Yesu wokuu Yeruusalɛm yɔ
(Mat 21.1-11; Luk 19.28-40; Yoh 12.12-19)
11
1 Yesu nɛ ɛyaa samaɣ ŋga katɩŋaɣ-ɩ yɔ, pɔñɔtɩnɩ Yeruusalɛm Bɛtfaajee nɛ Betaanii pɔ-hɔɔlʋʋ taa *Somiŋ Pʋʋ liu tɛɛ lɛ, etiyi ɛ-tɔmkpɛlɩkɩyaa naalɛ se: 2 “Iwolo tɛtʋ cikpetu ndʋ tɩwɛ ɛsɩndaa yɔ tɩ-taa. Ɩtalɩɣ lɛ, ɩmakɩnɩ paɖɩ kpaŋaɣ piye naɖɩyɛ. Nɔɔyʋ tacaɣdɩ ɖɩ-yɔɔ. Ɩkpɛzɩ-ɖɩ nɛ ɩkɔna. 3 Ye nɔɔyʋ ɛpɔzɩ-mɩ se: ‘Pɩlabɩ ɛzɩma nɛ ɩkpɛzɩɣ-ɖɩ’ lɛ, iheyi-i se: ‘Kɩpaɣlʋ liu wɛ-ɖɩ, ɩpɩsɩɣnɩ-ɖɩ lɛɛlɛɛyɔ.’ ” 4 Ɛ-tɔmkpɛlɩkɩyaa woba lɛ, pamaɣnɩ paɖɩ-ɖɩ nʋmɔʋ nɔɔ ɖɩɣa nakɛyɛ nɔnɔɔ taa nɛ pacaɣ se pɛkpɛzɩ-ɖɩ. 5 Ɛlɛ mba pɛwɛ peeye yɔ, pa-taa nabɛyɛ pɔzɩ-wɛ se: “Ɛbɛ ɩlakɩ peeye yɔ? Ɩkpɛzɩɣ kpaŋaɣ piye nɖɩ se ɩlabɩnɩ we?” 6 Ɛlɛ, pocosi ɛzɩ Yesu keheyuu-wɛ yɔ nɛ peyebi-wɛ nɛ pɛɖɛnɩ-ɖɩ. 7 Patanɩ kpaŋaɣ piye nɖɩ Yesu cɔlɔ lɛ, pɔhɔzɩ po-wondu lɛɛtʋ nɛ pɔpɔ ɖɩ-yɔɔ nɛ ɛkpa ɛcaɣ. 8 Ɛyaa sakɩyɛ hɔzɩ po-wondu lɛɛtʋ nɛ pɔpɔ nʋmɔʋ taa nɛ lɛlaa pɔ hatʋ ndʋ paacɛbɩ hayɩm taa yɔ se paɖʋ-ɩ hɩɖɛ. 9 Mba paawɛ Yesu ɛsɩndaa nɛ mba patɩŋaɣ ɛ-wayɩ yɔ, pokou se:
“*Ozaana! Ɛsɔ ɛwazɩ weyi ɛkɔŋ Kɩpaɣlʋ lone taa yɔ ɛ-yɔɔ.
10 Ɛsɔ ɛwazɩ weyi ɛtɔkɩ ɖɔ-cɔzɔ *Daaviidi kewiyaɣ yɔ ɛ-yɔɔ.
Ozaana! Ɖooo ɛsɔdaa.”
11 Yesu nɛ ɛ-tɔmkpɛlɩkɩyaa hiu nɛ naalɛ patalɩ Yeruusalɛm lɛ, ɛsʋʋ Ɛsɔ ɖɩɣa taa. Ɛna mbʋ pɩtɩŋa payɩ pɩlakaɣ yɔ lɛ, ɛlɩɩ nɛ pɛɖɛɛ Betaanii. Mbʋ pʋyɔɔ yɔ, wɩsɩ kpɛdɛsaa.
