Maarkɩ 12

Tʋmlaɖaa kañadɩnaa nabɛyɛ tɔm

(Mat 21.33-46; Luk 20.9-19)

¹ Pʋwayɩ lɛ, Yesu pazɩ-wɛ tuuu eduuye se: “Abalʋ nɔɔyʋ wɛnɩ mbʋ nɛ ɛsɔ *tɩŋ weyi popuu i-pee sʋlʋm yɔ. Pʋwayɩ lɛ, ɛma koloŋa nɛ ɛcɔzɩ nɛ ɛla ɖenɖe ɛɛñazɩɣ a-lɩm yɔ. Ɛma ɖɔɖɔ tilimiye nɖɩ ɖɩ-yɔɔ pasɩŋɩɣ nɛ pefeŋiɣ yɔ. Ɛtɛma lɛ, ɛkpaɣ ɛyaa se pɔcɔŋnɩ-ɩ tɩŋ ɩnʋ ɩ-yɔɔ nɛ ɛɖɛɛ nʋmɔʋ.ILLUSTRATION 09

² “Pɩkɛdaa lɛ, tɩŋ ɩnʋ i-pee koyuu talɩ. Peeye ɛkʋsɩ e-tiyiyu nɔɔyʋ se ewolo ɛ-tʋmlaɖaa mba pɔ-cɔlɔ nɛ ɛmʋ e-ɖeɖe nɛ ewona. ³ Tiyiyu ɛnʋ ɛtalaa lɛ, pakpa-ɩ pamabɩ-ɩ nɛ pɔɖɔɔnɩ-ɩ nɛ ɛpɩsɩ ndaakpasɩ. ⁴ Pʋwayɩ lɛ, hayɩm tʋ ɛnʋ ɛtasɩ tiyiyu lɛlʋ kʋsʋʋ nɛ etiyi-i. Ɛlɛ talaa lɛ, pama ɛ-ñʋʋ nɛ patʋʋ-ɩ. ⁵ Hayɩm tʋ ɛnʋ, ɛtasɩ tozo tʋ tiyuu. Ɛlɛ talaa lɛ, pakpa-ɩ nɛ pakʋ. Pʋwayɩ lɛ, ɛtasɩ ɛyaa sakɩyɛ tiyuu nɛ pama lɛlaa nɛ pakʋ lɛlaa pasɩ. ⁶ Hayɩm tʋ ɛnʋ, ɛ-pɩyalʋ kʋsɔɔlʋ ɖeke koŋ pɩɩkazɩ ɛ-cɔlɔ. Ɛɛnaɣ se ɛla ɛzɩma lɛ, ɛtɛzɩ-ɩ tiyuu pɔ-cɔlɔ nɛ ɛhʋʋ ɛ-taa se: ‘Paa pɩɩla ɛzɩma, pañaŋ-ɩ.’ ⁷ Tʋmlaɖaa mba pana-ɩ mbʋ lɛ, pɔyɔɔdɩnɩ ɖama se: ‘Ɩnaɣ weyi ɛkɔŋ yɔ, ɛnʋ kaɣnɩ tɩɣyʋʋ ɛ-caa ñɩm. Ɛkɔma lɛ, ɖɩkʋ-ɩ nɛ ɖɩtɩɣyɩ-pʋ!’ ⁸ Ɛtalaa lɛ, pakpa-ɩ pakʋ nɛ pɔlɔnɩ hayɩm mbʋ pʋ-wayɩ.”

⁹ Yesu tɛm tuuu eduuye nɖɩ lɛ, ɛpɔzɩ-wɛ se: “Hayɩm tʋ ɛnʋ, ɛbɛ ɛlakɩ ɛ-tʋmlaɖaa mba? Ɛkɔŋ ɛkʋ-wɛ nɛ ɛcaa ɛyaa kɩfama nɛ ɛlɛɣzɩ po-lone taa.” ¹⁰ Peeye ɛpɔzɩ-wɛ se: “Ɩtakalɩ tɔm ndʋ pama Ɛsɔtɔm Takayaɣ taa yɔ yaa we? Ndʋ lɛ se:

‘Pɩyɛ nɖɩ kuduyiŋ mayaa kpaɣaɣ pɔlɔ yɔ,

nɖɩ pɩsɩnɩ ɖɩkɩlɩ wazaɣ atɩŋa payɩ lɛɛlɛɛyɔ.

