Kʋdɔndʋ nɔɔyʋ yɔɔ cɛbʋ yɔ
14
1 *Kɩyakʋ kɩhɛzʋʋ nakʋyʋ wiye *Farɩsɩ ñɩma sɔsɔ nɔɔyʋ ya Yesu ɛ-tɛ se ewolo ɛtɔɔ tɔɔnaɣ nɛ mba paawɛ peeye yɔ, pɛwɛɛ pefeŋiɣ-i. 2 Abalʋ nɔɔyʋ kɛwɛ peeye, kʋdɔŋ kusuyuu kpa-ɩ. 3 Peeye Yesu pɔzɩ paɣtʋ wɩlɩyaa nɛ Farɩsɩ ñɩma se: “Pɩha nʋmɔʋ se pala nɛ kʋdɔndʋ nɔɔyʋ yɔɔ cɛ kɩyakʋ kɩhɛzʋʋ wiye yaa pataala?” 4 Ɛlɛ potocosi-i natʋyʋ. Peeye Yesu hɔm kʋdɔndʋ ɛnʋ nɛ ɛla nɛ ɛ-yɔɔ cɛ nɛ eheyi-i se: “Wolo ŋɖɛɛ.” 5 Pʋwayɩ lɛ, ɛpɔzɩ-wɛ se: “Ye mɩ-taa nɔɔyʋ pɩɣa yaa ɛ-nɔ ɛtɔlɩ lɔkɔ taa kɩyakʋ kɩhɛzʋʋ wiye, pʋdʋ yeki-i lɩzʋʋ kpaagbaa se pɩkɛ kɩyakʋ kɩhɛzʋʋ naa we?” 6 Ɛlɛ patapɩzɩ pocosi-i natʋyʋ.
Payaɣʋ ɛyʋ kazandʋ ɖeɖe yɔ nɛ ɖɩjaɣyɛ lɩzʋʋ
7 Yesu kana ɛzɩma mbʋ mba paya tɔɔnaɣ ɖɩtɔɔyɛ yɔ, palɩzɩɣ ɖɩjaɣyɛ kɩbanɖɛ yɔ. Pʋ-yɔɔ etuu-wɛ eduuye se: 8 “Ye nɔɔyʋ ɛya-ŋ kazandʋ ɖeɖe nɛ ŋwolo yɔ, taahuyi se ŋlɩzɩɣ ɖɩjaɣyɛ kɩbanɖɛ. Mbʋ pʋyɔɔ yɔ, pʋtɔmaɣ yɔ paya nɔɔyʋ nɛ ɛlɛ kɩlɩ-ŋ 9 nɛ weyi ɛya-mɩ yɔ, ɛtaakɔɔ eheyi-ŋ se: ‘Kʋyɩ ŋkazɩ sɔsɔ ɖɩjaɣyɛ.’ Pʋbʋ, ŋkʋyʋʋnɩ fɛyɛ nɛ ŋwolo ŋcaɣnɩ ɖooo wayɩ. 10 Ɛlɛ, ye paya-ŋ kazandʋ ɖeɖe nɛ ŋwolo yɔ, caɣnɩ wayɩ nɛ weyi ɛya-ŋ yɔ, ɛkɔma lɛ, eeheyi-ŋ se: ‘Man-taabalʋ! Kɔɔ ŋcaɣ ɖɩjaɣyɛ kɩbanɖɛ taa.’ Pʋbʋ, paɖʋ-ŋ hɩɖɛ ña nɛ mba patɩŋa ɩcaɣaɣ yɔ pɛ-ɛsɩndaa. 11 Mbʋ pʋyɔɔ yɔ, weyi ɛkpazɩɣ ɛ-tɩ yɔ, petisiɣ-i nɛ weyi ɛlɛ tisiɣ ɛ-tɩ yɔ, pakpazɩ-ɩ.”