Yesu wɩlʋʋ hiyuu kpalʋʋ yɔ
(Mat 21.18-19)
12 Tɛʋ fema nɛ palɩɩ Betaanii tɛtʋ wayɩ lɛ, ñɔɔsɩ wɩɣ Yesu. 13 Peeye elosi hiyuu poliŋ taa, kʋlɔba kpemm nɛ ewolo kʋ-cɔlɔ se ɛna se ye kʋlʋlaa yɔ, ɛtɔɔ. Ɛtalɩ kɩ-tɛɛ lɛ, ɛmaɣnɩ hatʋ ɖeke, kɩtalʋlɩ. Mbʋ pʋyɔɔ yɔ, pɩtɛkɛ kʋ-lʋlʋʋ alɩwaatʋ. 14 Peeye Yesu wɩlɩ-kʋ kpalʋʋ se: “Ña! Ŋtasɩ lʋlʋʋ nɛ nɔɔyʋ tɔɔ lɛ, maana.” Ɛlɛ, ɛ-tɔmkpɛlɩkɩyaa nɩɩ tɔm ndʋ mbʋ.
Yesu ɖɔɔnʋʋ tadɩyɛ tɩnaa Ɛsɔ ɖɩɣa taa yɔ
(Mat 21.12-17; Luk 19.45-48; Yoh 2.13-22)
15 Papɩsɩ Yeruusalɛm lɛ, Yesu sʋʋ Ɛsɔ ɖɩɣa kadaɣ taa nɛ ɛpazɩ ɖɔɔnʋʋ pɛdɩyaa nɛ yaɖaa. Etuzi liidiye yɔkɩyaa taabɩlɩnaa nɛ halikukunaa pɛdɩyaa kpelisi nɛ ɛpɛɖɩ. 16 Etetisiɣ se nɔɔyʋ ɛsɩɣlɩ pʋyʋ nɛ ɛtɩŋnɩ Ɛsɔ ɖɩɣa taa. 17 Peeye eheyi mba pɛwɛ peeye yɔ se: “Ɛsɔ yɔɔdaa nɛ pama ɛ-takayaɣ taa se: ‘Man-ɖɩɣa kɛɣnɩ ajɛɛ kpeekpe Ɛsɔ ɖɩsɛyɛ.’ Ŋgʋ, mɩ mɩpɩsɩ-kɛ mɩlaa ñɩŋga.”
18 *Yuda ñɩma *cɔjɔnaa *sɔsaa nɛ pa-paɣtʋ wɩlɩyaa panɩ mbʋ lɛ, pañɩnɩɣ nʋmɔʋ ŋgʋ paatɩŋ nɛ pakʋ-ɩ yɔ. Pʋcɔ peseɣaɣ-ɩ, mbʋ pʋyɔɔ yɔ, tɔm ndʋ ɛyɔɔdaɣ yɔ, tɩɩkɛdɩnɩ ɛyaa samaɣ pɩtɩɩfɛyɩ.
