsɔ nɛ ɛya-m se mɛnkɛ Krɩstʋ Yesu *tiyiyu. Ma nɛ taabalʋ Sɔstɛɛnɩ ɖɩmaɣnɩ-mɩ takayaɣ kanɛ. Ɖɩmaɣ-kɛ mba mɩ ɩkɛ Ɛsɔ ɛgbɛyɛ taa ñɩma Kɔrɛntɩ yɔ. Ɛya-mɩ se pɩtɩŋnɩ Krɩstʋ yɔɔ nɛ ɩcaɣ wezuu ɛzɩ pɩkɛdɩnaʋ-ɩ yɔ. Pɩtɩŋnɩ mɩ nɛ Krɩstʋ Yesu mɩ-kpɛndʋʋ yɔɔ nɛ ɩkɛ ɛ-ñɩma. Ɖɩmaɣ-kɛ mɩ nɛ mba patɩŋa payɩ pɛwɛ paa le nɛ payaɣ ɖa-Kɩpaɣlʋ Yesu Krɩstʋ hɩɖɛ yɔ. Yesu Krɩstʋ lɛ pa-Kɩpaɣlʋ. Ɛnʋ ɖɔɖɔ lɛ ɖa-Kɩpaɣlʋ. 3 Ɖɩsɛ-mɩ: ɖa-Caa Ɛsɔ nɛ ɖa-Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa.
Krɩstʋ wazʋʋ Kɔrɛntɩ ñɩma yɔɔ yɔ
4 Mansaŋ Ɛsɔ mɩ-tɔm taa alɩwaatʋ kpeekpe. Mbʋ pʋyɔɔ yɔ, ɛlabɩ-mɩ lootiye mɩ nɛ Krɩstʋ Yesu mɩ-kpɛndʋʋ taa. 5 Toovenim lɛ, mɩ-kpɛndʋʋ mbʋ pʋ-yɔɔ ɩpɩsɩ ñɩm tɩnaa, Ɛsɔ ha-mɩ pɩtɩŋa payɩ. Kɔzɩkɔzɩ eyebu nɛ ɩtɩlɩ toovenim nɛ isusuu ɛ-tɔm yɔ. 6 Mbʋ pʋyɔɔ yɔ, Krɩstʋ tɔm ndʋ ɖisusi-mɩ yɔ, tɩcaɣ mɩ-taa camɩyɛ. 7 Pʋ-yɔɔ mba mɩ ɩɖaŋ alɩwaatʋ ndʋ ɖa-Kɩpaɣlʋ Yesu Krɩstʋ kaɣ ɛ-tɩ lɩzʋʋ nɛ ɛwɩlɩ ɛyaa yɔ, pɩtɛsɛɣ kʋjɔʋ nakʋyʋ se Ɛsɔ talabɩ-mɩ. 8 Ɛsɔ ɛnʋ ɛhaɣnɩ-mɩ ɖoŋ nɛ ɩɖɔkɩ mɩ-tɩ mbʋ ɛ-nʋmɔʋ taa nɛ pʋkɔɔ pɩsɩnɩ kɛtɛzaɣ wiye se pataana kɩdɛkɛdɩm nabʋyʋ mɩ-yɔɔ puwiye nɖɩ ɖa-Kɩpaɣlʋ Yesu Krɩstʋ kɔŋ yɔ. 9 Ɛsɔ weyi ɛya-mɩ se mɩ nɛ ɛ-Pɩyalʋ Yesu Krɩstʋ weyi ɛkɛ ɖa-Kɩpaɣlʋ yɔ ɩkpɛndɩ ɩla nɔɔ kʋɖʋmaɣ yɔ, ɛlakɩ mbʋ ɛɖʋwa se ɛlakɩ yɔ.
