Luka 15

Heu kilebu tɔm

(Mat 18.12-14)

¹ Nakʋyʋ wiye *tikee mʋyaa nɛ kɩwɛɛkɩm laɖaa lɛlaa powobi Yesu cɔlɔ patɩŋa payɩ se panɩɩ ɛ-tɔm. ² Peeye *Farɩsɩ ñɩma nɛ paɣtʋ wɩlɩyaa pa-taa wɩnɩ-ɩ nɛ pɔyɔɔdʋʋ pa-taa pe-ɖeke se: “Ɩna ɛzɩma mbʋ ɛ nɛ kɩwɛɛkɩm laɖaa pɛkpɛndaa pɔtɔkɩ yɔ!” ³ Ɛlɛ Yesu tuu-wɛ eduuye se: ⁴ “Ye mɩ-taa nɔɔyʋ ɛwɛnɩ heŋ mɩnʋʋ nɛ ɩ-taa kʋɖʋm le, eeyeki kʋɖʋm fɛyɩ mɩnʋʋ weyi ɩkazaa yɔ ñɩtʋ ɖɩtɔɔyɛ nɛ ɛɖɛɛ heu ɛnʋ ɛ-ñɩnʋʋ nɛ pʋkɔɔ pɩsɩnɩ alɩwaatʋ ndʋ ɛna-ɩ yɔ yaa we? ⁵ Ɛnaɣ-ɩ lɛ, ɛ-laŋɩyɛ hʋlʋmʋʋ ɖeu nɛ ɛkpaɣ-ɩ ɛhɔɔlɩ ɛ-hazasɩ yɔɔ se ekpeni-i. ⁶ Ɛtalɩɣ ɖɩɣa lɛ, ɛyaɣ ɛ-ɛgbaadɩnaa nɛ ɛ-cɔlɔ ñɩma se: ‘Ɩkɔɔ ma nɛ mɩ ɖɩmayɩ amaya. Mbʋ pʋyɔɔ yɔ, mana me-heu weyi eeleba yɔ.’ ⁷ Meheyiɣ-mɩ se mbʋ ɖɔɖɔ pʋwɛ ɛsɔdaa: ye kɩwɛɛkɩm laɖʋ kʋɖʋm nɔɔyʋ ɛlɛɣzɩ wɛtʋ yɔ, Ɛsɔ nɛ e-*tiyiyaa pa-laŋa hʋlʋmʋʋnɩ-ɩ nɛ pɩkɩlɩ ɛyaa kʋɖʋm fɛyɩ mɩnʋʋ mba pamaɣzɩɣ se pɛkɛ kʋtʋʋzaa nɛ pʋtɔpɔzɩ se pɛlɛɣzɩ wɛtʋ yɔ.”

Liidiye pɔɔyaɣ ŋga keleba yɔ

⁸ Pʋwayɩ lɛ, Yesu tasɩ-wɛ tuuu eduuye se: “Ye halʋ nɔɔyʋ ɛwɛnɩ liidiye pɔɔyɩsɩ hiu nɛ sɩ-taa kʋɖʋmaɣ le, ɛɛsɔkɩ kanɖʋ nɛ ɛhazɩ ɛ-ɖɩɣa tɩŋa nɛ ɛñɩnɩ-kɛ camɩyɛ nɛ pʋkɔɔ pɩsɩnɩ alɩwaatʋ ndʋ ɛna-kɛ yɔ yaa we? ⁹ Ɛnaɣ-kɛ lɛ, ɛyaɣ ɛ-ɛgbaadɩnaa nɛ ɛ-cɔlɔ ñɩma se: ‘Ɩkɔɔ ma nɛ mɩ ɖɩmayɩ amaya. Mbʋ pʋyɔɔ yɔ, mana me-liidiye pɔɔyaɣ ŋga kaaleba yɔ.’ ¹⁰ Meheyiɣ-mɩ se mbʋ ɖɔɖɔ pʋwɛɛ: ye kɩwɛɛkɩm laɖʋ kʋɖʋm nɔɔyʋ ɛlɛɣzɩ wɛtʋ yɔ, Ɛsɔ *tiyiyaa laŋa hʋlʋmʋʋ ɖeu.”

Pɩɣa kilebaɣ tɔm

¹¹ Yesu tasɩ-wɛ tuuu eduuye se: “Abalʋ nɔɔyʋ kɛwɛnɩ pɩyalaa naalɛ. ¹² Nakʋyʋ wiye lɛ, pa-taa cikpelu heyi pa-caa se: ‘Man-caa! Cɛlɩ-m ña-ñɩm mbʋ pɩkɛɣ ma-ñɩmbʋ ña-sɩm wayɩ yɔ.’ Peeye pa-caa tayɩ-wɛ ɛ-ñɩm. ¹³ Pɩtalabɩdɩ pʋyʋ lɛ, cikpelu ɛnʋ ekuu ɛ-ñɩm tɩŋa nɛ ɛɖɛɛ ɖooo ɛjaɖɛ naɖɩyɛ taa. Ɛtalɩ peeye lɛ, ɛpazɩ tɩkpayɩtʋ labʋ nɛ ɛwɛɛkɩ ɛ-ñɩm mbʋ pɩtɩŋa payɩ. ¹⁴ Ɛtɛm-pʋ wɛɛkʋʋ lɛ, ñɔɔsɩ nasɩyɩ lɩɩ ɛjaɖɛ nɖɩ ɖɩ-taa. Ŋgʋ, ɛɛwɛ kɛdɛɖaɣ taa kpem. ¹⁵ Peeye ewobi ɛjaɖɛ nɖɩ ɖɩ-taa tʋ nɔɔyʋ cɔlɔ se ɛlɛ ɛñɩnɩ-ɩ tʋmɩyɛ nɛ ɛlɛ kpaɣ-ɩ ewoni tɛyɛ se ɛcɔŋnɩ-ɩ afanaa yɔɔ. ¹⁶ Ɛñɩnaɣ se paa afanaa tɔɔnaɣ maɣmaɣ yɔ ɛtɔɔ. Ɛlɛ, nɔɔyʋ ɛɛhaɣ-ɩ. ¹⁷ Peeye ɛmaɣzɩ ɛ-taa pɩŋŋ nɛ ɛtɔ se: ‘Ŋgʋ, man-caa wɛnɩ tʋmlaɖaa sakɩyɛ, pɔtɔkɩ paatɛŋ. Piyele ñɔɔsɩ ñakʋʋ-m cɩnɛ yem falaa! ¹⁸ Mankʋyʋʋ manpɩsɩ man-caa cɔlɔ nɛ meheyi-i se: caa! Mayʋsɩnɩ Ɛsɔ nɛ mɛntɛ mayʋsɩnɩ-ŋ. ¹⁹ Mantatasɩ mʋnaʋ se ŋya-m se ña-pɩyalʋ. Ɛlɛ, kpaɣ-m ɛzɩ ña-tʋmlaɖaa taa lɛlʋ yɔ.’ ²⁰ Peeye ɛkʋyaa ɛkpaɣ nʋmɔʋ se ekpeŋ ɛ-caa tɛ.

