9
1 Pʋwayɩ lɛ, Yesu tasɩ-wɛ heyuu se: “Toovenim lɛ, meheyiɣ-mɩ se mba pɛwɛ cɩnɛ yɔ, pa-taa lɛlaa naɣ ɛzɩma mbʋ Ɛsɔ Kewiyaɣ kɔŋnɩ ɖoŋ yɔ nɛ pʋcɔ pasɩ.”
Yesu lɛɣzʋʋ tomnaɣ yɔ
(Mat 17.1-13; Luk 9.28-36)
2 Kɩyakɩŋ loɖo ɖɛwa lɛ, Yesu yaa Pɩyɛ nɛ Yakubu nɛ Yohanɛɛsɩ nɛ ɛ nɛ wɛ pakpa pʋʋ sɔsɔʋ nakʋyʋ yɔɔ pe-ɖeke. Peeye ɛtɩlɛɣzɩ pɛ-ɛsɩndaa nɛ 3 e-wondu hʋlʋmɩ layɩ layɩ nɛ tɩñɩlɩzɩɣ. Nɔɔyʋ fɛyɩ kedeŋa yɔɔ cɩnɛ se ɛpɩzɩɣ ɛhʋlɩsɩ-tʋ mbʋ. 4 Alɩwaatʋ ndʋʋ *Elii nɛ *Mooyiizi palɩ pɔ-yɔɔ nɛ pa nɛ Yesu pɔyɔɔdʋʋ. 5-6 Ɛlɛ, sɔɔndʋ kpa Pɩyɛ nɛ ɛ-taabalaa lɛlaa nɛ paanaɣ se pɔyɔɔdɩ se we. Peeye Pɩyɛ heyi Yesu se: “Wɩlɩyʋ! Ɖɩwɛʋ cɩnɛ yɔ, pʋwɛ ɖeu pɩŋŋ. Pʋmʋnaa se ɖisiɣ kɩɖanɖɩŋ naadozo: ña lɛɛkʋ, Mooyiizi lɛɛkʋ nɛ Elii lɛɛkʋ.” 7 Ɛyɔɔdaɣ mbʋ lɛ, ɛsɔmɩnʋʋ nakʋyʋ kɔɔ kuhuuzi pɔ-yɔɔ nɛ panɩɩ pʋyɔɔdʋʋnɩ-wɛ nɛ kɩ-tɛɛ se: “Ɛnɛ lɛ man-Pɩyalʋ kʋsɔɔlʋ, maahʋʋ ɛ-yɔɔ kaʋ. Ɩnɩnɩ-ɩ.” 8 Tɔmkpɛlɩkɩyaa mba patɩcɔnɩ pɔ-cɔlɔ kpɛɛɛ lɛ, patatasɩ nɔɔyʋ naʋ nɛ pɩtasɩnɩ Yesu.
9 Pakʋyɩ pʋʋ yɔɔ nɛ petiki lɛ, Yesu paɣ-wɛ se: “Ɩtaaheyi nɔɔyʋ mbʋ ɩnawa yɔ nɛ pʋkɔɔ pɩsɩnɩ kɩyakʋ ŋgʋ Ɛyʋ Pɩyalʋ fema nɛ ɛlɩnɩ sɩɖaa taa yɔ.” 10 Ɛlɛ pɔɖɔkɩ tɔm ndʋ nɛ pɔpɔzʋʋ ɖama se: “Ɛyɔɔdʋʋ se efeŋ nɛ ɛlɩnɩ sɩɖaa taa yɔ, pʋ-tɔbʋʋ se we?” 11 Pʋwayɩ lɛ, pɔpɔzɩ-ɩ se: “Pɩlabɩ ɛzɩma nɛ paɣtʋ wɩlɩyaa tɔŋ se pʋwɛɛ se *lɔɔyaɣ tʋ *Elii ɛlayɩ *Weyi Ɛsɔ Lɩzaa Yɔ kɔm?” 12 Yesu cosi-wɛ se: “Toovenim, pʋwɛɛ se Elii ɛlayɩ kɔm nɛ ɛɖaɣnɩ pɩtɩŋa camɩyɛ. Meheyiɣ-mɩ ɖɔɖɔ se Ɛyʋ Pɩyalʋ tɔm pamawa se ɛkɔŋ tɔɔʋ kʋñɔŋ siŋŋ nɛ peniɣzi-i. 13 Ɛlɛ, mankaɖɩɣ-mɩ se Elii tɛm kɔm nɛ palabɩ-ɩ mbʋ pɔsɔɔlaa yɔ ɛzɩ paamaʋ ɛ-tɔm Ɛsɔtɔm Takayaɣ taa yɔ.”
