Halʋ nɛ ɛ-walʋ pekizuu ɖama yɔ
(Mat 19.1-12; Luk 16.18)
10
1 Yesu tɛm-wɛ wɩlʋʋ mbʋ lɛ, ɛkʋyɩ ewolo Yudee egeetiye taa nɛ ɛtɛzɩ Yɔɔrdaŋ pɔɔ wayɩ. Ɛtɛzaa lɛ, ɛyaa samaɣ tasɩ kpeɣluu ɛ-cɔlɔ nɛ ɛpazɩ-wɛ wɩlʋʋ ɛzɩ ɛtɩɩlakʋʋ yɔ. 2 Peeye Farɩsɩ ñɩma nabɛyɛ wobi pañɩ ɛ-nɔɔ cɔlɔ tɔm se: “Ɖa-paɣtʋ taa lɛ, pɩha nʋmɔʋ se ɛyʋ pɩzɩɣ ɛɖɔɔnɩ ɛ-halʋ naa we?” 3 Yesu pɔzɩ-wɛ se: “Paɣtʋ ndʋ *Mooyiizi ɖʋ-mɩ?” 4 Pocosi-i se: “Mooyiizi ha nʋmɔʋ se ɛyʋ pɩzɩɣ ɛma kizuu takayaɣ nɛ ɛcɛlɩ ɛ-halʋ nɛ ɛɖɔɔnɩ-ɩ.” 5 Peeye Yesu cosi-wɛ se: “Mɩ-laŋa kpɩzɩŋ yɔɔ Mooyiizi ɖʋ-mɩ paɣtʋ mbʋ. 6 Ɖooo kajalaɣ lɛ, Ɛsɔ labɩ pɩtɩŋa nɛ ɛla halʋ nɛ abalʋ ɖɔɖɔ. 7 Pʋ-yɔɔ abalʋ yeki ɛ-caa nɛ e-ɖoo nɛ ɛnɩnɩ ɛ-halʋ 8 nɛ pa-naalɛ papɩsɩ ɛyʋ kʋɖʋm. Patatasɩ kɛʋ ɛyaa naalɛ. Ɛlɛ, papɩsɩ ɛyʋ kʋɖʋm. 9 Ye mbʋ, pɩtamʋnɩ se ɛyʋ ɛyasɩ mbʋ Ɛsɔ kpɛndaa yɔ.”
10 Yesu nɛ ɛ-tɔmkpɛlɩkɩyaa pasʋ ɖɩɣa lɛ, paɖaɣnɩ-ɩ pɔzʋʋ tɔm ndʋ. 11 Ɛlɛ ecosi-wɛ se: “Ye ɛyʋ ɛɖɔɔnɩ ɛ-halʋ nɛ ɛkpaɣ lɛlʋ yɔ, ɛyʋsɩnɩ kajalaɣ ñɩnʋ, ɛlabɩ hayitu. 12 Mbʋ ɖɔɖɔ ye halʋ nɔɔyʋ ekizi ɛ-walʋ nɛ ɛɖɛɛ ɛwalɩ kɩfalʋ yɔ, ɛlabɩ hayitu.”
Yesu wazʋʋ piya cikpesi yɔɔ yɔ
(Mat 19.13-15; Luk 18.15-17)
13 Pɩkɛdaa lɛ, ɛyaa wokini piya Yesu cɔlɔ se ɛtɩnɩ sɩ-yɔɔ nesi nɛ ɛwazɩ sɩ-yɔɔ. Peeye ɛ-tɔmkpɛlɩkɩyaa ɖaŋ-wɛ. 14 Yesu na mbʋ lɛ, pɩtɛkɛdɩnɩ-ɩ, ɛlɛ ɛkalɩ ɛ-tɔmkpɛlɩkɩyaa se: “Iyele piya nɛ sɩkɔɔ mɔn-cɔlɔ, ɩtaaɖaŋ-sɩ. Mbʋ pʋyɔɔ yɔ, mba pɛwɛ ɛzɩ piya nzɩ yɔ lɛ Ɛsɔ Kewiyaɣ taa ñɩma. 15 Toovenim lɛ, meheyiɣ-mɩ se ye nɔɔyʋ etetisi ɛzɩ piya cikpesi tisuu se Ɛsɔ tɔkɩnɩ kewiyaɣ yɔ yɔ, ɛɛsʋʋ Ɛsɔ Kewiyaɣ taa.” 16 Peeye Yesu kpaɣ piya nzɩ ɛ-yɔɔ nɛ ɛtɩnɩ sɩ-yɔɔ nesi nɛ ɛwazɩ sɩ-yɔɔ.