Kɔrɛntɩ Yesu ɛgbɛyɛ taa ñɩma tayʋʋ ɖama yɔ
10 Taabalaa Yesu ɛgbɛyɛ taa ñɩma, meheyiɣ mɩtɩŋa payɩ nɛ ɖa-Kɩpaɣlʋ Yesu Krɩstʋ nɔɔ se ɩnɩnɩ ɖama camɩyɛ. Tayʋʋ nabʋyʋ ɛtaawɛɛ mɩ-hɛkʋ taa. Ɛlɛ, ɩla nɔɔ kʋɖʋmaɣ nɛ ɩwɛnɩ lɩmaɣza kʋɖʋma. 11 Mbʋ pʋyɔɔ yɔ, Klowee tɛ ñɩma heyi-m se iyou. 12 Ndʋ mɔyɔɔdʋʋ yɔ, tɩ-tɔbʋʋ se mɩ-taa nabɛyɛ wɛɛ pɔyɔɔdʋʋ se pɛkɛ Pɔɔlɩ ñɩma nɛ lɛlaa se paba kɛ Apoloosi ñɩma. Lɛlaa ñɔtɔŋ ɖɔɖɔ se paba ñɛkɛ Pɩyɛ ñɩma nɛ lɛlaa se pɛkɛ Krɩstʋ ñɩma. 13 Krɩstʋ ɛnʋ patayɩ-ɩ yaa we? Ma Pɔɔlɩ pakam *kaamaŋkaɣ yɔɔ mɩ-yɔɔ yaa mɔ-nɔɔ palabɩnɩ-mɩ *lɩm sɔʋ sɔnzɩ?
14 Mansaŋ Ɛsɔ ɛzɩma mbʋ mantala mɩ-taa nɔɔyʋ *lɩm sɔʋ sɔnzɩ nɛ pɩtasɩnɩ Krispuusi nɛ Gayuusi yɔ pʋ-yɔɔ. 15 Pʋ-yɔɔ lɛ, nɔɔyʋ ɛɛpɩzɩɣ ɛyɔɔdɩ se mɔ-nɔɔ palabɩnɩ-mɩ-sɩ. 16 Ahaɣaɣ, maasɔwa! Malabɩ-sɩ ɖɔɖɔ Stefanaasɩ nɛ ɛ-hɔʋ taa ñɩma. Pa-wayɩ lɛ, mantatasɩ tɔzʋʋ se malabɩ-sɩ nɔɔyʋ ɖɔɖɔ. 17 Krɩstʋ tetiyi-m se mɔnkɔɔ mala ɛyaa *lɩm sɔʋ sɔnzɩ. Ɛlɛ, etiyi-m se monsusi Laŋhɛzɩyɛ Tɔm. Maasusuu-tʋ ɛyaa ɛzɩ weyi ɛyɔɔdʋʋnɩ ɛ-maɣmaɣ ɛ-lɔŋsɩnɖɛ camɩyɛ yɔ. Pɩtɛkɛ mbʋ, sɩm mbʋ Krɩstʋ sɩbɩ *kaamaŋkaɣ yɔɔ yɔ, pɩɩtasɩɣ wɛnaʋ wazaɣ nakɛyɛ.
Kedeŋa yɔɔ lɔŋsɩnɖɛ nɛ Ɛsɔ ñɩnɖɛ pɔ-tɔm
18 Tɔm ndʋ posusuu se Krɩstʋ sɩbɩ *kaamaŋkaɣ yɔɔ yɔ, mba pɛwɛ asayʋʋ nʋmɔʋ taa yɔ, panɩɣ-tʋ lɛ, tɩwɛ-wɛ ɛzɩ kɩmɛlɛndʋ tɔm yɔ. Ɛlɛ, mba ɖa payakɩ ɖa-ñʋʋ yɔ, tɩkɛnɩ-ɖʋ Ɛsɔ ɖoŋ. 19 Pama Ɛsɔtɔm Takayaɣ taa se:
“Menɖeziɣ mba pamaɣzɩɣ se pɛwɛnɩ lɔŋsɩnɖɛ yɔ pɔ-lɔŋsɩnɖɛ nɛ
mamʋʋzɩ mba pamaɣzɩɣ se pɛwɛnɩ lɛɣtʋ yɔ pɛ-lɛɣtʋ.”
20 Ye mbʋ, weyi ɛmaɣzɩɣ se ɛkɛ lɔŋsɩnɖʋ yɔ, ɛwazɩɣ we? Paɣtʋ wɩlɩyʋ wazɩɣ we? Kandaa ɛyaa mba pamaɣzɩɣ se pasɩm tɔm yɔɔdʋʋ camɩyɛ yɔ, pawazɩɣ we? Paawazɩɣ pʋyʋ, mbʋ pʋyɔɔ yɔ, Ɛsɔ wɩlaa se kedeŋa ñɩma lɔŋsɩnɖɛ kɛ kɩmɛlɛndʋ.
