Yesu kɔʋ ɛ-tɔmkpɛlɩkɩyaa naŋgbanzɩ lɩm yɔ
13
1 Kifeŋaɣ se pɔtɔɔ Yomiye Taa Lɩʋ *Kazandʋ. Ɛlɛ Yesu na se ɛ-alɩwaatʋ talaa se ɛkʋyɩ kedeŋa kanɛ kɔ-yɔɔ nɛ ewolo ɛ-Caa cɔlɔ. Ɛɛsɔɔlɩ ɛ-ñɩma mba pɛwɛ kɔ-yɔɔ yɔ kamaɣ fɛyɩ.
2 Ɖanaɣ ɖanaa lɛ, ɛ nɛ ɛ-tɔmkpɛlɩkɩyaa pɔtɔkɩ tɔɔnaɣ. Naze lɛ, *Kañadʋ Satanɩ tɛm ɖʋʋ Siimɔɔ Iskarɩyɔɔtɩ pɩyalʋ Yudaasɩ taa se ɛkpa-ɩ nɛ ɛɖʋzɩ koyindinaa nesi taa. 3 Yesu kɛtɛm naʋ se Caa Ɛsɔ cɔlɔ ɛlɩnaa nɛ ɛ-cɔlɔ ɛkɔŋ pɩsʋʋ. Ɛnawa ɖɔɖɔ se ɛɖʋzɩ e-nesi taa pɩtɩŋa payɩ. 4 Pʋ-yɔɔ ɛkʋyɩ tɔɔnaɣ ɖɩtɔɔyɛ nɛ ɛhɔzɩ e-toko sɔsɔʋ nɛ ɛkpaɣ pɔpɔʋ ɛtɔɔlɩ 5 nɛ ɛɖʋ lɩm ñanaɣ sɔsɔɔ nakɛyɛ taa nɛ ɛpazɩ ɛ-tɔmkpɛlɩkɩyaa naŋgbanzɩ kɔʋ nɛ ɛhɛzɩɣnɩ pɔpɔʋ ŋgʋ ɛtɔɔlaa yɔ.
6 Ɛtalɩ Siimɔɔ Pɩyɛ lɛ, ɛlɛ pɔzɩ-ɩ se: “Kɩpaɣlʋ! Ña pʋwɛɛ se ŋkɔ ma-naŋgbanzɩ lɩm naa we?” 7 Ecosi-i se: “Mbʋ malakɩ lɛɛlɛɛyɔ yɔ, ŋŋnɩɣ pʋ-tɔbʋʋ. Ɛlɛ, pʋwayɩ lɛ, ŋkɔŋ nɩʋ.” 8 Pɩyɛ heyi-i se: “Pɩtatɩɩwɛʋ kpem se ŋkɔ-m ma-naŋgbanzɩ lɩm!” Yesu cosi-i se: “Ye mɔntɔkɔ-ŋ-sɩ mbʋ yɔ, ma nɛ ŋ ɖɩɩpɩzɩɣ ɖɩkpɛndɩ pʋyʋ.”
9 Siimɔɔ Pɩyɛ heyi-i se: “Kɩpaɣlʋ! Ye mbʋ, taakɔ ma-naŋgbanzɩ ɖeke. Ɛlɛ, kɔ-m ɖɔɖɔ me-nesi nɛ ma-ñʋʋ!” 10 Yesu heyi-i se: “Weyi ɛtɛm lɩm sɔʋ yɔ, ɛɛtasɩɣ ñɩnʋʋ se ɛsɔ-pʋ. Ɛlɛ, ɛ-naŋgbanzɩ ɖeke ɛkɔʋ, mbʋ pʋyɔɔ yɔ, ɛ-yɔɔ wɛ cɩɖɩcɩɖɩ. Mɩ mɔn-tɔmkpɛlɩkɩyaa lɛ, ɩwɛ cɩɖɩcɩɖɩ, ɛlɛ, pɩtɛkɛ mɩtɩŋa.” 11 Yesu kɛtɛm sɩm weyi ɛkɔŋ-ɩ ɖʋzʋʋ koyindinaa nesi taa yɔ, pʋ-yɔɔ ɛtɔm se: “Pɩtɛkɛ mɩtɩŋa ɩwɛnɩ cɩɖɩcɩɖɩ.”
