Pɔɔlɩ susuu se pakam Krɩstʋ *kaamaŋkaɣ yɔɔ yɔ
2
1 Taabalaa, alɩwaatʋ ndʋ mɔnkɔm mɩ-tɛ se meheyi-mɩ Ɛsɔ tɔm ndʋ tɩwɛ mɛsaɣ tɛɛ yɔ, pɩtɛkɛ tɔm sɔsɔtʋ natʋyʋ yaa lɔŋsɩnɖɛ sɔsɔɖɛ naɖɩyɛ meheyini-mɩ-tʋ. 2 Mbʋ pʋyɔɔ yɔ, pʋcɔ mɔnkɔɔ mɩ-tɛ lɛ, manɖʋwa se alɩwaatʋ ndʋ mɛwɛɣ mɩ-tɛ yɔ, maaheyiɣ-mɩ natʋyʋ nɛ pɩtasɩnɩ Yesu Krɩstʋ tɔm. Kɔzɩkɔzɩ sɩm mbʋ ɛsɩbɩ *kaamaŋkaɣ yɔɔ yɔ pʋ-tɔm. 3 Man-tɩ tɩŋa maawɛʋ mɩ-cɔlɔ yɔ, mɛwɛ ɛjandʋ taa nɛ sɔɔndʋ kpaɣ-m pɩtɩɩfɛyɩ nɛ menseliɣ. 4 Monsusaɣ-mɩ Ɛsɔtɔm lɛ, pɩtɛkɛ ɛyaa lɔŋsɩnɖɛ monsusaɣnɩ-mɩ-tʋ se mawabɩnɩ-mɩ. Ɛlɛ, Ɛsɔ Kalɩzaɣ ɖoŋ wɩlɩnɩ-mɩ se tɔm ndʋ monsusuu yɔ, tɩkɛ toovenim. 5 Mbʋ yebina nɛ ɩwɛnɩ lidaʋ Ɛsɔ ɖoŋ yɔɔ. Ɛlɛ, pɩtɛkɛ ɛyaa lɔŋsɩnɖɛ yɔɔ pɩtɩŋnaa.
Ɛsɔ lɔŋsɩnɖɛ tɔm
6 Ŋgʋ, lɔŋsɩnɖɛ tɔm ɖisusuu ɛyaa mba papɩ Ɛsɔ nʋmɔʋ taa siŋŋ yɔ. Ɛlɛ, pɩtɛkɛ kedeŋa ñɩma lɔŋsɩnɖɛ yaa kedeŋa awiya mba pɔkɔŋ labʋ asayʋʋ yɔ pa-ñɩnɖɛ. 7 Ɛsɔ lɔŋsɩnɖɛ nɖɩ ɖɩɩwɛ ɛyaa mɛsaɣ tɛɛ yɔ, ɖɩ-tɔm ɖisusuu. Tɩ-taa wɛ cukaŋ. Pʋcɔ Ɛsɔ la kedeŋa lɛ, ɛɛɖʋwa se pɩtɩŋnɩ ɖɩ-yɔɔ nɛ ɖɩwɛɛ e-koboyaɣ taa. 8 Kedeŋa awiya taa nɔɔyʋ tasɩ lɔŋsɩnɖɛ nɖɩ. Mbʋ pʋyɔɔ yɔ, ye paasɩm-ɖɩ yɔ, pataaka Kɩpaɣlʋ weyi ɛtɩnɩ koboyaɣ yɔ *kaamaŋkaɣ yɔɔ. 9 Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se:
“Mbʋ ɛyʋ tana wiɖiyi kaʋ yaa ɛtanɩɩ yɔ,
mbʋ ɛyʋ tamaɣzɩ pʋ-yɔɔ wiɖiyi kaʋ yɔ,
mbʋ Ɛsɔ ñɔɔzaa nɛ ɛsɩɩ mba pɔsɔɔlɩ-ɩ yɔ.”
10 Ɖa Ɛsɔ tɩŋnɩ ɛ-Kalɩzaɣ yɔɔ nɛ ɛwɩlɩ-pʋ. Mbʋ pʋyɔɔ yɔ, kañɩnɩɣ se kana pɩtɩŋa payɩ, halɩ pɩkpɛndɩnɩ mbʋ pʋwɛ ɖooo ɛ-taa yɔ. 11 Ɛyʋ ɛɛpɩzɩɣ ɛtɩlɩ mbʋ pʋwɛ lɛlʋ taa yɔ. Ɛlɛ, paa weyi ɛ-maɣmaɣ ɛ-kalɩzaɣ tɩlɩɣnɩ mbʋ pʋwɛ ɛ-taa yɔ. Mbʋ ɖɔɖɔ mbʋ pʋwɛ Ɛsɔ taa yɔ, nɔɔyʋ ɛɛpɩzɩɣ ɛtɩlɩ-pʋ nɛ pɩtasɩnɩ Ɛsɔ ɛnʋ ɛ-maɣmaɣ ɛ-Kalɩzaɣ.
12 Ŋgʋ ɖa lɛ, pɩtɛkɛ kedeŋa kalɩzaɣ paha-ɖʋ. Ɛlɛ, Ɛsɔ hanɩ-ɖʋ ɛ-Kalɩzaɣ se ɖɩpɩzɩ ɖɩtɩlɩ ɛ-ñɩm mbʋ paha-ɖʋ falaa yɔ. 13 Ɖɩɩyɔɔdʋʋ pʋ-tɔm nɛ tɔm ndʋ kedeŋa lɔŋsɩnɖaa wɩlɩɣ yɔ. Ɛlɛ, ndʋ Ɛsɔ Kalɩzaɣ wɩlɩɣ yɔ ɖɩyɔɔdʋʋna. Pʋ-yɔɔ ɖɩlɩzɩɣ kɔ-tɔm ndʋ tɩ-tɔbʋʋ mba Ɛsɔ ha-wɛ-kɛ yɔ. 14 Ɛlɛ, mba ɛtaha-wɛ-kɛ yɔ, paapɩzɩɣ petisi toovenim tɔm ndʋ keheyiɣ ɛyaa yɔ. Pamaɣzɩɣ se tɩkɛ kɩmɛlɛndʋ tɔm. Paapɩzɩɣ panɩɩ-tʋ. Mbʋ pʋyɔɔ yɔ, mba Ɛsɔ ha-wɛ ɛ-Kalɩzaɣ yɔ pe-ɖeke papɩzɩɣna panɩɩ tɩ-tɔbʋʋ. 15 Mba ɛha-wɛ-kɛ yɔ, papɩzɩɣ patɩlɩ mbʋ pʋwɛ ɖeu yaa mbʋ pɩfɛyɩ ɖeu yɔ. Nɔɔyʋ ɛɛpɩzɩɣ ɛkpɛzɩnɩ-wɛ. 16 Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se:
“Asɩm Kɩpaɣlʋ lɩmaɣza?
Apɩzɩɣ ɛtasɩ-ɩ tɔm?”
Ŋgʋ ɖa yɔ, ɖɩmaɣzɩɣ ɛzɩ Krɩstʋ maɣzʋʋ yɔ.