10
1 Man-taabalaa, mbʋ mañɩnɩɣnɩ ma-laŋɩyɛ tɩŋa nɛ mentendiɣ Ɛsɔ Yuda ñɩma yɔɔ yɔ lɛ se: ɛya pa-ñʋʋ. 2 Mbʋ pʋyɔɔ yɔ, manpɩzɩɣ malɩzɩ pa-aseɣɖe se pañakɩ pana siŋŋ Ɛsɔ nʋmɔʋ taa. Ɛlɛ, patasɩm-kʋ. 3 Toovenim lɛ, patakpaɣ ɛzɩma mbʋ Ɛsɔ pɩsɩɣ ɛyaa kʋtʋʋzaa yɔ nɛ payaa pʋyʋ nɛ pa-maɣmaɣ pañɩnɩɣ mbʋ paala nɛ papɩsɩ kʋtʋʋzaa yɔ. Pʋ-yɔɔ pɔtɔɖɔ ɛzɩma mbʋ Ɛsɔ pɩsɩɣ ɛyaa kʋtʋʋzaa yɔ pʋ-yɔɔ. 4 Mbʋ pʋyɔɔ yɔ, Krɩstʋ yɔɔ paɣtʋ tatasɩ wɛnaʋ ɖoŋ se mba patɩŋa payɩ pɛwɛnɩ lidaʋ Ɛsɔ yɔɔ yɔ, papɩsɩ kʋtʋʋzaa ɛ-ɛsɩndaa.
Weyi ɛwɛɣnɩ lidaʋ Kɩpaɣlʋ yɔɔ yɔ pɩyakɩ ɛ-ñʋʋ
5 Tɔm ndʋ *Mooyiizi ma ɛzɩma mbʋ pɩtɩŋnɩ paɣtʋ yɔɔ ɖɔm yɔɔ nɛ Ɛsɔ pɩsɩ ɛyʋ kʋtʋʋzʋ yɔ pʋ-yɔɔ yɔ, ndʋ lɛ se: “Weyi ɛɖɔŋ mbʋ paɖʋ paɣtʋ taa yɔ pʋ-yɔɔ yɔ, pɩtɩŋɩɣnɩ pʋ-yɔɔ nɛ ɛwɛɛ wezuu.” 6 Ɛlɛ, ɛzɩma mbʋ pɔtɔm se Ɛsɔ tɩŋɩɣnɩ lidaʋ ŋgʋ ɛyʋ wɛnɩ ɛ-yɔɔ yɔ kʋ-yɔɔ nɛ ɛpɩsɩ-ɩ kʋtʋʋzʋ yɔ, ndʋ lɛ se: “Taapɔzɩ ña-maɣmaɣ ña-tɩ se akaɣ kpaʋ ɛsɔdaa?” Pʋ-tɔbʋʋ se akpaɣ ɛsɔdaa nɛ etisi Krɩstʋ. 7 Taapɔzɩ ña-maɣmaɣ ña-tɩ ɖɔɖɔ se: “Akaɣ tibu tɛtɛɛ?” Pʋ-tɔbʋʋ se atiki ɛlɩzɩ Krɩstʋ nɛ sɩɖaa taa. 8 Se we pama Ɛsɔtɔm Takayaɣ taa yɔ? Pamawa se: “Ñɔ-cɔlɔ tɔm wɛɛ, tɩwɛ ñɔ-nɔɔ taa nɛ tɩwɛɛ ña-taa.” Ŋgʋ, ndʋ lɛ lidaʋ tɔm ndʋ ɖisusuu yɔ. 9 Ndʋ lɛ se: ye ŋyɔɔdɩnɩ ñɔ-nɔɔ ɛyaa tɩŋa ɛsɩndaa se Yesu lɛ Kɩpaɣlʋ nɛ ña-taa lɛ, ŋwɛnɩ lidaʋ se Ɛsɔ fezi-i nɛ ɛlɩnɩ sɩɖaa taa yɔ, Ɛsɔ yakɩ ña-ñʋʋ. 10 Ye mbʋ, ɛyʋ wɛɣnɩ lidaʋ ɛ-taa nɛ Ɛsɔ pɩsɩ-ɩ kʋtʋʋzʋ, nɛ ɛyɔɔdɩnɩ ɛ-nɔɔ nɛ ɛlɛ ya ɛ-ñʋʋ. 11 Mbʋ pama Ɛsɔtɔm Takayaɣ taa se: “Paa weyi ɛwɛnɩ lidaʋ ɛ-yɔɔ yɔ, ɛɛkaɣ fɛyɛ tɔɔʋ.” 12 Pʋ-yɔɔ lɛ, tayʋʋ nabʋyʋ fɛyɩ Yuda ñɩma nɛ mba pɛtɛkɛ Yuda ñɩma yɔ pɛ-hɛkʋ taa: patɩŋa pa-Kɩpaɣlʋ kʋɖʋm, ɛlɛ haɣ ɛ-ñɩm mba payaɣ-ɩ se ɛsɩnɩ-wɛ yɔ patɩŋa. 13 Mbʋ pama Ɛsɔtɔm Takayaɣ taa se: “Weyi ɛyaɣ Kɩpaɣlʋ se ɛsɩnɩ-ɩ yɔ, ɛyakɩ ɛ-ñʋʋ.”