¹¹ Mbʋ Kɩpaɣlʋ laba nɛ ɖɩnaɣ nɛ pɩɖɩɣzɩɣ-ɖʋ kpem!’ ”

¹² *Yuda ñɩma *sɔsaa nɩ tɔm ndʋ lɛ, pañɩnɩɣ nʋmɔʋ ŋgʋ paatɩŋ nɛ pakpa Yesu yɔ. Mbʋ pʋyɔɔ yɔ, pasɩm mbʋ se mba etuuni eduuye nɖɩ. Ɛyaa samaɣ yɔɔ lɛ, paanaɣ se pala ɛzɩma. Ɛlɛ, peyebi-i nɛ pɛɖɛɛ.

Pañɩbʋ Yesu nɔɔ cɔlɔ lambuu tɔm yɔ

(Mat 22.15-22; Luk 20.20-26)

¹³ Pʋwayɩ lɛ, petiyi Farɩsɩ ñɩma nɛ Eroodi hɔɔlʋʋ taa ñɩma nabɛyɛ se powolo pañɩ Yesu nɔɔ cɔlɔ tɔm nɛ pʋtɔma yɔ, ɛyɔɔdɩ natʋyʋ nɛ pakpa-ɩ. ¹⁴ Patalaa lɛ, peheyi-i se: “Wɩlɩyʋ! Ɖɩnawa se ŋyɔɔdʋʋ toovenim, sɔɔndʋ ɛɛkpaɣ-ŋ nɛ nɔɔyʋ. Mbʋ pʋyɔɔ yɔ, ŋtakpaɣ ɛyaa wɛtʋ nɛ ŋlabɩnɩ tʋmɩyɛ. Ŋwɩlɩɣ ɛyaa mbʋ Ɛsɔ liu wɛɛ se pala yɔ pu-toovenim. Ɖa-paɣtʋ haɣ waɖɛ se pɛhɛyɩ Room wiyaʋ sɔsɔ lambuu yaa pataahɛyɩ-ɩ? Ɖa yɔ, pʋwɛɛ se ɖɩhɛyɩ-ɩ yaa ɖɩtaahɛyɩ-ɩ? Cosi-ɖʋ nɛ ɖɩnɩɩ.” ¹⁵ Yesu ñɛtɛm pa-pɩ-tɛɛ nɛ pʋ-yɔɔ lɩmaɣza naʋ mbʋ. Pʋ-yɔɔ ɛpɔzɩ-wɛ se: “Pɩlabɩ ɛzɩma nɛ ɩñɩkɩ mɔ-nɔɔ cɔlɔ tɔm? Ɩkɔnɩ liidiye pɔɔyaɣ nakɛyɛ nɛ mana.” ¹⁶ Pɔkɔnɩ-kɛ lɛ, ɛpɔzɩ-wɛ se: “A-ñʋʋ nɛ a-hɩɖɛ pɛwɛ kɔ-yɔɔ cɩnɛ?” Pocosi-i se: “Room wiyaʋ sɔsɔ.” ¹⁷ Peeye Yesu heyi-wɛ se: “Ɩcɛlɩ Room wiyaʋ sɔsɔ mbʋ pɩkɛ ɛ-ñɩm yɔ nɛ piyele ɩcɛlɩ Ɛsɔ mbʋ pɩkɛ ɛlɛ ñɩm yɔ.” Eheyi-wɛ mbʋ lɛ, pɩlabɩ-wɛ piti pɩŋŋ.

