Yesu lɛ nʋmɔʋ ŋgʋ kuwoki Caa cɔlɔ yɔ
14
1 Pʋwayɩ lɛ, Yesu tasɩ ɛ-tɔmkpɛlɩkɩyaa heyuu se: “Mɩ-laŋa ɛtaawɛɛkɩ, ɩwɛnɩ lidaʋ Ɛsɔ yɔɔ, ɩwɛnɩ-kʋ ɖɔɖɔ mɔ-yɔɔ. 2 Ɖɩjaɣyɛ sakɩyɛ wɛ man-Caa ɖɩɣa taa. Mowoki mɔñɔɔzɩ-mɩ naɖɩyɛ. Pɩtaakɛ toovenim yɔ, mantaaheyi-mɩ mbʋ. 3 Mɛntɛŋ-mɩ-ɖɩ ñɔɔzʋʋ lɛ, manpɩsɩ mɔnkɔɔ mankpaɣ-mɩ nɛ ma nɛ mɩ ɖiwolo ɖenɖe mɛwɛɛ yɔ nɛ mɩ ɖɔɖɔ ɩwɛɛ peeye. 4 Ɩsɩm nʋmɔʋ ŋgʋ kuwoki ɖenɖe mowoki yɔ.”
5 Peeye Tomaa cosi-i se: “Kɩpaɣlʋ! Ɖɩtasɩ ɖenɖe ŋwoki yɔ. Ɛzɩma ɖɩpɩzɩɣ ɖɩtɩlɩ peeye nʋmɔʋ yɔ?” 6 Ɛlɛ Yesu heyi-i se: “Ma lɛ nʋmɔʋ nɛ toovenim nɛ wezuu. Nɔɔyʋ fɛyɩ se ewoki Caa cɔlɔ nɛ ɛtatɩŋnɩ mɔ-yɔɔ. 7 Ye ɩsɩm-m yɔ, ɩsɩŋ ɖɔɖɔ man-Caa. Pɩkpaɣʋnɩ lɛɛlɛɛyɔ yɔ, ɩna-ɩ nɛ ɩsɩm-ɩ.”
8 Peeye Filiipu heyi-i se: “Kɩpaɣlʋ! Ye ŋwɩlɩ-ɖʋ Caa yɔ, pʋɖɔ-ɖʋ.” 9 Yesu cosi-i se: “Filiipu! Ɖooo ma nɛ mɩ ɖɩwɛʋ yɔ, ŋtasɩm-m yaa we? Weyi ɛna-m yɔ, ɛna Caa. Pɩlabɩ ɛzɩma nɛ ŋtɔŋ se mawɩlɩ-mɩ Caa yɔ? 10 Ŋtetisi se ma nɛ Caa ɖɩwɛ ɖama taa yaa we? Tɔm ndʋ meheyiɣ-mɩ yɔ, tɩtalɩnɩ mɔn-cɔlɔ. Ɛlɛ, Caa wɛ mɔn-cɔlɔ, ɛnʋ lakɩnɩ ɛ-tʋmɩyɛ. 11 Itisi se ma nɛ Caa ɖɩwɛ ɖama taa. Ye iitisiɣ mbʋ yɔ, tʋma wena malakɩ yɔ a-yɔɔ lɛ, itisi-tʋ. 12 Toovenim lɛ, mankaɖɩɣ-mɩ se: weyi ɛtaɣ-m liu yɔ, ɛlakɩ ɖɔɖɔ tʋma wena malakɩ yɔ. Halɩ ɛlakɩ nɛ pɩkɩlɩ mbʋ, mbʋ pʋyɔɔ yɔ, mowoki mɛwɛɛ man-Caa cɔlɔ. 13 Mbʋ pɩtɩŋa payɩ ɩpɔzʋʋ-ɩ nɛ mɔ-nɔɔ yɔ, malakɩ-pʋ se pɩtɩŋnɩ mɔ-yɔɔ nɛ man-Caa hɩɖɛ sɛɛ. 14 Mantasɩɣ-mɩ heyuu se: ye ɩpɔzɩ-m pʋyʋ nɛ mɔ-nɔɔ yɔ, malakɩ-mɩ-pʋ.”