12 Pʋwayɩ lɛ, Yesu heyi *Farɩsɩ tʋ weyi ɛɛya-ɩ ɛ-tɛ yɔ se: “Ye ŋlabɩ kazandʋ yɔ, taayaa ñɛ-ɛgbaadɩnaa yaa ña-ñɩma yaa ña-taabalaa ñɩm tɩnaa. Mbʋ pʋyɔɔ yɔ, papɩzɩɣ paya-ŋ ɖɔɖɔ nɛ pɩla se pɛhɛyɩ-ŋ ña-kʋjɔʋ. 13 Ɛlɛ, ye ŋlabɩ kazandʋ yɔ, yaa kʋñɔndɩnaa nɛ mba pe-nesi camaa yɔ nɛ kalɩkalasɩ nɛ yʋlʋmaa. 14 Ye ŋlabɩ mbʋ yɔ, ŋhiɣ ña-tɩ! Mbʋ pʋyɔɔ yɔ, paapɩzɩɣ pɛhɛyɩ-ŋ. Ɛlɛ, Ɛsɔ kaɣnɩ-ŋ hɛyʋʋ kɩyakʋ ŋgʋ efeziɣ ɛyaa kʋtʋʋzaa sɩm taa yɔ.”
Halɩkpaɣyɛ kazandʋ eduuye
(Mat 22.1-10)
15 Yesu yɔɔdɩ mbʋ lɛ, mba paawɛ peeye yɔ, pa-taa lɛlʋ heyi-i se: “Weyi ɛkaɣ tɔɔʋ tɔɔnaɣ Ɛsɔ Kewiyaɣ taa yɔ, ehiɣ ɛ-tɩ!” 16 Peeye Yesu tuu-i eduuye se: “Abalʋ nɔɔyʋ labɩnɩ kazandʋ nɛ ɛyaa ɛyaa sakɩyɛ. 17 Tɔɔnaɣ pɩwa lɛ, etiyi ɛ-tʋmlaɖʋ se ewolo eheyi mba ɛɛya-wɛ yɔ se pɔkɔɔ se alɩwaatʋ talaa. 18 Peeye patɩŋa papazɩ tenduu kʋɖʋm kʋɖʋm se paanaɣ alɩwaatʋ. Kajalaɣ tʋ heyi tiyiyu ɛnʋ se: ‘Mayabɩ hayɩm nabʋyʋ nɛ mancaɣ se mowolo mana-pʋ. Pʋ-yɔɔ lɛ, mentendiɣ-ŋ se maapɩzɩɣ mɔnkɔɔ.’ 19 Lɛlʋ heyi-i se: ‘Mayabɩ naŋ kɩhayɩŋ hiu, mancaɣ se mamaɣzɩ-ɩ nɛ mana. Pʋ-yɔɔ lɛ, mentendiɣ-ŋ se maapɩzɩɣ mɔnkɔɔ.’ 20 Tozo tʋ ñeheyi-i ɖɔɖɔ se: ‘Lɛɛlɛɛyɔ mankpaɣ halʋ, maapɩzɩɣ mɛnɖɛɛ meyebi-i.’ 21 Tʋmlaɖʋ ɛnʋ, ɛpɩsɩ ɛ-caa cɔlɔ nɛ ɛkɛdɩ-ɩ mbʋ pɩlɩwa yɔ. Peeye pɩwɩzɩ ɛlɛ pɩŋŋ nɛ ɛɖaɣnɩ-ɩ tiyuu se: ‘Wolo lɔŋ kɩyakɩŋ nɛ tɛtʋ pa-taa nɛ habɛɛ nɔsɩ nɛ ŋyaa kʋñɔndɩnaa nɛ mba pe-nesi camaa yɔ nɛ yʋlʋmaa nɛ kalɩkalasɩ nɛ pɔkɔɔ.’ 