Luka 16

Tʋmlaɖʋ ɛzaɣʋ nɔɔyʋ tɔm

¹ Yesu tasɩ ɛ-tɔmkpɛlɩkɩyaa tuuu eduuye se: “Ñɩm tʋ nɔɔyʋ kɛwɛnɩ tʋmlaɖʋ nɛ ɛcɔŋnɩ-ɩ ɛ-ñɩm yɔɔ. Nakʋyʋ wiye lɛ, powolo peheyi-i se: ‘Ña-tʋmlaɖʋ wɛɛkɩɣ ña-ñɩm.’ ² Pʋ-yɔɔ ɛya-ɩ nɛ eheyi-i se: ‘Ña! Manɩɣ pɔyɔɔdʋʋ ñɔ-tɔm se we? Kɛdɩ-m ɛzɩma mbʋ ña-tʋmɩyɛ ɖɔŋ yɔ. Ŋŋtasɩɣ kɛʋ man-tʋmlaɖʋ!’ ³ Peeye tʋmlaɖʋ ɛnʋ ɛhʋ ɛ-taa se: ‘Nɔɔnɔɔ man-caa lɩzɩɣ-m tʋmɩyɛ taa, malakɩ ɛzɩma lee? Mɛnfɛyɩ ɖoŋ se maahayɩ. Ŋgʋ, sʋlʋmʋʋ ñɛwɛ-m fɛyɛ. ⁴ Tɔɔ! Mansɩm mbʋ malakɩ nɛ ye pɔɖɔɔnɩ-m lɛ, ɛyaa kamʋ-m pɛ-tɛ yɔ.’ ⁵ Peeye etiyaa nɛ payaa ɛ-caa ɛnʋ ɛ-kɩndɩnaa kʋɖʋm kʋɖʋm. Pɔkɔma lɛ, ɛpɔzɩ kajalaɣ tʋ se: ‘Ɛzɩma ŋwɛnɩ man-caa kɩmɩyɛ?’ ⁶ Ɛlɛ se: ‘Num kɩpam ŋkpaŋ mɩnʋʋ mɛwɛnɩ-ɩ kɩmɩyɛ.’ Peeye tʋmlaɖʋ ɛnʋ eheyi-i se: ‘Ŋŋnaɣ ña-kɩmɩyɛ takayaɣ! Caɣ lɔŋ nɛ ŋma se ŋgbaŋ nɩɩnʋwa.’ ⁷ Ɛkʋyɩ ɛ-yɔɔ lɛ, ɛmaa lɛlʋ yɔɔ se: ‘Nɛ ña-yɔ, ɛzɩma ña-ñɩnɖɛ wɛɛ?’ Ɛlɛ cosi-i se: ‘Mɩla kutokiŋ mɩnʋʋ.’ Peeye eheyi-i se: ‘Ŋŋnaɣ ña-kɩmɩyɛ takayaɣ! Ma se kutokiŋ nɩɩnʋwa nɛ niidozo.’ ⁸ Pʋwayɩ lɛ, tʋmlaɖʋ ɛzaɣʋ ɛnʋ ɛ-caa yɩɣyɩ-ɩ ɛ-ajiitu yɔɔ. Mbʋ pʋyɔɔ yɔ, kedeŋa kanɛ ka-ñɩma wɛ ajiitu pa-lakasɩ taa nɛ pɩkɩlɩ ñalɩmɩyɛ taa ñɩma. ⁹ Ma meheyiɣ-mɩ se: ɩkpaɣ kedeŋa yɔɔ cɩnɛ ñɩm mbʋ ɩwɛna yɔ nɛ ɩñɩnɩnɩ ɛgbaadɩnaa nɛ ye pʋkɔm pɩtɛɖɩɣ-mɩ lɛ, Ɛsɔ kamʋ-mɩ ɛ-ɖɩɣa ŋga kaayɔkʋʋ kaʋ yɔ ka-taa. ¹⁰ Weyi ɛlakɩ mbʋ pʋpɔzʋʋ yɔ cikpem taa yɔ, ɛlakɩ ɖɔɖɔ mbʋ pʋpɔzʋʋ yɔ sɔsɔm taa. Weyi ɛlɛ muluu cikpem taa yɔ, emuluu ɖɔɖɔ sɔsɔm taa. ¹¹ Ye ɩtalabɩnɩ kedeŋa yɔɔ cɩnɛ ñɩm mbʋ pʋpɔzʋʋ yɔ lɛ, acɛlɩɣ-mɩ ñɩm maɣmaɣ siŋŋ yɔ? ¹² Ye ɩtalabɩnɩ lɛlʋ ñɩm mbʋ pʋpɔzʋʋ yɔ lɛ, acɛlɩɣ-mɩ mɩ-ñɩmbʋ yɔ?