Pɩɣa ŋga eleeu nɔɔyʋ wɛ ka-wayɩ yɔ
(Mat 17.14-21; Luk 9.37-43a)
14 Petibini pʋʋ yɔɔ nɛ patalɩ tɔmkpɛlɩkɩyaa lɛlaa cɔlɔ lɛ, pamaɣnɩ ɛyaa samaɣ kpeɣli peeye nɛ pa nɛ Yuda ñɩma paɣtʋ wɩlɩyaa pɔhɔŋnɩ ɖama tɔm. 15 Ɛyaa samaɣ tɩna Yesu lɛ, pɩɖɩɣzɩ patɩŋa nɛ pese powolo se pɛsɛɛ-ɩ. 16 Ɛlɛ, ɛpɔzɩ ɛ-tɔmkpɛlɩkɩyaa se: “Ɛbɛ yɔɔ mɩ nɛ wɛ ɩhɔŋaɣnɩ ɖama tɔm mbʋ?” 17 Peeye ɛyaa samaɣ taa nɔɔyʋ kʋyaa nɛ ɛpazɩ yɔɔdʋʋ se: “Wɩlɩyʋ, mɔnkɔnɩ man-pɩyalʋ ñɔ-cɔlɔ, eleeu nɔɔyʋ wɛ ɛ-wayɩ nɛ ɛpɩsɩ-ɩ kaayɔɔdaɣ. 18 Paa le, eleeu ɛnʋ ɛkpaɣ-ɩ nɛ ɛyakɩnɩ tɛtʋ nɛ ɛ-nɔɔ ñɛyɩɣ huluu nɛ ɛsalɩɣ e-kela nɛ ɛwɛɛ caŋjanaa. Mewini ñɔ-tɔmkpɛlɩkɩyaa se pɔɖɔɔnɩ eleeu ɛnʋ ɛ-wayɩ, ɛlɛ, patapɩzɩ.”
19 Peeye Yesu holini-wɛ se: “Ɛyaa lidaʋ fɛyɩ tɩnaa mɩ! Alɩwaatʋ ɛzɩma mantasɩɣ mɩ-cɔlɔ caɣʋ nɛ pʋwɛɛ se mɔnɖɔkɩ mɔ-hɔyɛ ɖɔɖɔ? Ɩkɔnɩ-m pɩɣa ŋga cɩnɛ!” 20 Ɛlɛ powoni-kɛ. Eleeu ɛnʋ ɛtɩlosi Yesu lɛ, ɛpazɩ pɩɣa ŋga pɩsʋʋ kpɛndɛlɩsɩ nɛ kɔtɔlɩ tataa nɛ kepilimi nɛ huluu ñɛyɩ kɔ-nɔɔ. 21 Yesu pɔzɩ ka-caa se: “Alɩwaatʋ ndʋʋ eleeu pazɩ-kɛ labʋ mbʋ?” Ɛlɛ cosi-i se: “Ɖooo ka-pɩjatʋ taa 22 eleeu pazɩ-kɛ tuzuu nɛ ɛpɛɖɩɣ miŋ nɛ lɩm pa-taa se kasɩ. Mbʋ labɩna nɛ mentendiɣ-ŋ se ye ŋpɩzɩɣ yɔ, ŋna ɖa-pʋtɔdɩyɛ nɛ ŋsɩnɩ-ɖʋ.” 23 Peeye Yesu pɔzɩ-ɩ se: “Pɩlabɩ ɛzɩma nɛ ŋtɔŋ se ye manpɩzɩɣ? Weyi ɛwɛnɩ lidaʋ Ɛsɔ yɔɔ yɔ, pʋyʋ nɔɔyʋ fɛyɩ se Ɛsɔ ɛɛpɩzɩɣ ɛlabɩ-ɩ-pʋ.” 24 Ɛlɛ pɩɣa ŋga ka-caa tɩmabʋ kubuka se: “Man-caa mɛwɛnɩ lidaʋ, ɛlɛ sɩnɩ-m nɛ mɛntɛzɩ wɛnaʋ lidaʋ Ɛsɔ yɔɔ pɩŋŋ.”
25 Yesu na ɛyaa samaɣ seɣaɣ powoki ɛ-cɔlɔ lɛ, eholini eleeu ɛnʋ se: “Weyi ña ŋwɛ pɩɣa ŋga ka-wayɩ nɛ ŋpɩsɩ-kɛ kaayɔɔdaɣ nɛ ŋtɔ ka-nɩŋgbaaŋ taa yɔ, se! Wiɖiyi mantaatasɩ-ŋ naʋ ka-wayɩ.” 26 Peeye eleeu ɛnʋ ɛmabɩ kubusi nɛ ɛñamsɩ-kɛ siŋŋ nɛ ese ka-wayɩ. Ɛlɛ kefiɣni nɛ halɩ pʋwɛɛ ɛzɩ kasɩba yɔ nɛ ɛyaa tɔŋ se: “Kasɩba kpem.” 27 Ɛlɛ, Yesu ɖɔkɩ ke-nesi taa nɛ ɛkʋsɩ-kɛ nɛ kasɩŋ.