Pɔpɔzʋʋ tɔm sɩɖaa fem yɔɔ yɔ

(Mat 22.23-33; Luk 20.27-40)

¹⁸ Pɩkɛdaa lɛ, *Saduki ɛgbɛyɛ taa ñɩma wolo Yesu cɔlɔ. Mba tɔŋnɩ se sɩɖaa eefeŋ. Powoba lɛ, peheyi-i se: ¹⁹ “Wɩlɩyʋ, ɖɔ-cɔzɔ *Mooyiizi ɖʋ ɛ-paɣtʋ taa se: ‘Ye ɛyʋ ɛwɛnɩ ɖalʋ nɛ ɛ-ɖalʋ ɛnʋ ɛsɩ nɛ eyele ɛ-halʋ nɛ ɛfɛyɩnɩ-ɩ pɩɣa yɔ, pʋwɛɛ se pʋdʋ ɛhɔ lelu ɛnʋ nɛ ehiɣni-i pɩɣa ɛ-ɖalʋ lone taa.’ ²⁰ Tɔɔ! Abalʋ nɔɔyʋ nɛ e-newaa pɛwɛnɩ mbʋ, pɛwɛ lʋbɛ, ɛkpaɣ halʋ. Pɩlabɩ pɩnzɩ cabɩ lɛ, abalʋ ɛnʋ ɛsɩ, ɛfɛyɩnɩ pɩɣa. ²¹ Peeye e-neu hɔm lelu ɛnʋ se ehiɣ pɩɣa e-lone taa. Pɩtalabɩdɩ pʋyʋ lɛ, ɛlɛ caŋ ɛsɩ ɖɔɖɔ, halʋ ɛnʋ ɛfɛyɩnɩ-ɩ pɩɣa. Ɛlɛ wayɩ lɛ, tozo tʋ ñɔhɔm-ɩ nɛ ɛlɛ sɩ ɖɔɖɔ. Halʋ ɛnʋ ɛfɛyɩnɩ-ɩ pɩɣa. ²² Pɩla mbʋ nɛ pɔkɔɔ pasɩ pa-lʋbɛ. Ɛfɛyɩnɩ pa-taa nɔɔyʋ nɛ pɩɣa. Pʋwayɩ lɛ, halʋ ɛnʋ ɛsɩ ɖɔɖɔ. ²³ Lɛɛlɛɛyɔ, ɖɩpɔzʋʋ-ŋ se: sɩɖaa fem wiye lɛ, pa-taa weyi ɛtɩnɩ halʋ ɛnʋ? Ŋgʋ patɩŋa pakpaɣ-ɩ!”

²⁴ Peeye Yesu cosi-wɛ se: “Ɩcɛtɩɣ mɩ-tɩ yem, mbʋ pʋyɔɔ yɔ, ɩtanɩɩ Ɛsɔtɔm tɔbʋʋ, ɩtasɩ ɖɔɖɔ e-ɖoŋ. ²⁵ Meheyiɣ-mɩ se alɩwaatʋ ndʋ sɩɖaa feŋ yɔ, halɩkpaɣyɛ ɛɛtasɩɣ wɛʋ. Halaa nɛ abalaa pɛwɛɣ ɛzɩ Ɛsɔ *tiyiyaa wɛʋ ɛsɔdaa yɔ. ²⁶ Pɩlabɩ ɛzɩma nɛ ɩtɔŋ se sɩɖaa eefeŋ? Ɩtakalɩ Mooyiizi takayaɣ taa ɖenɖe pama hɔɖaɣ mʋwaɣ miŋ yɔ pʋ-tɔm naa we? Ɛsɔ heyi-i nɛ ɛma peeye se: ‘Ma lɛ *Abraham nɛ Izaakɩ nɛ Yakɔɔbʋ pɛ-Ɛsɔ.’ ²⁷ Pʋ-yɔɔ lɛ, Ɛsɔ tɛkɛ sɩɖaa Ɛsɔ, ɛlɛ, wezuu tɩnaa ñɩnʋ ɛkɛnaa. Ɩcɛtɩɣ mɩ-tɩ yem kpem.”

