Syarat ber tomwatar ma reluk mangnrure ber soranyar
1 Tomwatar ketnir a rfalak feti: tomwate ma npeang ma neluk mangnrur gereja, iane feti i npeang ma nose karya ngamone. Ma safe ma tomwatar rfalak a ne botuan desar. 2 Mpa tomwate ma neluk mangnrur gereja ne ka ni adat nangafel. Iane feti sawan bate lan lese, ma ka bise ma ntayan ni makeus, ni andaun ngamone, ka nalang tomwatar, npeang ma nlangun tomwatar na ni das, ma nafai ma naftutu tomwatar. 3 Ma to manganabuk i nre to liman mperane tomwatar, nempa ka nmarkein, nmorip e nangamon nor tomwatar, ma to nmate doit. 4 Ma ka nafai ma nayatur ni dasdalam, nema angkir radengar liry ma ralang i. 5 Fali ise ma to nafai nayatur ni dasdalam, keta nayatur Ratu Ni soranyar farpe? 6 Ka kete mfyil tomwate ma betno nalele Yesus ma neluk mangnrur gereja. Fali keta nafdas i, ma keta Ratu nukun i farlan ma nukun Smwangat yatkar nir ulun. 7 Mpa ka mfyil tomwate ma ngarany nangafel na tomwatar ma to ralele Yesus, nema kete rarikan tomwate ne. Farlan rarikan tomwate ne keta smwangat yatkar nir ulun nfule i ma nfuf far sale.
Syarat ma reluk Diakena
8 Tomwatar ma reluk diakenar ka nir adat nangafel. Suknir kete rtarful, to manganabkwar sir, ma to rmate doit. 9 Nempa ka ralele dedesar anftutw botunar ma Ratu nafbotin ber sir. Ma ka rose rlarat anftutw botunar a ne ror dalmir lelerap. 10 Noak ma mfyil tomwatar ma reluk diakenar, ka msyalan nir momorip fengamone fuky, farlan nir momorip ranglerap betno mfyil sir. 11 Ma sawnir batarb a nbal ka nir adat nangafel, ma to rasompun, ma ka ramlonry a na safe kabain, ma ka bise ma rtayan nir makeus. 12 Tomwatar ma reluk diakenar ka sawnir batar lan lese ma rafai ma rayatur nir dasdalamir fen ngafele. 13 Ma diakenar ma rkarya ma nangafel e keta tomwatar ralang sir. Ma rtafal ma rbaran ma rafwibar feti sir ralele Yesus ninr Ray Silai.
Ratu nafbotin anftutw botunar
14 Timoteus, yakw kulele feti to dodo a nbal e ktwi kukmat ko, boloka farane yakw kurengi ngriar monuk ye nbal ber ko. 15 Mpa farlan to weni ktwi e, ko mufai ma muftutu tomwatar ma ralele Yesus feti ka rose farpe ma rmorip e reluk Ratu Ni tomwatar. Fali kit ye teluk Ratu ma nmorip Ni tomwatar. Kit talele desar Ratu Ni anftutw botunar ma tose tlarat. Mpa ka tamkoran ma tajake anftutwar a ne nema tomwatar kete rfule anftutwar a ne. Iane farlan fanderen ma diri ma nafkoran das. 16 Ni botuan e anftutw botunar ma talele ne nangafel resi. Luryain e to tafai anftutwar a ne nempa lere ye Ratu nafbotin ber kit farye:
“I ye ma neluk tomwate na saryamprene
I ye ma Ratu Smwangtany nafdiat feti Ratu anak I
I ye ma malaektar rsalan I lo
I ye ma rafwibar I ber nusar ma to rafai Ratu
I ye ma tomwatar rof mpenempen na saryamprene ralele I
I ye ma Ratu nfair I na surga.”