Ñɩm tʋ nɔɔyʋ tɔm
(Mat 19.16-30; Luk 18.18-30)
17 Yesu tɛm piya yɔɔ wazʋʋ nɛ ɛkpaɣ nʋmɔʋ lɛ, abalʋ nɔɔyʋ kpaɣ seya nɛ ewolo eluŋ ɛ-tɛɛ nɛ ɛpɔzɩ-ɩ se: “Wɩlɩyʋ kɩbanʋ! Ɛbɛ pʋwɛɛ kpem se mala nɛ mehiɣ wezuu pɩɩtɛŋ?” 18 Peeye ɛpɔzɩ-ɩ se: “Pɩlabɩ ɛzɩma nɛ ŋyaɣ-m se kɩbanʋ? Nɔɔyʋ tɛkɛ kɩbanʋ nɛ pɩtasɩnɩ Ɛsɔ. 19 Paa pɩɩla ɛzɩma, ŋsɩm Ɛsɔ paɣtʋ ndʋ paɖʋwa se: taakʋ ɛyʋ, taala hayitu, taamɩlɩ, taacɛtɩnɩ lɛlʋ taa, taacɛzɩ lɛlaa nɛ ŋtɔɔ pa-ñɩm nɛ ŋña ña-caa nɛ ño-ɖoo yɔ.” 20 Peeye abalʋ ɛnʋ eheyi-i se: “Wɩlɩyʋ! Mɔnɖɔm paɣtʋ ndʋ tɩtɩŋa payɩ tɩ-yɔɔ ɖooo me-evebutu taa.” 21 Yesu cɔnɩ-ɩ pɩŋŋ lɛ, ɛ-tɔm kɛdɩnɩ-ɩ nɛ eheyi-i se: “Pʋyʋ kʋɖʋm koŋ pɩkazaa se ŋtɛzɩ labʋ. Wolo ŋpɛdɩ mbʋ ŋwɛna yɔ pɩtɩŋa payɩ nɛ ŋtayɩ kʋñɔndɩnaa pi-liidiye nɛ ŋwɛnɩ ñɩm ɛsɔdaa. Ye ŋlabɩ mbʋ lɛ, ŋkɔɔ ŋtɩŋ-m.” 22 Eheyi abalʋ ɛnʋ mbʋ lɛ, ɛlɛ laŋɩyɛ wɛɛkɩ nɛ ɛñɩŋ ɛsɩndaa nɛ ɛcaŋ ɛɖɛɛ hɛɛɛ. Mbʋ pʋyɔɔ yɔ, ɛwɛnɩ ñɩm pɩtɩɩfɛyɩ.
23 Ɛɖɛwa lɛ, Yesu cɔnɩ ɛ-tɔmkpɛlɩkɩyaa mba pɛwɛ ɛ-cɔlɔ yɔ pɛ-ɛsɩndaa kpɛɛɛ nɛ eheyi-wɛ se: “Pʋwɛ kaɖɛ pɩtɩɩfɛyɩ se ñɩm tɩnaa ɛsʋʋ Ɛsɔ Kewiyaɣ taa.” 24 Ɛyɔɔdɩ mbʋ lɛ, pɩlabɩ-wɛ piti. Peeye Yesu tasɩ-wɛ heyuu se: “Men-piya, ɩcɔnɩ ɩna ɛzɩma mbʋ pʋwɛ kaɖɛ kpem mba pataɣ pa-ñɩm yɔ se pasʋʋ Ɛsɔ Kewiyaɣ taa yɔ. 25 Pʋcɔ ñɩm tʋ nɔɔyʋ sʋʋ ka-taa lɛ, pʋwɛ kaɖɛ nɛ pɩkɩlɩ ɛzɩ kʋyʋndʋʋ kpaŋnɔ sʋʋnɩ ɛjɔʋ pɔʋ taa yɔ.”ILLUSTRATION 08
26 Peeye pɩtɛzɩ-wɛ ɖɩɣzʋʋ nɛ pɔpɔzʋʋ ɖama se: “Ye mbʋ, apɩzɩɣ ehiɣ ñʋʋ yabʋ yɔ?” 27 Yesu cɔnɩ-wɛ pɩŋŋ lɛ, eheyi-wɛ se: “Ɛyaa ɛɛpɩzɩɣna, ɛlɛ, Ɛsɔ ñapɩzɩɣ, mbʋ pʋyɔɔ yɔ, ɛpɩzɩɣ ɛla pɩtɩŋa payɩ.”