14 Ɛlɛ, ɛzɩma papɩzɩɣ payaa-ɩ se ɛsɩnɩ-wɛ nɛ pɛfɛyɩnɩ lidaʋ ɛ-yɔɔ? Ɛzɩma papɩzɩɣ pɛwɛnɩ lidaʋ ɛ-yɔɔ nɛ patanɩɩ ɛ-tɔm nɔɔyʋ cɔlɔ? Ɛzɩma papɩzɩɣ panɩɩ ɛ-tɔm nɛ nɔɔyʋ tosusi-tʋ? 15 Ɛzɩma tɔm susiyaa wɛɣ nɛ petetiyi nabɛyɛ se posusi-tʋ? Mbʋ pama Ɛsɔtɔm Takayaɣ taa se: “Tɔm susiyaa wokuuni ɛyʋ tɔm kɩbandʋ yɔ, pɩlabɩ ɖeu lɛ yee!” 16 Ɛlɛ, pɩtɛkɛ patɩŋa paatisini Laŋhɛzɩyɛ Tɔm. Toovenim lɛ, Ezaayii ma ɛ-takayaɣ taa se: “Kɩpaɣlʋ, atisi tɔm ndʋ ɖisusaa yɔ?” 17 Pʋ-yɔɔ lɛ, lidaʋ lɩɣnɩ tɔm ndʋ ɛyʋ welesiɣ yɔ tɩ-cɔlɔ. Tɔm ndʋ ewelesiɣ yɔ lɛ Krɩstʋ tɔm ndʋ posusuu yɔ. 18 Mbʋ mɔnpɔzʋʋ se: patanɩɩ tɔm ndʋ yaa we? Panɩ-tʋ. Mbʋ pama Ɛsɔtɔm Takayaɣ taa se:
“Ɛyaa nɩ pa-taŋ paa le.
Halɩ pɩtalɩ ɖooo kedeŋa tɩnaɣ yɔɔ.”
19 Mantasɩɣ pɔzʋʋ se: *Izrɛɛlɩ ñɩma tanɩɩ tɩ-taa yaa we? *Mooyiizi layɩ cosuu se:“Ɛsɔ yɔɔdaa se:
‘Meyeki nɛ ɩla sʋsɩ ɛjaɖɛ nɖɩ patakpaɣ payaa pʋyʋ yɔ ɖɩ-taa ñɩma.
Mansazɩɣ-mɩ nɛ mɩ-pana kpanɩ ɛjaɖɛ nɖɩ ɖɩ-taa ñɩma fɛyɩ lɛɣtʋ yɔ.’ ”
20 Pʋwayɩ lɛ, *Ezaayii ñacanɩ susuu se:
“Ɛsɔ yɔɔdaa se: ‘Mba pataañɩnɩɣ-m yɔ, pana-m.
Mawɩlɩ man-tɩ mba pataasʋlʋmʋʋ-m pʋyʋ yɔ.’ ”
21 Ɛlɛ, Izrɛɛlɩ ñɩma ñɩndʋ lɛ, ɛyɔɔdaa se:
“Mañɩnɩ kɩyakʋ nɛ kɩ-tɛɛ pilim se
mɔñɔɔzɩ ma nɛ mba paañaŋ-m nɛ pɛkɛlɛsɩɣ-m yɔ ɖɛ-hɛkʋ taa.”