Pɔɔlɩ sɛɣʋ ɛyaa yɔ
16
1 Meheyiɣ-mɩ se ɖa-taabalʋ halʋ ñɩnʋ Foobee kɛ ɛyʋ siŋŋ. Ɛlakɩ tʋmɩyɛ Sankree Yesu ɛgbɛyɛ taa. 2 Ɩmʋ-ɩ Kɩpaɣlʋ yɔɔ ɛzɩ pʋmʋnaʋ se Ɛsɔ ñɩma ɛmʋ ɖama yɔ nɛ ɩsɩnɩ-ɩ mbʋ pɩtɩŋa payɩ e-liu wɛɛ se ɩsɩnɩ-ɩ yɔ pɩ-taa. Mbʋ pʋyɔɔ yɔ, ɛ-maɣmaɣ ɛsɩnɩ ɛyaa sakɩyɛ, ɛsɩnɩ ma-maɣmaɣ ɖɔɖɔ. 3 Ɩsɛɛ Prisiili nɛ Akilaasɩ mba ma nɛ wɛ ɖɩlakɩ Krɩstʋ Yesu tʋmɩyɛ yɔ. 4 Mba coɖini sɩm nɛ paya ma-ñʋʋ. Pɩtɛkɛ men-ɖeke mɛnsɛɣnɩ-wɛ, Yesu agbaa wena awɛ mba pɛtɛkɛ Yuda ñɩma yɔ pɛ-tɛ yɔ, atɩŋa a-taa ñɩma sɛɣ-wɛ ɖɔɖɔ. 5 Ɩsɛɛ ɖɔɖɔ Yesu ɛgbɛyɛ taa ñɩma mba pekpeɣliɣ Prisiili nɛ Akilaasɩ mba pɛ-tɛ yɔ. Ɩsɛɛ man-taabalʋ kʋsɔɔlʋ Epayɩnɛɛtɩ. Ɛnʋ calɩnɩ wɛnaʋ lidaʋ Krɩstʋ yɔɔ Aazii hɔɔlʋʋ taa. 6 Ɩsɛɛ *Maarɩɩ weyi ɛlabɩ-mɩ tʋmɩyɛ siŋŋ yɔ. 7 Ɩsɛɛ Andronikuusi nɛ Yuuniyaasɩ mba pɛkɛ Yuda ñɩma ɖɔɖɔ ɛzɩ ma yɔ. Ma nɛ wɛ paaɖʋ salaka. Pɛkɛ Krɩstʋ *tiyiyaa mba ɛyaa sɩm-wɛ siŋŋ yɔ. Pɛkɛ Krɩstʋ ñɩma nɛ pʋcɔ pɩtalɩnɩ-m.
8 Ɩsɛɛ Ampliyaatuusi weyi pɩtɩŋnɩ Kɩpaɣlʋ yɔɔ nɛ ɛkɛ man-taabalʋ kʋsɔɔlʋ yɔ. 9 Ɩsɛɛ ɖa-taabalʋ Urbɛɛnɩ weyi ɖa nɛ ɩ ɖɩlakɩ Krɩstʋ tʋmɩyɛ yɔ nɛ man-taabalʋ kʋsɔɔlʋ Staacɩɩ. 10 Ɩsɛɛ Apelɛɛsɩ weyi pɩtɩŋnɩ takʋʋ yɔɔ nɛ ɛwɩlɩ se ɛwɛnɩ lidaʋ Krɩstʋ yɔɔ siŋŋ yɔ. Ɩsɛɛ ɖɔɖɔ Aristoobuuli hɔʋ taa ñɩma. 11 Ɩsɛɛ Eroodiyɔɔ weyi ɛkɛ Yuda tʋ ɖɔɖɔ ɛzɩ ma yɔ nɛ Narsiisi hɔʋ taa ñɩma mba pɛkɛ Kɩpaɣlʋ ñɩma yɔ. 12 Ɩsɛɛ Triifɛɛnɩ nɛ Triifoozi. Pɛkɛ halaa mba palakɩ Kɩpaɣlʋ tʋmɩyɛ yɔ. Ɩsɛɛ man-taabalʋ kʋsɔɔlʋ halʋ ñɩnʋ Pɛɛrzidii weyi ɛlabɩ Kɩpaɣlʋ tʋmɩyɛ siŋŋ yɔ. 13 Ɩsɛɛ ɖɔɖɔ Ruufuusi weyi ɛkɛ ɛyʋ kɩbanʋ Kɩpaɣlʋ nʋmɔʋ taa yɔ nɛ e-ɖoo weyi mayaɣ ɖɔɖɔ se mon-ɖoo yɔ. 14 Ɩsɛɛ Asiŋkriiti nɛ Fleegɔɔ nɛ Ɛrmɛɛsɩ nɛ Patroobaasɩ nɛ Ɛrmaasɩ nɛ taabalaa mba pa nɛ wɛ pɛwɛɛ yɔ. 15 Ɩsɛɛ Filoloogi nɛ Yuuli nɛ Neeree nɛ ɛ-kɔɔ nɛ Olɛmpaasɩ nɛ Ɛsɔ ñɩma lɛlaa mba pa nɛ wɛ pɛwɛɛ yɔ patɩŋa payɩ. 16 Ɩsɛɛ ɖama camɩyɛ ɛzɩ pʋmʋnaʋ se Yesu ɛgbɛyɛ taa ñɩma ɛsɛɛ ɖama yɔ. Yesu agbaa tɩŋa taa ñɩma sɛ-mɩ.