28 Peeye Pɩyɛ pɔzɩ-ɩ se: “Cɔnɩ ŋna, ɖa yɔ, ɖiyebi pɩtɩŋa payɩ nɛ ɖɩtɩŋ ña-wayɩ, ɛbɛ ɖihikiɣ yɔ?” 29-30 Yesu cosi-i se: “Toovenim lɛ, meheyiɣ-mɩ se ye nɔɔyʋ eyebi ɛ-caa yaa e-ɖoo yaa e-piya yaa ɛ-ɖalaa yaa ɛ-kɔɔnaa yaa e-newaa yaa ɛ-hayɩm yaa ɛ-ɖɩɣa yaa mbʋ pɩtɩŋa payɩ ɛwɛna yɔ ma nɛ Laŋhɛzɩyɛ Tɔm ɖɔ-yɔɔ yɔ, ɛkɔŋ wɛnaʋ mbʋ mbʋ ɛɛwɛna yɔ tɔm mɩnʋʋ. Ɖɔɖɔ lɛ, ɛyaa wɛɣ ɛ-wayɩ kaŋ kaŋ kedeŋa yɔɔ cɩnɛ. Piyele alɩwaatʋ ndʋ tɩkɔŋ yɔ tɩ-taa lɛ, ɛkɔŋ hiɣu wezuu pɩɩtɛŋ.” 31 Peeye Yesu tasɩ-wɛ heyuu se: “Mba pɛkɛ sɔsaa lɛɛlɛɛyɔ yɔ, pa-taa sakɩyɛ kɔŋ pɩsʋʋ cikpema nɛ mba paba kɛ cikpema lɛɛlɛɛyɔ yɔ, pa-taa sakɩyɛ ñapɩsɩ sɔsaa.”
Yesu yɔɔdʋʋ tozo ɖeɖe ɛ-sɩm nɛ e-fem pɔ-tɔm yɔ
(Mat 20.17-19; Luk 18.31-34)
32 Yeruusalɛm Yesu nɛ ɛ-tɔmkpɛlɩkɩyaa pakpaɣaɣ nɛ ɛyɔɔdʋʋ mbʋ. Ɛɛɖɛ-wɛ nɔɔ nɛ ɛyaa sakɩyɛ tɩŋɩɣ-wɛ. Pakpaɣaɣ mbʋ lɛ, ɛ-tɔmkpɛlɩkɩyaa laŋɩyɛ lɩɣ nɛ sɔɔndʋ kpaɣ ɛyaa mba patɩŋaɣ-wɛ yɔ. Peeye ɛya ɛ-tɔmkpɛlɩkɩyaa hiu nɛ naalɛ mba nɛ ɛkɛzɩ-wɛ hɔɔlʋʋ nɛ eheyi-wɛ mbʋ pʋkɔŋ-ɩ tɛmnaʋ alɩwaatʋ pazɩ taa yɔ. 33 Eheyi-wɛ se: “Ɖɩkpaɣʋ Yeruusalɛm yɔ, pakpaɣ Ɛyʋ Pɩyalʋ nɛ paɖʋzɩ-ɩ *cɔjɔnaa *sɔsaa nɛ paɣtʋ wɩlɩyaa pe-nesi taa. Paba kʋʋ ɛ-tɔm nɛ paɖʋ se pakʋ-ɩ nɛ pakpaɣ-ɩ paɖʋzɩ mba pɛtɛkɛ Yuda ñɩma yɔ pe-nesi taa 34 nɛ paba woŋ-i nɛ pɔtɔ ɛ-yɔɔ ndaatʋ nɛ polu-i agbazɛɛ nɛ pakʋ-ɩ nɛ ɛsɩ. Kɩyakɩŋ naadozo wayɩ lɛ, Ɛsɔ fezi-i.”
Mbʋ Yakubu nɛ Yohanɛɛsɩ pɔpɔzɩ Yesu yɔ
(Mat 20.20-28)
35 Yesu tɛm yɔɔdʋʋ lɛ, Zebedee pɩyalaa Yakubu nɛ Yohanɛɛsɩ powolo ɛ-cɔlɔ nɛ peheyi-i se: “Wɩlɩyʋ, ɖɩcaɣ se ŋlabɩ-ɖʋ mbʋ ɖɩsʋlʋmʋʋ-ŋ yɔ.” 36 Peeye ɛpɔzɩ-wɛ se: “Ɛbɛ ɩcaɣ se malabɩ-mɩ?” 37 Pocosi-i se: “Ɖe-liu wɛɛ se ŋkɔm ŋcaɣ ñe-kewiyaɣ kpelaɣ yɔɔ lɛ, ŋyele nɛ ɖɩcaɣ ñɔ-cɔlɔ: lɛlʋ ña-nɩwaŋ yɔɔ nɛ lɛlʋ ña-nɩmɩyɛ yɔɔ.” 38 Peeye Yesu heyi-wɛ se: “Ɩɩsɩŋ mbʋ ɩsʋlʋmʋʋ yɔ. Ɩpɩzɩɣ ɩtɔɔ kʋñɔŋ sɔsɔʋ ŋgʋ mɔnkɔŋ tɔɔʋ yɔ? Ɩpɩzɩɣ ɩnɩɩ siziŋ weyi mɔnkɔŋ nɩʋ yɔ?” 39 Pocosi-i se: “Ɛɛɛ! Ɖɩpɩzɩɣ ɖɩtɔɔ-kʋ.” Yesu pɩsɩnɩ-wɛ se: “Toovenim ɩkɔŋ tɔɔʋ kʋñɔŋ sɔsɔʋ ŋgʋ mɔntɔkɩ yɔ nɛ ɩnɩɩ siziŋ weyi manɩɣ yɔ. 40 Ɛlɛ, ma-nɩwaŋ yɔɔ nɛ ma-nɩmɩyɛ yɔɔ caɣʋ ñɩndʋ lɛ, pɩtɛkɛ mahaɣnɩ nʋmɔʋ. Mba Ɛsɔ liu wɛɛ se pacaɣ lona ana a-taa yɔ, mba cakɩna.”