Ɛwɩzɩ talʋʋ lɛ, ɛ-caa losi-i poliŋ nɛ pɩlabɩ-ɩ pʋtɔdɩyɛ pɩŋŋ. Peeye ɛlɛ se lɔŋ ɛkatɩ-ɩ nɛ ekpibi-i nɛ laŋhʋlʋmɩyɛ. ²¹ Ɛlɛ ɛ-pɩyalʋ ɛnʋ eheyi-i se: ‘Caa! Mayʋsɩnɩ Ɛsɔ nɛ mɛntɛ mayʋsɩnɩ-ŋ. Mantatasɩ mʋnaʋ se ŋya-m se ña-pɩyalʋ.’ ²² Patalɩ ɖɩɣa lɛ, ɛ-caa heyi ɛ-tʋmlaɖaa se: ‘Iwolo ɖasam ɩkpaɣ toko kitibuu ŋgʋ kɩkɩlɩ ɖeu yɔ nɛ ɩkɔnɩ isuu-i. Ɩlɛɛ-ɩ kokooye nɛ naataŋgbala. ²³ Ɩkɔnɩ neɣye nɖɩ ɖɩwɛ num camɩyɛ yɔ nɛ ɩkʋ nɛ ɖɩtɔɔ kazandʋ. ²⁴ Mbʋ pʋyɔɔ yɔ, man-pɩyalʋ ɛnɛ, pʋwɛ ɛzɩ ɛsɩba nɛ efe yɔ. Eeleba nɛ manɖaɣnɩ-ɩ naʋ.’ Peeye papazɩ kazandʋ tɔɔʋ.

²⁵ Pɩlakaɣ mbʋ lɛ, ɛ-pɩyalʋ sɔsɔ ñaawɛnɩ tɛyɛ. Ɛlɛ kpeŋaɣ nɛ ɛwɩzɩnɩ ɖɩɣa lɛ, ɛnɩɩ soo nɛ payɛ pa-taŋ. ²⁶ Peeye ɛya ɛ-caa tʋmlaɖʋ nɔɔyʋ nɛ ɛpɔzɩ-ɩ se: ‘Ɛbɛ palakɩ mbʋ?’ ²⁷ Ɛlɛ cosi-i se: ‘Ñe-neu pɩsɩnɩ ɛkɔɔ nɛ ña-caa kʋ neɣye nɖɩ ɖɩwɛ num camɩyɛ yɔ, mbʋ pʋyɔɔ yɔ, ɛtasɩ-ɩ naʋ nɛ ɛ-alaafɩya.’ ²⁸ Peeye ɛ-pɩyalʋ sɔsɔ ɛnʋ ɛmʋ pana nɛ ekizi ɖɩɣa sʋʋ. Ɛlɛ ɛ-caa lɩɩ ɛyaa-ɩ se ɛsʋʋ. ²⁹ Ɛlɛ ɛpɩsɩnɩ ɛ-caa se: ‘Welesi nɛ ŋnɩɩ, pɩnzɩ sakɩyɛ yɔ, mɛwɛɛ malakɩ-ŋ tʋmɩyɛ nɛ paa ŋyɔɔdɩ ndʋ yɔ, maakiziɣ.’ Wiɖiyi ŋtatɩɩtɔm se: ‘Kpaɣ pimbiɣa kanɛ nɛ ña nɛ ña-taabalaa ɩla kpanzʋʋ.’ ³⁰ Ŋgʋ, ña-pɩyalʋ ɛnɛ, ɛkpaɣ ña-ñɩm nɛ ɛwɛɛkɩ halaa nʋmɔʋ taa. Sɔnɔ ɛkɔma lɛ, ŋyele pakʋ-ɩ ɖe-neɣye nɖɩ ɖɩwɛ num camɩyɛ yɔ. ³¹ Peeye ɛ-caa cosi-i se: ‘Man-pɩɣa! Ñɛwɛnɩ mɔn-cɔlɔ tam. Mbʋ pɩtɩŋa mɛwɛna yɔ, ñatɩnɩ-pʋ. ³² Ɛlɛ, pʋmʋnaa se ɖɩla kazandʋ nɛ laŋhʋlʋmɩyɛ. Mbʋ pʋyɔɔ yɔ, pʋwɛ ɛzɩ ñe-neu kasɩba nɛ efe yɔ, eeleba nɛ manɖaɣnɩ-ɩ naʋ.’ ”