12 Ɛtɛm ɛ-tɔmkpɛlɩkɩyaa naŋgbanzɩ kɔʋ lɛ, esuu e-toko nɛ ɛpɩsɩ ɛcaɣ tɔɔnaɣ ɖɩtɔɔyɛ nɛ ɛpɔzɩ-wɛ se: “Ɩnɩ mbʋ malabɩ-mɩ yɔ pʋ-tɔbʋʋ naa we? 13 Ɩyaɣ-m se: ‘Wɩlɩyʋ’ nɛ ‘Kɩpaɣlʋ.’ Ɩwɛnɩ toovenim, mbʋ pʋyɔɔ yɔ, mɛnkɛ mbʋ. 14 Ye weyi ma mɛnkɛ mɩ-Kɩpaɣlʋ nɛ mɩ-Wɩlɩyʋ yɔ, mɔnkɔ mɩ-naŋgbanzɩ lɩm yɔ, pʋwɛɛ se mɩ ɖɔɖɔ, ɩkɔ ɖama naŋgbanzɩ. 15 Mawɩlɩ-mɩ mbʋ pʋwɛɛ se ɩla yɔ se ɩpɩzɩ ɩla ɛzɩ malabʋ-mɩ yɔ. 16 Toovenim lɛ, mankaɖɩɣ-mɩ se: tʋmlaɖʋ nɔɔyʋ takɩlɩ ɛ-caa, tiyiyu nɔɔyʋ takɩlɩ weyi etiyi-i yɔ. 17 Lɛɛlɛɛyɔ, ɩsɩm mbʋ pʋwɛɛ se ɩla yɔ. Ye ɩñɩtaa ɩlabɩ-pʋ yɔ, ihikiɣ mɩ-tɩ!
18 Pɩtɛkɛ mɩtɩŋa mɔyɔɔdʋʋ, mansɩm mba malɩzaa yɔ. Ɛlɛ, pʋwɛɛ se tɔm ndʋ pama Ɛsɔtɔm Takayaɣ taa yɔ, tɩla. Ndʋ lɛ se: ‘Weyi ma nɛ ɩ ɖɩtɔkaɣ yɔ, ɛpɩsaa ɛkʋyʋʋ mɔ-yɔɔ.’ 19 Meheyiɣ-mɩ tɔm ndʋ lɛɛlɛɛyɔ se pʋcɔ tɩla. Mbʋ yekina nɛ itisi alɩwaatʋ ndʋ tɩlakɩ yɔ se: ‘Ma lɛ weyi mɛnkɛnaa yɔ.’ 20 Toovenim lɛ, mankaɖɩɣ-mɩ se: weyi ɛmʋʋ weyi mentiyi-i yɔ, ɛmʋʋ-m. Weyi ɛlɛ mʋʋ-m yɔ, ɛmʋʋ weyi etiyi-m yɔ.”
Yesu yɔɔdʋʋ se Yudaasɩ kɔŋ-ɩ ɖʋzʋʋ koyindinaa nesi taa yɔ
(Mat 26.20-25; Mrk 14.17-21; Luk 22.21-23)
21 Yesu tɛm yɔɔdʋʋ mbʋ lɛ, ɛ-laŋɩyɛ wɛɛkɩ nɛ ɛtɔ se: “Toovenim lɛ, mankaɖɩɣ-mɩ se: mɩ-taa nɔɔyʋ kɔŋ-m kpaʋ nɛ ɛɖʋzɩ koyindinaa nesi taa.” 22 Peeye papazɩ ɖama ɛza taa cɔnaʋ nɛ pɔpɔzʋʋ ɖama se: “Ɛzɩ anɩ ɛtɔŋ?” 23 Alɩwaatʋ ndʋ lɛ, pa-taa weyi Yesu kɩlɩ sɔɔlʋʋ yɔ, ɛɛwɛlɩ hʋyʋʋ yɔɔ*fc* ɛ-cɔlɔ tɔɔnaɣ ɖɩtɔɔyɛ. \fm c \fr (13.23) Ɛɛwɛlɩ hʋyʋʋ yɔɔ: \f Yuda ñɩma tɛ lɛ, hʋyʋʋ yɔɔ pɛwɛlaɣ nɛ pɔtɔkɩ. 24 Ɛlɛ Siimɔɔ Pɩyɛ hadɩ-ɩ nɛ eheyi-i se: “Pɔzɩ-ɩ se anɩ ɛtɔŋ?” 25 Peeye ɛlɛ tɛzɩ ɛ-tɩ wɛlʋʋ nɛ Yesu yɔɔ nɛ ɛpɔzɩ-ɩ se: “Kɩpaɣlʋ! Anɩ ŋtɔŋ?” 26 Yesu cosi-i se: “Ɛnʋ lɛ weyi malɩzɩɣ tindine hɔɔlaɣ melii num nɛ mɛncɛlɩ-ɩ yɔ.” Peeye ɛkpaɣ tindine hɔɔlaɣ elii num nɛ ɛcɛlɩ Siimɔɔ Iskarɩyɔɔtɩ pɩyalʋ Yudaasɩ. 27 Ɛtɩmʋ-kɛ lɛ, eke *Kañadʋ Satanɩ. Peeye Yesu heyi-i se: “La mbʋ pʋwɛɛ se ŋla yɔ lɔŋ!” \f*
28 Mba paawɛ tɔɔnaɣ ɖɩtɔɔyɛ peeye yɔ, pa-taa nɔɔyʋ tana mbʋ pʋ-yɔɔ eheyaɣ Yudaasɩ mbʋ yɔ. 29 Yudaasɩ ɖɔkaɣnɩ pe-liidiye huyuu. Pʋ-yɔɔ pa-taa nabɛyɛ maɣzaɣ se Yesu heyaɣ-ɩ se ewolo ɛya kazandʋ wondu ndʋ pʋpɔzʋʋ-wɛ yɔ. Lɛlaa ñamaɣzɩɣ se yaa eheyaɣ-ɩ se ɛlɩzɩ nabʋyʋ nɛ ɛha kʋñɔndɩnaa. 30 Yudaasɩ mʋ tindine hɔɔlaɣ mbʋ lɛ, ɛtɩkʋyɩ ɛlɩɩ. Alɩwaatʋ ndʋ lɛ, ɖoo koyuwa.