19 Wɩsɩ wokaɣ ɖʋʋ lɛ, Yesu nɛ ɛ-tɔmkpɛlɩkɩyaa pakʋyɩ Yeruusalɛm peeye nɛ pɛɖɛɛ.
Hiyuu wɩlʋʋ tɔm
(Mat 21.20-22)
20 Tɛʋ fem tanaŋ tɛɛ nɛ pɛɖɛɣ lɛ, ɛ-tɔmkpɛlɩkɩyaa na hiyuu ŋgʋ, kɩwɩlɩ wɔɔɔ nɛ pɩkpɛndɩnɩ ki-lila. 21 Peeye Pɩyɛ tɔzɩ mbʋ pɩɩlaba yɔ pʋ-yɔɔ nɛ ɛtɔ se: “Wɩlɩyʋ, cɔnɩ ŋna hiyuu ŋgʋ ŋwɩlɩ kpalʋʋ yɔ kɩwɩlʋʋ wɔɔɔ.” 22 Ɛlɛ, Yesu heyi ɛ-tɔmkpɛlɩkɩyaa se: “Ɩwɛnɩ lidaʋ Ɛsɔ yɔɔ. 23 Toovenim lɛ, meheyiɣ-mɩ se ye nɔɔyʋ eheyi pʋʋ kʋnɛ se: ‘Pʋʋ ña, kpɛzɩ nɛ ŋwolo ŋtɔlɩ teŋgu taa’ nɛ ye ɛwɛnɩ lidaʋ se ndʋ ɛyɔɔdaa yɔ tɩlakɩ nɛ ɛtapʋtɩ ɛ-taa yɔ, pɩlakɩ mbʋ ɖɔɖɔ. 24 Pʋ-yɔɔ meheyiɣ-mɩ se mbʋ pɩtɩŋa ɩsʋlʋmʋʋ Ɛsɔ yɔ, ɩwɛnɩ lidaʋ se paa pɩɩla ɛzɩma, ɛhaɣ-mɩ-pʋ. Pʋbʋ, pɩlakɩ mbʋ ɖɔɖɔ. 25 Alɩwaatʋ ndʋ ɩkʋyʋʋ se ɩsɛɣ Ɛsɔ yɔ, ye mɩ nɛ nɔɔyʋ ɩwɛ tɔm yɔ, ikpeɣ pʋdʋ. Peeye mɩ-Caa weyi ɛwɛ ɛsɔdaa yɔ, ekpeɣiɣ-mɩ mɩ-kɩwɛɛkɩm ɖɔɖɔ. [\v 26 Ɛlɛ, ye lɛlaa ɛyʋsʋʋnɩ-mɩ nɛ iikpeɣiɣ-wɛ pa-kɩwɛɛkɩm yɔ, mɩ-Caa weyi ɛwɛ ɛsɔdaa yɔ, ɛlɛ eekpeɣiɣ-mɩ ɖɔɖɔ mɩ-ñɩmbʋ.]”
Pɔpɔzʋʋ Yesu se aha-ɩ nɔɔ yɔ
(Mat 21.23-27; Luk 20.1-8)
27 Pʋwayɩ lɛ, Yesu nɛ ɛ-tɔmkpɛlɩkɩyaa patasɩ Yeruusalɛm pɩsʋʋ. Patalaa lɛ, ɛsʋʋ Ɛsɔ ɖɩɣa kadaɣ taa nɛ ɛcɔʋ. Peeye *Yuda ñɩma *cɔjɔnaa *sɔsaa nɛ pa-paɣtʋ wɩlɩyaa nɛ pɛ-ɛgbɛyɛ taa *sɔsaa powobi ɛ-cɔlɔ 28 nɛ pɔpɔzɩ-ɩ se: “Aha-ŋ nɔɔ se ŋɖɔɔnɩ ɛyaa? Aha-ŋ waɖɛ se ŋla mbʋ?” 29 Peeye Yesu heyi-wɛ se: “Mɔnpɔzʋʋ-mɩ tɔm kʋɖʋmtʋ koŋ nɛ ye icosi-m lɛ, meheyi-mɩ weyi ɛha-m nɔɔ se mala mbʋ yɔ. 30 Mɔnpɔzʋʋ-mɩ se: atiyi Yohanɛɛsɩ se ɛla ɛyaa *lɩm sɔʋ sɔnzɩ? Ɛsɔ yaa ɛyaa tiyini-i? Icosi nɛ manɩɩ.” 31 Ɛlɛ, pɔyɔɔdɩnɩ ɖama se: “Ye ɖicosaa se: ‘Ɛsɔ tiyini-i’ yɔ, ɛpɔzʋʋ-ɖʋ se: ‘Nɛ pɩla ɛzɩma ɖɩtamʋ ɛ-tɔm yɔ?’ 32 Ŋgʋ, ɖɩtɔm se: ‘Ɛyaa tiyini-i’ yɔ, pɩɩlakɩ.”