21 Toovenim lɛ, kedeŋa ñɩma nɛ pɔ-lɔŋsɩnɖɛ patapɩzɩ patɩlɩ Ɛsɔ. Mbʋ pʋyɔɔ yɔ, ɛnʋ sɔɔlɩnɩ mbʋ ɛ-lɔŋsɩnɖɛ taa. Ɛlɛ, ɛɖʋwa se ɛyakɩ mba pɛwɛnɩ lidaʋ tɔm ndʋ ɖisusuu-wɛ yɔ tɩ-yɔɔ yɔ pa-ñʋʋ. Ŋgʋ, tɔm ndʋ tɩwɛ lɛlaa ɛzɩ kɩmɛlɛndʋ tɔm yɔ. 22 Yuda ñɩma pɔzʋʋ se pala hama lakasɩ nɛ pana nɛ pʋcɔ petisi, Grɛɛkɩ ñɩma ñañɩnɩɣ lɔŋsɩnɖɛ se pʋcɔ. 23 Piyele ɖa lɛ, ɖisusuu Krɩstʋ weyi pakam-ɩ *kaamaŋkaɣ yɔɔ yɔ ɛ-tɔm. Tɔm ndʋ, tɩkɛnɩ Yuda ñɩma mbʋ putuuluu-wɛ yɔ nɛ tɩkɛnɩ mba pɛtɛkɛ Yuda ñɩma yɔ ɛzɩ kɩmɛlɛndʋ tɔm yɔ. 24 Ɛlɛ, mba Ɛsɔ yawa yɔ, paa pɛkɛ Yuda ñɩma yaa pɛtɛkɛ Yuda ñɩma yɔ, Krɩstʋ ɛnʋ, ɛkɛnɩ-wɛ Ɛsɔ ɖoŋ nɛ Ɛsɔ lɔŋsɩnɖɛ. 25 Mbʋ pʋyɔɔ yɔ, Ɛsɔ lɩmaɣza wena ɛyaa kpakɩɣ se akɛ kɩmɛlɛndʋ yɔ, akɩlɩ ɛyaa lɔŋsɩnɖɛ. Ɛ-lakasɩ nzɩ ɛyaa kpakɩɣ ɖɔɖɔ se sɩwɛ ɛjandʋ yɔ, sɩkɩlɩ ɛyaa ɖoŋ.
26 Taabalaa, ɩcɔnɩ ɩna mbʋ ɩɩkɛwa nɛ pʋcɔ Ɛsɔ yaa-mɩ yɔ. Mba ɛyaa kpakaɣ se lɔŋsɩnɖaa yaa ɖoŋ tɩnaa yaa sɔsaa yɔ, pataaɖɔɔ mɩ-taa. 27 Ɛlɛ, Ɛsɔ lɩzɩ mba ɛyaa kpakɩɣ se kɩmɛlɛmɩŋ yɔ nɛ ɛɖʋnɩ lɔŋsɩnɖaa fɛyɛ. Ɛlɩzɩ ɖɔɖɔ mbʋ pʋwɛ ɛjandʋ kedeŋa yɔɔ yɔ nɛ ɛɖʋnɩ mbʋ pʋwɛ ɖoŋ yɔ fɛyɛ. 28 Ɛnʋ lɩzɩnɩ ɖɔɖɔ mba pɛfɛyɩ wazaɣ nakɛyɛ kedeŋa yɔɔ cɩnɛ nɛ ɛyaa takpaɣ-wɛ payaa pʋyʋ nɛ pɛfɛyɩ natʋyʋ taa kpem yɔ. Ɛlɩzɩ-wɛ se papɩsɩ mba pɛkɛ sɔsaa yɔ mba paawazɩɣ pʋyʋ kpem yɔ. 29 Ɛlabɩ mbʋ se nɔɔyʋ ɛtaapɩzɩ ɛtasɩ ɛ-tɩ kpazʋʋ Ɛsɔ ɛsɩndaa. 30 Ŋgʋ, Ɛsɔ kpɛndɩ mɩ nɛ Krɩstʋ Yesu. Ɛsɔ ɛnʋ eyebina se ɛkɛ ɖɔ-lɔŋsɩnɖɛ. Ɛ-yɔɔ Ɛsɔ tɩŋnaa nɛ ɛpɩsɩ-ɖʋ kʋtʋʋzaa nɛ ɖɩpɩsɩ ɛ-ñɩma nɛ ɛya ɖa-ñʋʋ. 31 Ɛlabɩ mbʋ se pɩla ɛzɩ pamaʋ Ɛsɔtɔm Takayaɣ taa se: “Ye nɔɔyʋ liu ɛwɛɛ se ɛkʋndʋʋ yɔ, ɛkʋndɩnɩ mbʋ Kɩpaɣlʋ laba yɔ.”