28 Yesu wobi ɛsʋʋ ɖɩɣa nɛ ɛ nɛ ɛ-tɔmkpɛlɩkɩyaa pacaɣ pe-ɖeke lɛ, pɔpɔzɩ-ɩ se: “Pɩlabɩ ɛzɩma nɛ ɖɩtapɩzɩ ɖɩɖɔɔnɩ eleeu ɛnʋ pɩɣa ŋga ka-wayɩ?” 29 Peeye ecosi-wɛ se: “Ɛsɔ sɛʋ ɖeke pɩzɩɣnɩ pɩha ɛyʋ ɖoŋ nɛ ɛɖɔɔnɩnɩ pɩtɛ eleeu ɛnʋ.”
Yesu tasʋʋ yɔɔdʋʋ ɛ-sɩm nɛ e-fem pɔ-tɔm yɔ
(Mat 17.22-23; Luk 9.43b-45)
30 Yesu nɛ ɛ-tɔmkpɛlɩkɩyaa pakʋyɩ ɖɩɣa lɛ, patɩŋnɩ Galilee egeetiye taa. Ɛlɛ, ɛtaasɔɔlɩ se panɩɩ ɛ-taŋ. 31 Mbʋ pʋyɔɔ yɔ, ɛwɩlaɣ ɛ-tɔmkpɛlɩkɩyaa. Eheyaɣ-wɛ se: “Pɔkɔŋ kpaʋ Ɛyʋ Pɩyalʋ nɛ paɖʋzɩ-ɩ ɛyaa nesi taa nɛ pakʋ-ɩ nɛ ɛsɩ. Kɩyakɩŋ naadozo wiye lɛ, Ɛsɔ fezi-i.” 32 Ɛyɔɔdɩ mbʋ lɛ, ɛ-tɔmkpɛlɩkɩyaa tanɩɩ pʋ-tɔbʋʋ. Ŋgʋ, patakatɩɣ se pɔpɔzɩ-ɩ natʋyʋ.
Sɔsɔtʋ yɔɔ tɔm hɔm
(Mat 18.1-5; Luk 9.46-48)
33 Yesu nɛ ɛ-tɔmkpɛlɩkɩyaa patalɩ Kapɛrnayum lɛ, pasʋʋ ɖɩɣa. Peeye ɛpɔzɩ-wɛ se: “Tɔm ndʋ ɩhɔŋaɣnɩ ɖama nʋmɔʋ taa?” 34 Ɛlɛ, posuma, mbʋ pʋyɔɔ yɔ, sɔsɔtʋ yɔɔ poyowaɣ. 35 Peeye Yesu caɣaɣ nɛ ɛyaa pe-hiu nɛ naalɛ nɛ eheyi-wɛ se: “Weyi ɛcaɣ se ɛkɛ sɔsɔ yɔ, pʋdʋ ɛpɩsɩ ɛ-tɩ lɛlaa taa pɩɣa nɛ ɛla patɩŋa payɩ tʋmɩyɛ.” 36 Ɛtɛm-wɛ heyuu mbʋ lɛ, ɛkpaɣ pɩɣa cikpelaɣ nakɛyɛ nɛ ewoni-kɛ pɛ-hɛkʋ taa nɛ ɛkpazɩ-kɛ ɛ-yɔɔ nɛ eheyi-wɛ se: 37 “Ye nɔɔyʋ ɛmʋ piya cikpesi sɩnɛ sɩ-taa nakɛyɛ mɔ-yɔɔ yɔ, man-tɩ tɩŋa ɛmʋwa. Weyi ɛmʋ-m yɔ, pɩtɛkɛ man-tɩ tɩŋa ɛmʋwa, ɛlɛ, weyi etiyi-m yɔ ɛmʋwa.”
Weyi ɛɛkʋyʋʋ ɖɔ-yɔɔ yɔ, ɛkɛ ɖa-ñɩnʋ
(Luk 9.49-50)
38 Pʋwayɩ lɛ, Yohanɛɛsɩ heyi Yesu se: “Wɩlɩyʋ, ɖɩna nɔɔyʋ ɖɔɔnaɣ alewaa nɛ ño-ɖoŋ nɛ ɖɩkʋyɩ se ɖikiziɣni-i se ɛtɛkɛ ɖa-ñɩnʋ.” 39 Peeye Yesu cosi-wɛ se: “Ɩtaaɖaŋ-ɩ, mbʋ pʋyɔɔ yɔ, nɔɔyʋ fɛyɩ se ɛpɩzɩɣ ɛla hama lakasɩ nɛ mon-ɖoŋ nɛ ɛtɛ ɛyɔɔdɩ-m tɔm ɛzaɣtʋ peeye ɛnʋ. 40 Toovenim lɛ, weyi ɛɛkʋyʋʋ ɖɔ-yɔɔ yɔ, ɛkɛ ɖa-ñɩnʋ. 41 Mɩ lɛ, ɩkɛ ma-ñɩma. Ɛlɛ, meheyiɣ-mɩ se ye nɔɔyʋ ɛha mɩ-taa nɔɔyʋ lɩm lɩkpadaɣ maɣmaɣ ma Krɩstʋ mɔ-yɔɔ yɔ, paa pɩɩla ɛzɩma, Ɛsɔ kɔŋ-ɩ hɛyʋʋ pu-lone taa.”