¹³ Tʋmlaɖʋ nɔɔyʋ ɛɛpɩzɩɣ ɛla caanaa naalɛ tʋma. Ye ɛlakɩ mbʋ yɔ, ɛpaɖɩɣ lɛlʋ nɛ ɛsɔɔlɩ lɛlʋ. Yaa pʋtɔmaɣ yɔ, ɛnɩɣnɩ lɛlʋ nɛ eyele lɛlʋ. Mbʋ ɖɔɖɔ pʋwɛɛ: ɩɩpɩzɩɣ ɩsɔɔlɩ Ɛsɔ nɛ ɩtɛ ɩwɛɛ ñɩm laɣzaɣ.”

Yesu paɣʋ *Farɩsɩ ñɩma yɔ

(Mat 11.12-13; 5.31-32; Mrk 10.11-12)

¹⁴ Yesu yɔɔdaɣ mbʋ lɛ, *Farɩsɩ ñɩma nɩɩ tɔm ndʋ tɩtɩŋa. Peeye powoŋ-i, mbʋ pʋyɔɔ yɔ, pɛwɛ liidiye laɣzaɣ. ¹⁵ Pʋ-yɔɔ Yesu heyi-wɛ se: “Ɩcaɣ se ɛyaa ɩna-mɩ se ɩkɛ kʋtʋʋzaa, ɛlɛ, Ɛsɔ ñasɩm mɩ-lɩmaɣza tɩŋa. Mbʋ ɛyaa maɣzɩɣ se pɩkɩlɩ pɩtɩŋa payɩ yɔ, Ɛsɔ ɛɛcaɣ se ɛna-pʋ ɛ-ɛsɩndaa kpem.

¹⁶ Paawɩlɩ *Mooyiizi paɣtʋ nɛ lɔɔyɩsɩ tɩnaa takayɩsɩ taa tɔm nɛ pʋkɔɔ pɩtalɩ Lɩm Sɔʋ Sɔnzɩ Laɖʋ Yohanɛɛsɩ alɩwaatʋ. Ɖooo alɩwaatʋ ndʋʋ papazɩ Ɛsɔ Kewiyaɣ Laŋhɛzɩyɛ Tɔm susuu nɛ paa weyi ɛlʋkɩ se ɛsʋʋ ka-taa. ¹⁷ Paa mbʋ yɔ, ɛsɔtɔnʋʋ nɛ tɛtʋ pa-mʋʋʋ fɛyɩ kaɖɛ nɛ pɩtalɩ paɣtʋ ndʋ tɩ-mayaɣ nakɛyɛ mʋʋʋ.” ¹⁸ Pʋwayɩ lɛ, Yesu tasɩ-wɛ heyuu se: “Ye nɔɔyʋ ɛɖɔɔnɩ ɛ-halʋ nɛ ɛkpaɣ kɩfalʋ yɔ, ɛlabɩ hayitu. Ɖɔɖɔ lɛ, ye pekizi halʋ nɛ nɔɔyʋ kpaɣ-ɩ yɔ, pʋdʋ labɩ hayitu.”