Ɛsɔ paɣtʋ ndʋ tɩkɩlɩ lɛɛtʋ yɔ

(Mat 22.34-40; Luk 10.25-28)

²⁸ Yuda ñɩma paɣtʋ wɩlɩyʋ nɔɔyʋ nɩ ɛzɩma mbʋ *Saduki ñɩma pɔzaɣ Yesu tɔm nɛ ecosuu-wɛ ɖeu yɔ lɛ, ewolo ɛpɔzɩ-ɩ se: “Ɛsɔ paɣtʋ tɩŋa taa lɛ, ndʋ tɩkɩlaa?” ^29-30 Peeye Yesu cosi-i se: “*Mooyiizi ma ɛ-paɣtʋ takayaɣ taa se: ‘*Izrɛɛlɩ ñɩma mɩ, ɩtɩlɩ se ɖa-Kɩpaɣlʋ Ɛsɔ ɖeke koŋ kɛnɩ Kɩpaɣlʋ. Sɔɔlɩ ña-Kɩpaɣlʋ Ɛsɔ nɛ ña-laŋɩyɛ tɩŋa nɛ ñe-liu tɩŋa nɛ ña-lɩmaɣza tɩŋa nɛ ño-ɖoŋ tɩŋa payɩ ñe-wezuu caɣʋ taa.’ Ndʋ kɩlɩnɩ lɛɛtʋ. ³¹ Tɩ-wayɩ ñɩndʋ lɛ se: ‘Sɔɔlɩ ña-taabalʋ ɛzɩ ŋsɔɔlʋʋ ña-maɣmaɣ ña-tɩ yɔ.’ Natʋyʋ fɛyɩ ɖɔɖɔ nɛ tɩkɩlɩ tɩ-naalɛ.”

³² Peeye paɣtʋ wɩlɩyʋ ɛnʋ eheyi Yesu se: “Wɩlɩyʋ! Ŋcosi ɖeu pɩtɩɩfɛyɩ. Ɖenɖe ŋyɔɔdaa se ɖa-Kɩpaɣlʋ Ɛsɔ ɖeke koŋ kɛnɩ Kɩpaɣlʋ yɔ, pɩkɛ toovenim. Nɔɔyʋ fɛyɩ nɛ pɩtasɩnɩ-ɩ. ³³ Pʋ-yɔɔ lɛ, pʋwɛɛ se ɛyʋ ɛsɔɔlɩ Ɛsɔ nɛ ɛ-laŋɩyɛ tɩŋa nɛ ɛ-lɩmaɣza tɩŋa nɛ e-ciyam tɩŋa nɛ e-ɖoŋ tɩŋa payɩ e-wezuu caɣʋ taa nɛ ɛsɔɔlɩ ɛ-taabalʋ ɛzɩ ɛsɔɔlʋʋ ɛ-tɩ yɔ. Pʋwɛ ɖeu nɛ pɩkɩlɩ pahaɣʋ Ɛsɔ kpɩnɛ nɛ paɖʋʋ miŋ taa yɔ nɛ kʋjɔŋ ndɩ ndɩ weyi palakɩ-ɩ ɖɔɖɔ yɔ.” ³⁴ Yesu nawa se ecosi-i camɩyɛ lɛ, eheyi-i se: “Ŋñɔɔzɩ ña-tɩ camɩyɛ, pɩkazɩ pazɩ, ŋsʋʋ Ɛsɔ Kewiyaɣ taa.”

Pʋwayɩ lɛ, nɔɔyʋ tatasɩ katʋʋ se ɛpɔzɩ Yesu natʋyʋ.

*Weyi Ɛsɔ Lɩzaa Yɔ nɛ Daaviidi pɔ-tɔm

(Mat 22.41-46; Luk 20.41-44)

³⁵ Pʋwayɩ lɛ, Yesu pazɩ ɛyaa heyuu Ɛsɔtɔm Ɛsɔ ɖɩɣa taa nɛ ɛpɔzɩ-wɛ se: “Pɩlabɩ ɛzɩma nɛ paɣtʋ wɩlɩyaa tɔŋ se *Weyi Ɛsɔ Lɩzaa Yɔ ɛkɛ Daaviidi sayɩ? ³⁶ Ŋgʋ, Ɛsɔ Kalɩzaɣ yeba nɛ Daaviidi yɔɔdɩ ɛ-tɩ tɩŋa se:

‘Kɩpaɣlʋ Ɛsɔ heyi man-Kɩpaɣlʋ se:

caɣ mɔn-cɔlɔ lone kɩbanɖɛ taa nɛ

pʋkɔɔ pɩsɩnɩ alɩwaatʋ ndʋ moluzi ño-koyindinaa ñɛ-tɛɛ kpem yɔ.’