Paɣtʋ kɩfatʋ tɔm
31 Yudaasɩ lɩwa lɛ, Yesu yɔɔdɩ se: “Lɛɛlɛɛyɔ *Ɛyʋ Pɩyalʋ hɩɖɛ sɛwa nɛ pɩtɩŋnɩ ɛ-yɔɔ nɛ Ɛsɔ ñɩnɖɛ sɛɛ. 32 Ye pɩtɩŋnɩ ɛ-yɔɔ nɛ Ɛsɔ hɩɖɛ sɛɛ yɔ, ɛlɛ ñeyeki nɛ pɩtɩŋnɩ ɛ-maɣmaɣ ɛ-yɔɔ nɛ ɛnʋ ñɩnɖɛ ñɛsɛɛ. Ɛlakɩ-pʋ alɩwaatʋ pazɩ taa.
33 Men-piya! Ma nɛ mɩ ɖɩtasɩɣ caɣʋ pazɩ yem nɛ pʋcɔ mɛnɖɛɛ. Ɩkɔŋ-m ñɩnʋʋ, ɛlɛ, lɛɛlɛɛyɔ meheyiɣ-mɩ tɔm ndʋ meheyi *Yuda ñɩma *sɔsaa yɔ. Ndʋ lɛ se: ɩɩpɩzɩɣ iwolo ɖenɖe mowoki yɔ.
34 Manɖʋʋ-mɩ paɣtʋ kɩfatʋ. Ndʋ lɛ se: ɩsɔɔlɩ ɖama. Ɩsɔɔlɩ ɖama ɛzɩ mɔnsɔɔlʋʋ-mɩ yɔ. 35 Ye ɩsɔɔlɩ ɖama yɔ, pʋbʋ ɛyaa tɩŋa naɣ se ɩkɛ mɔn-tɔmkpɛlɩkɩyaa.”
Yesu yɔɔdʋʋ se Pɩyɛ kɔŋ kpɛzʋʋ se ɛtasɩm-ɩ yɔ
(Mat 26.31-35; Mrk 14.27-31; Luk 22.31-34)
36 Yesu yɔɔdɩ mbʋ lɛ, Siimɔɔ Pɩyɛ pɔzɩ-ɩ se: “Kɩpaɣlʋ! Le ŋwoki?” Ecosi-i se: “Lɛɛlɛɛyɔ, ŋŋpɩzɩɣ ŋtɩŋ-m ɖenɖe mowoki yɔ. Ɛlɛ, pʋwayɩ ŋkɔŋ-m tɩŋʋʋ.” 37 Peeye Pɩyɛ pɔzɩ-ɩ se: “Kɩpaɣlʋ! Pɩlabɩ ɛzɩma nɛ maapɩzɩɣ mantɩŋ-ŋ lɛɛlɛɛyɔ? Paa sɩm yɔ, mansɩkɩ ñɔ-yɔɔ!” 38 Yesu pɔzɩ-ɩ se: “Paa sɩm, ŋsɩkɩ mɔ-yɔɔ yaa? Toovenim lɛ, mankaɖɩɣ-ŋ se: pʋcɔ kalɩmɔʋ koo lɛ, ŋkpɛzɩɣ tɔm naadozo se ŋtasɩm-m.”