Kɛtɛzaɣ tɔm
17 Man-taabalaa, meheyiɣ-mɩ se ɩkpa mɩ-tɩ nɛ mba paatisiɣ tɔm ndʋ pawɩlɩ-mɩ yɔ nɛ pawɩlɩɣ-mɩ ndʋ tɩwɛnɩ ndɩ yɔ. Mba cɛyɩɣnɩ Ɛsɔ ñɩma pe-lidaʋ wɛnaʋ taa nɛ patayɩɣ-wɛ. Ɩtaañɔtɩnɩ-wɛ. 18 Mbʋ pʋyɔɔ yɔ, pɩtɛ ɛyaa mba, paalakɩ ɖa-Kɩpaɣlʋ Krɩstʋ tʋmɩyɛ. Ɛlɛ, pe-hiliŋ taa ɖeke pɔcɔŋna nɛ palakɩ nɔɔ leleŋ nɛ pɛcɛtɩɣnɩ mba patasɩmdɩ pʋyʋ yɔ. 19 Mɩ lɛ, ɛyaa tɩŋa na ɛzɩma mbʋ ɩñaŋ Kɩpaɣlʋ yɔ. Pʋ-yɔɔ man-taa hʋlʋmɩnɩ-mɩ. Ɛlɛ, me-liu wɛɛ se ɩkɛ lɔŋsɩnɖaa nɛ ɩla mbʋ pʋwɛ ɖeu yɔ nɛ ikoli mbʋ pɩfɛyɩ ɖeu yɔ. 20 Ŋgʋ, Ɛsɔ weyi ɛhɛzɩɣ ɛyaa laŋa yɔ, ɛkɔŋ Satanɩ nuutuu alɩwaatʋ pazɩ taa nɛ efiɣni nɛ eluzi-i mɩ-tɛɛ. Ɖa-Kɩpaɣlʋ Yesu ɛlabɩ-mɩ lootiye. 21 Man-taabalʋ Timootee weyi ma nɛ ɩ ɖɩlakɩ tʋmɩyɛ yɔ nɛ Lusiyuusi nɛ Yaasɔɔ nɛ Soziipatɛɛrɩ mba pɛkɛ ɖɔɖɔ Yuda ñɩma ɛzɩ ma yɔ, pɛsɛ-mɩ. 22 Ma Tɛrtiyuusi weyi Pɔɔlɩ heyi-m nɛ mama takayaɣ kanɛ nɛ ɛ-nɔɔ yɔ, mɛnsɛɣ-mɩ ɖa nɛ Kɩpaɣlʋ ɖɛ-kpɛndʋʋ taa. 23 Gayuusi weyi ɛmʋ-m ɛ-tɛ yɔ, ɛsɛ-mɩ. Ɛ-tɛ Yesu ɛgbɛyɛ taa ñɩma tɩŋa woki pekpeɣliɣ. Eraastɩ weyi ɛkɛ tɛtʋ taa liidiye ɖɔkɩyʋ yɔ nɛ ɖa-taabalʋ Kaartuusi pɛsɛ-mɩ ɖɔɖɔ. [\v 24 Ɖa-Kɩpaɣlʋ Yesu Krɩstʋ ɛla mɩtɩŋa payɩ lootiye. Pɩla mbʋ!]
Kɛtɛzaɣ samtʋ
25 Ɖɩsa Ɛsɔ, mbʋ pʋyɔɔ yɔ, ɛpɩzɩɣ ɛha-mɩ ɖoŋ nɛ ɩɖɔkɩ mɩ-tɩ ɛ-nʋmɔʋ taa. Pʋwɛ ɛzɩ paɖʋʋ Laŋhɛzɩyɛ Tɔm ndʋ monsusuu nɛ mɛnkɛdɩɣ ɛyaa Yesu Krɩstʋ tɔm yɔ tɩ-taa yɔ. Tɩ-taa ɛwɩlɩ-ɖʋ mbʋ pɩɩwɛ mɛsaɣ tɛɛ nɛ ɛtaawɩlɩ-pʋ ɛyaa ɖooo ɛzɩ ɛlabʋ kedeŋa yɔ. 26 Lɛɛlɛɛyɔ pɩtɩŋnɩ tɔm ndʋ lɔɔyɩsɩ tɩnaa mawa yɔ tɩ-yɔɔ nɛ pukuli tɩ-yɔɔ nɛ kedeŋa yɔɔ ɛyaa kpeekpe tɩlɩ-tʋ ɛzɩ ɛnʋ Ɛsɔ weyi ɛwɛ tam yɔɔ yɔ ɛɖʋʋ yɔ. Pɩlabɩ mbʋ se pɛwɛnɩ lidaʋ Ɛsɔ yɔɔ nɛ pañam-ɩ. 27 Ɛsɔ weyi e-ɖeke koŋ ɛkɛ lɔŋsɩnɖʋ yɔ, ɖɩsam-ɩ tam yɔɔ. Pɩtɩŋnɩ Yesu Krɩstʋ yɔɔ nɛ ɖɩsam-ɩ. Pɩla mbʋ!