Ɛsɔ Kalɩzaɣ tiyinaʋ tɔm
15 Pʋwayɩ lɛ, Yesu tasɩ yɔɔdʋʋ se: “Ye ɩsɔɔlɩ-m yɔ, ɩɖɔŋ man-paɣtʋ yɔɔ. 16 Ma lɛ, mankaɣ tenduu Caa se ɛtasɩ-mɩ tiyinaʋ Sɩnɩyʋ nɔɔyʋ nɛ ɛwɛɛ mɩ-cɔlɔ tam yɔɔ: 17 ɛnʋ lɛ toovenim Kalɩzaɣ. Mba paañaŋ Ɛsɔ yɔ, paapɩzɩɣ pamʋ-ɩ, mbʋ pʋyɔɔ yɔ, paapɩzɩɣ pana-ɩ yaa pasɩm-ɩ. Ɛlɛ mɩ yɔ, mɩsɩŋ-ɩ, mbʋ pʋyɔɔ yɔ, ɛwɛɣ mɩ-cɔlɔ nɛ mɩ nɛ ɩ ɩwɛɛ ɖama taa.
18 Maayeki-mɩ mi-ɖeke ɛzɩ soliisi yɔ, mankaɣ pɩsʋʋ mɩ-cɔlɔ. 19 Pɩkazɩ pazɩ, mba paañaŋ Ɛsɔ yɔ, paatasɩɣ-m naʋ. Ɛlɛ mɩ yɔ, ɩkɔŋ-m naʋ, mbʋ pʋyɔɔ yɔ, mɛwɛ wezuu nɛ mɩ ɖɔɖɔ ɩkaɣ wɛʋ wezuu. 20 Puwiye nɖɩ ɩtɩlɩɣ se ma nɛ man-Caa ɖɩwɛ ɖama taa nɛ ma nɛ mɩ ɖɩwɛɛ ɖama taa ɖɔɖɔ.
21 Weyi ɛɖɔkʋʋ man-paɣtʋ nɛ ɛɖɔ tɩ-yɔɔ yɔ, ɛnʋ sɔɔlɩnɩ-m. Man-Caa sɔɔlʋʋ weyi ɛsɔɔlɩ-m yɔ. Ma ɖɔɖɔ mɔnsɔɔlʋʋ-ɩ nɛ malɩzɩ man-tɩ mawɩlɩ-ɩ.”
22 Yudaasɩ kɛwɛ peeye, ɛlɛ, pɩtɛkɛ Iskarɩyɔɔtɩ pɩyalʋ. Ɛlɛ pɔzɩnɩ-ɩ se: “Kɩpaɣlʋ! Ɛzɩma ŋlɩzɩɣ ña-tɩ nɛ ŋwɩlɩ-ɖʋ nɛ kedeŋa ñɩma ɛɛnaɣ-ŋ?” 23 Yesu cosi-i se: “Weyi ɛsɔɔlɩ-m yɔ, ɛɖɔŋ mɔn-tɔm yɔɔ. Man-Caa sɔɔlʋʋ-ɩ nɛ ma nɛ ɩ ɖiwolo ɖɩwɛɛ pʋdʋ tɛ. 24 Weyi ɛtɔsɔɔlɩ-m yɔ, ɛɛɖɔŋ mɔn-tɔm yɔɔ. Ndʋ meheyiɣ-mɩ ɛzʋnɔ yɔ, tɩtalɩnɩ mɔn-cɔlɔ, ɛlɛ, man-Caa cɔlɔ tɩlɩnaa. Ɛnʋ tiyini-m.
25 Alɩwaatʋ ndʋ ma nɛ mɩ ɖɩwɛ ɛzʋnɔ yɔ, meheyi-mɩ-tʋ. 26 Sɩnɩyʋ ɛnʋ lɛ Ɛsɔ Kalɩzaɣ. Ŋga Caa kɔŋ-mɩ tiyinaʋ nɛ mɔ-nɔɔ. Kɔkɔŋ-mɩ wɩlʋʋ pɩtɩŋa nɛ kɔtɔzɩ-mɩ mbʋ pɩtɩŋa payɩ meheyi-mɩ yɔ.
27 Meyeki nɛ ɩwɛɛ laŋhɛzɩyɛ taa, mɛhɛzɩɣnɩ mɩ-laŋa. Maahɛzɩɣ-yɛ ɛzɩ kedeŋa ñɩma hɛzʋʋ yɔ. Mɩ-laŋa ɛtaawɛɛkɩ, sɔɔndʋ ɛtaakpa-mɩ. 28 Meheyi-mɩ nɛ ɩnɩɩ se mowoki nɛ menkiti mɔnkɔɔ mɩ-cɔlɔ. Ye ɩɩsɔɔlɩ-m yɔ, mɩ-taa kahʋlʋmɩ alɩwaatʋ ndʋ ɩnɩwa se mowoki Caa cɔlɔ yɔ. Mbʋ pʋyɔɔ yɔ, ɛkɩlɩ-m. 29 Meheyi-mɩ tɔm ndʋ lɛɛlɛɛyɔ se pʋcɔ tɩtalɩ. Meheyi-mɩ mbʋ se ye tɩtalaa lɛ, itisi-tʋ.