Kɩwɛɛkɩm tɔm
(Mat 18.6-9; Luk 17.1-2)
42 Yesu tasɩ yɔɔdʋʋ se: “Ye nɔɔyʋ eyeba nɛ mba pɛwɛnɩ lidaʋ mɔ-yɔɔ nɛ patakpaɣ-wɛ payaa pʋyʋ yɔ pa-taa nɔɔyʋ la kɩwɛɛkɩm yɔ, pɩkɩlɩ weewee se pɛlɛɛ e-liu tɛɛ pɩyɛ sɔsɔɖɛ nɛ powoni pɛpɛɖɩ teŋgu taa. 43 Ye ñe-nesi eyekini se ŋla kɩwɛɛkɩm yɔ, sɛtɩ-sɩ nɛ ŋlɔ. Pɩkɩlɩ ɖeu se ŋwɛnɩ nesi kʋɖʋmsɩ nɛ ŋhiɣ wezuu ɛzɩ ŋŋwɛnɩ ñe-nesi naalɛ nɛ Ɛsɔ pɛɖɩ-ŋ kʋñɔŋ pɩɩtɛŋ taa ɖenɖe miŋ eeɖeŋ kaʋ yɔ. [\v 44 Peeye ‘sunzuuwee wena atɔkɩ ɛyaa nɛ aasɩkɩ kaʋ yɔ nɛ miŋ weyi eeɖeŋ kaʋ yɔ pɛwɛɛ.’] 45 Ye ña-naŋgbaŋaɣ eyekini se ŋla kɩwɛɛkɩm yɔ, sɛtɩ-kɛ nɛ ŋlɔ. Pɩkɩlɩ ɖeu se ŋwɛnɩ naŋgbaŋaɣ kʋɖʋmaɣ nɛ ŋhiɣ wezuu ɛzɩ ŋŋwɛnɩ ña-naŋgbanzɩ naalɛ nɛ Ɛsɔ pɛɖɩ-ŋ ɖenɖe kʋñɔŋ pɩɩtɛŋ wɛɛ yɔ. [\v 46 Peeye ‘sunzuuwee wena atɔkɩ ɛyaa nɛ aasɩkɩ kaʋ yɔ nɛ miŋ weyi eeɖeŋ kaʋ yɔ pɛwɛɛ.’] 47 Ye ñɛ-ɛzɩyɛ eyekini se ŋla kɩwɛɛkɩm yɔ, hɔɔzɩ-ɖɩ nɛ ŋpɛɖɩ. Pɩkɩlɩ ɖeu se ŋsʋʋ Ɛsɔ Kewiyaɣ taa nɛ ɛzɩyɛ kʋɖʋmɖɩyɛ ɛzɩ ŋŋwɛnɩ ɛza naalɛ nɛ Ɛsɔ pɛɖɩ-ŋ kʋñɔŋ pɩɩtɛŋ taa ɖenɖe miŋ eeɖeŋ kaʋ yɔ. 48 Peeye ‘sunzuuwee wena atɔkɩ ɛyaa nɛ aasɩkɩ kaʋ yɔ nɛ miŋ weyi eeɖeŋ kaʋ yɔ pɛwɛɛ.’
49 “Ɛzɩma mbʋ paɖʋʋ ɖɔm tɔɔnaɣ taa nɛ kɛwɛɣ leleŋ yɔ, mbʋ ɖɔɖɔ Ɛsɔ tɩŋɩɣnɩ kʋñɔŋ yɔɔ nɛ ɛñɔɔzɩ paa weyi.
50 “Ɖɔm kɛ pʋyʋ kɩbanʋ. Ɛlɛ, ye pilesi pi-leleŋ lɛ, ɛzɩma palakɩ-pʋ nɛ pɩɖaɣnɩ kpaʋ leleŋ yɔ? Mɩ lɛ, pʋwɛɛ se mɩ-taa ɛwɛnɩ ɖama leleŋ pɩŋŋ ɛzɩ ɖɔm wɛʋ leleŋ yɔ nɛ mɩtɩŋa payɩ ɩwɛɛ laŋhɛzɩyɛ taa.”