22 Ɛlabɩ mbʋ lɛ, ɛpɩsɩ eheyi-i se: ‘Caa! Malabɩ mbʋ ŋheyi-m yɔ nɛ ɖɩjaɣyɛ kazɩ yem.’ 23 Peeye ɛlɛ tasɩ-ɩ heyuu se: ‘Lɩɩ ŋwolo tɛyɛ nʋmɔŋ taa nɛ ɖenɖe sʋlʋmɩyaa cakɩ pasʋlʋmʋʋ yɔ nɛ ŋna mba lɛ, ŋcɛyɩ-wɛ nɛ pɔkɔɔ pasʋʋ man-ɖɩɣa taa nɛ kosu. 24 Meheyiɣ-mɩ se ɛyaa mba maaɖʋnɩ ñʋʋ yɔ, pa-taa nɔɔyʋ ɛɛkaɣ naʋ man-kazandʋ ndʋ tɩ-yɔɔ kaʋ.’ ”
Mbʋ pʋmʋnaa se ɛyʋ ɛla nɛ ɛkɛ Yesu tɔmkpɛlɩkɩyʋ yɔ
(Mat 10.37-38)
25 Nakʋyʋ wiye ɛyaa samaɣ nɛ Yesu pɔɖɔŋaɣ. Pɩkɛdaa lɛ, ɛkɛzɩ ɛ-tɩ nɛ pɔ-yɔɔ nɛ eheyi-wɛ se: 26 “Weyi ɛcaɣ se ɛtɩŋ-m yɔ, pʋwɛɛ se ɛsɔɔlɩ-m nɛ pɩkɩlɩ ɛ-caa nɛ e-ɖoo nɛ ɛ-halʋ nɛ e-piya nɛ ɛ-ɖalaa nɛ ɛ-kɔɔnaa nɛ ɛ-maɣmaɣ ɛ-tɩ. Pɩtɛkɛ mbʋ, ɛɛpɩzɩɣ ɛkɛ mɔn-tɔmkpɛlɩkɩyʋ. 27 Weyi ɛtatɩŋ ma-wayɩ nɛ ɛtɔɔ kʋñɔŋ siŋŋ*fɛ* yɔ, ɛɛpɩzɩɣ ɛkɛ mɔn-tɔmkpɛlɩkɩyʋ. \fm ɛ \fr (14.27) \fk Ɛtɔɔ kʋñɔŋ siŋŋ: \f ɩcɔnɩ Mat 10.38. 28 Toovenim lɛ, mɩ-taa weyi ɛmaɣ kuduyuu sɔsɔʋ nɛ ɛtacaɣ se ɛmaɣzɩ nɛ ɛna se e-liidiye talɩɣ-ɩ yaa ɖɩɩtalɩɣ-ɩ nɛ pʋcɔ? 29 Ye ɛtala mbʋ nɛ ɛkʋyɩ yem ɛpazɩ kiɖe sɩʋ nɛ ɛtapɩzɩ ɛma-kʋ nɛ kɩtɛ yɔ, ɛyaa kɔŋ powoŋ-i 30 nɛ pɔtɔ se: ‘Ɛnɛ ɛma kuduyuu nɛ ɛtapɩzɩ ɛtɛm-kʋ.’ 31 Mbʋ ɖɔɖɔ pʋwɛɛ. Ye wiyaʋ sɔsɔ nɔɔyʋ ewoki se ɛ nɛ wiyaʋ sɔsɔ lɛlʋ poyoo yɔ, ɛcakɩ ɛmaɣzɩ ɖeu nɛ ɛna se yoyaa sakɩyɛ mba ɛwɛna yɔ, papɩzɩɣ nɛ pa nɛ e-koyindu weyi ɛlɛ ñɩma kɩlɩ-ɩ tɔm naalɛ taa yɔ, poyoo yaa paapɩzɩɣ. 32 Ye ɛnawa se ɛɛpɩzɩɣ yɔ, ɛkʋsʋʋ ɛyaa nɛ etiyi-wɛ ɛlɛ cɔlɔ poliŋ taa se pɔpɔzɩ-ɩ se ɛbɛ pʋwɛɛ se ɛla nɛ ɛ nɛ ɛlɛ peceɣ.” 33 Peeye Yesu heyi-wɛ se: “Mbʋ ɖɔɖɔ mɩ-taa nɔɔyʋ ɛɛpɩzɩɣ ɛkɛ mɔn-tɔmkpɛlɩkɩyʋ nɛ eteyele mbʋ pɩtɩŋa payɩ ɛwɛna yɔ.”
Ɖɔm mbʋ pɩfɛyɩ wazaɣ yɔ
(Mat 5.13; Mrk 9.50)