³⁷ Daaviidi maɣmaɣ ñayaɣ *Weyi Ɛsɔ Lɩzaa Yɔ se Kɩpaɣlʋ. Ɛzɩma ɛtasɩɣ kɛʋ Daaviidi ɛnʋ ɛ-sayɩ ɖɔɖɔ yɔ?”

Tɩ kpazʋʋ tɔm

(Mat 23.1-36; Luk 20.45-47)

Ɛyaa samaɣ welesaɣ Yesu tɔm nɛ pɩkɛdɩɣnɩ-wɛ. ³⁸ Eheyaɣ-wɛ se: “Ɩɖɔkɩ mɩ-tɩ nɛ paɣtʋ wɩlɩyaa. Mbʋ pʋyɔɔ yɔ, pɔsɔɔlɩ tokonaa sɔsaa suu nɛ pɔcɔʋ. Pɔsɔɔlaa ɖɔɖɔ se pɛsɛɣ-wɛ nɛ ñamtʋ ɛyaa ɖikpeɣliye taa. ³⁹ Pañɩnɩɣ ɖɩjaɣyɛ sɔsɔɖɛ Ɛsɔ ɖɩsɛyɛ ndɩ ndɩ nɛ kazandʋ pa-taa. ⁴⁰ Mba ɖɔɖɔ hɔɔzʋʋnɩ lelaa nesi taa mbʋ pɩtɩŋa payɩ pɛwɛna yɔ. Pɛsɛɣ Ɛsɔ nɛ pɩɖaɣlɩɣ se pɩwɩlɩ se mba lɛ ɛyaa kɩbama. Meheyiɣ-mɩ se kɩyakʋ ŋgʋ Ɛsɔ kɔŋ se ɛhʋnɩ ɛyaa yɔ, ɛɖʋʋ-wɛ kʋñɔŋ ŋgʋ kɩfɛyɩ ɖaɣʋ yɔ.”

Lelu kʋñɔndʋ nɔɔyʋ haɖɛ tɔm

(Luk 21.1-4)

⁴¹ Yesu tɛm yɔɔdʋʋ lɛ, ewolo ɛcaɣ Ɛsɔ ɖɩɣa taa haɖɛ aɖakaɣ ɛsɩndaa nɛ ɛcɔŋnɩ ɛyaa mba powoki paɖʋʋ liidiye ka-taa yɔ. Ñɩm tɩnaa sakɩyɛ wokaɣnɩ liidiye sakɩyɛ nɛ paɖʋʋ. ⁴² Pɩkɛdaa lɛ, lelu kʋñɔndʋ nɔɔyʋ ñowoni liidiye pɔɔyɩsɩ cikpesi naalɛ nɛ ɛɖʋ. Sɩlɩɣ ɛzɩ faɖam naalɛ yɔ. ⁴³ Peeye Yesu ya ɛ-tɔmkpɛlɩkɩyaa nɛ eheyi-wɛ se: “Toovenim lɛ, meheyiɣ-mɩ se lelu kʋñɔndʋ ɛnɛ, ɛhawa nɛ pɩkɩlɩ lɛlaa tɩŋa. ⁴⁴ Mbʋ pʋyɔɔ yɔ, ñɩm tɩnaa kpaɣ pe-liidiye wena aawazɩɣ-wɛ yɔ nɛ pɔkɔnɩ paɖʋ. Piyele halʋ kʋñɔndʋ ɛnɛ yɔ, ɛlɛ kpaɣ mbʋ ɛwɛna yɔ pɩtɩŋa payɩ nɛ ɛkɔnɩ ɛɖʋ. Pɩtakazɩ-ɩ pʋyʋ se ɛɛya tɔɔnaɣ maɣmaɣ.”