Ñɩm tʋ nɛ Lazaarɩ pɔ-tɔm

¹⁹ Pʋwayɩ lɛ, Yesu tuu-wɛ eduuye se: “Abalʋ ñɩm tʋ nɔɔyʋ kɛwɛnɩ mbʋ, esuu awiitokonaa ɖeu ñɩlɩ ñɩlɩ nɛ ɛtɔkɩ leleŋ leleŋ paa ɖooye. ²⁰ Kʋñɔndʋ nɔɔyʋ ñaawɛɛ, payaɣ-ɩ se Lazaarɩ. Ɛtɩŋa ɛ-yɔɔ nɛ heŋ tɔ tɔ nɛ ɛhɛnɩɣ ñɩm tʋ ɛnʋ ɛ-nɔnɔɔ taa. ²¹ Ɛɛsɔɔlaa siŋŋ se ɛtɔzɩ mbʋ ñɩm tʋ ɛnʋ ɛtɔkɩ nɛ pʋtɔlʋʋ tataa yɔ nɛ ɛtɔɔ. Ɖɔɖɔ lɛ, hasɩ wokaɣ nɛ sineziɣ e-heŋ taa. ²² Nakʋyʋ wiye lɛ, kʋñɔndʋ ɛnʋ ɛsɩ nɛ Ɛsɔ *tiyiyaa kpaɣ-ɩ powoni-i lone kɩbanɖɛ taa Abraham cɔlɔ. Pʋwayɩ lɛ, ñɩm tʋ ɛnʋ ɛsɩ ɖɔɖɔ nɛ pebim-i ²³ nɛ ɛsʋʋ tɛtɛɛ ɖenɖe kʋñɔŋ pɩɩtɛŋ wɛɛ yɔ. Ɛwɛ peeye mbʋ lɛ, ɛkʋsɩ ɛ-ɛza nɛ elosi Abraham poliŋ taa, Lazaarɩ wɛ ɛ-cɔlɔ. ²⁴ Peeye ɛmabɩ kubuka se: ‘Hayɩ mɔn-cɔzɔ Abraham! Na man-pʋtɔdɩyɛ nɛ ŋtiyi Lazaarɩ nɛ elii lɩm e-niye nɔɔ taa nɛ elizi me-liu tɛɛ nɛ piniɣdi-m. Mbʋ pʋyɔɔ yɔ, malakɩ kʋñɔŋ pɩŋŋ miŋ ɛnɛ ɛ-taa.’ ²⁵ Ɛlɛ, Abraham cosi-i se: ‘Man-sayɩ! Tɔzɩ se Lazaarɩ lakaɣ kʋñɔŋ kedeŋa yɔɔ lɛ, ñaawɛɛ ŋtɔkɩ leleŋ. Lɛɛlɛɛyɔ Lazaarɩ laŋɩyɛ ñɛhɛ cɩnɛ lɛ, ñalakɩ kʋñɔŋ. ²⁶ Ɖɔɖɔ lɛ, pɔʋ sɔsɔʋ nakʋyʋ wɛ ɖa nɛ mɩ ɖɛ-hɛkʋ taa se paa nɔɔyʋ ɛcaɣ se ɛtɛzɩ mɩ-cɔlɔ yɔ, ɛtaapɩzɩ. Kʋ-yɔɔ ɖɔɖɔ mɩ-cɔlɔ tʋ nɔɔyʋ ɛɛpɩzɩɣ ɛlɩɩ ɛtɛzɩ ɖɔ-cɔlɔ cɩnɛ.’ ²⁷ Ɛlɛ abalʋ ɛnʋ ɛtasɩ-ɩ heyuu se: ‘Caa! Ye mbʋ mentendiɣ-ŋ se ŋtiyi Lazaarɩ man-caa ɖɩɣa taa. ²⁸ Mɛwɛnɩ newaa kagbaanzɩ. Ewolo ɛka pa-ñʋŋ taa ɖeu nɛ pataakɔɔ pasʋʋ kʋñɔŋ kʋnɛ kɩ-taa ɖɔɖɔ.’ ²⁹ Abraham cosi-i se: ‘Ñe-newaa wɛnɩ *Mooyiizi nɛ lɔɔyɩsɩ tɩnaa pa-takayɩsɩ. Pakalɩ-sɩ nɛ panɩɩ.’ ³⁰ Peeye abalʋ ɛnʋ eheyi-i se: ‘Caa Abraham! Ye sɩɖaa taa nɔɔyʋ ɛpɩsɩna nɛ ɛmaɣnɩ-wɛ yɔ, pɛlɛɣzɩɣ wɛtʋ.’ ³¹ Ɛlɛ Abraham tasɩ-ɩ heyuu se: ‘Ye patanɩɩ Mooyiizi nɛ lɔɔyɩsɩ tɩnaa pa-takayɩsɩ taa tɔm yɔ, paa sɩɖaa taa nɔɔyʋ efema nɛ ewolo eheyi-wɛ yɔ, paatisiɣ ɛ-tɔm ɖɔɖɔ.’ ”