41 Yesu tɔmkpɛlɩkɩyaa hiu mba pɩkazaa yɔ, paba nɩ mbʋ lɛ, pa-taa wɩnɩ Yakubu nɛ Yohanɛɛsɩ. 42 Peeye Yesu ya patɩŋa nɛ eheyi-wɛ se: “Ɩtɛm sɩm se mba pɔcɔŋnɩ-wɛ se pɛkɛ awiya sɔsɔna yɔ, mba nuutuuni pa-ajɛɛ taa ñɩma nɛ sɔsaa ñawɩlɩɣ-wɛ po-ɖoŋ ɖɔɖɔ. 43 Mɩ lɛ, wɛtʋ ndʋ tɩtaawɛɛ mɩ-hɛkʋ taa. Ye mɩ-taa nɔɔyʋ ɛcaɣ se ɛkɛ sɔsɔ yɔ, pʋdʋ ɛpɩsɩ mɩ-tʋmlaɖʋ. 44 Ye nɔɔyʋ ɛcaɣ se ɛkɛ mɩ-ñʋʋ tʋ yɔ, pʋdʋ ɛpɩsɩ mɩtɩŋa mi-yom. 45 Mbʋ pʋyɔɔ yɔ, Ɛyʋ Pɩyalʋ tɔkɔɔ se ɛyaa ɛlabɩ-ɩ tʋmɩyɛ. Ɛlɛ, ɛkɔm se ɛla ɛyaa tʋmɩyɛ nɛ ɛkpaɣ ɛ-maɣmaɣ ɛ-tɩ ɛhɛyɩ pɔ-yɔɔ nɛ puholi pa-taa sakɩyɛ.”
Yʋlʋm Bartiimee yɔɔ cɛbʋ yɔ
(Mat 20.29-34; Luk 18.35-43)
46 Pʋwayɩ lɛ, Yesu nɛ ɛ-tɔmkpɛlɩkɩyaa patalɩ Yeriikoo tɛtʋ taa. Palɩ tɩ-taa se pɛɖɛɣ nɛ ɛyaa samaɣ tɩŋɩɣ pa-wayɩ lɛ, pamaɣnɩ Tiimee pɩyalʋ yʋlʋm weyi payaɣ se Bartiimee yɔ. Ɛcaɣ nʋmɔʋ nɔɔ nɛ ɛsʋlʋmʋʋ. 47 Ɛnɩ Nazarɛɛtɩ tʋ Yesu taŋ lɛ, ɛma kubuka se: “Wiyaʋ Daaviidi Sayɩ Yesu! Na man-pʋtɔdɩyɛ.” 48 Peeye ɛyaa sakɩyɛ ñazɩ-ɩ se: “Su peeye.” Ɛlɛ, ɛtɛzɩ kubuka mabʋ ɖoŋ se: “Wiyaʋ Daaviidi Sayɩ! Na man-pʋtɔdɩyɛ.” 49 Ɛlɛ, Yesu sɩŋ nɛ ɛtɔ se payaa-ɩ, nɛ peheyi yʋlʋm ɛnʋ se: “Ñaɣ pana ŋkʋyɩ, Yesu yaɣ-ŋ.” 50 Peeye ɛlɔ e-toko sɔsɔʋ nɛ ɛkʋyɩ kpaka nɛ ewolo Yesu cɔlɔ. 51 Ɛtalaa lɛ, Yesu pɔzɩ-ɩ se: “Ŋcaɣ se malabɩ-ŋ we?” Yʋlʋm ɛnʋ ecosi-i se: “Wɩlɩyʋ, mancaɣ se ŋla nɛ mɛ-ɛza kuli.” 52 Peeye Yesu heyi-i se: “Wolo, lidaʋ ŋgʋ ŋwɛnɩ mɔ-yɔɔ yɔ, kɩyabɩ ña-ñʋʋ.” Ɛlɛ, ɛtɩpazɩ naʋ nɛ ɛtɩŋɩɣ Yesu wayɩ.