Soranyar nir sampayang
1 Timoteus, yak ktwak desar ma myose ngrie ye baluan iane msyampayang ber tomwat walyetar. Ka msyampayang na safe-safe monuk ma rperlu a ne. Ma myose terima kasih ber Ratu na kabanir monuk ma I nose ber sir a ne lo. 2 Ma msyampayang a nbal ber rayar, ma mangonbanir monuk nema kit tmorip e nangafel tor maline. Ma bise ma tlarat Ratu Ni mpempeang ma keta tomwatar ralang kit fali tmorip e tangamon tor sir. 3 Farlan tsampayang farane iane nangafel ma tafsenange Ratu dalam. I ye ma nfair tomwatar kit tof ninr salar. 4 Fali I npeang ma nfair tomwatar monuk ma npeang a nbal ma sir rafai ibar botuan na Yesus ninr Ray Silai. 5 Fali Ratu ye lan lese. Ma lan lese ma npanmel ber Ratu ma tomwatar, tomwate ne Yesus ninr Ray Silai. I a ne tomwate farlan kit a nbal. 6 Yesus ye ma nanrenre I ma nmat a nlitan tomwatar nof nir salar. I nose farane nlarat ni tewat ma Ratu ntetak lo la nfatutu feti I npeang ma nfair tomwatar monuk. 7 Iane nwayat ma Ratu nfil yakw ma kweluk Ni mangsiduk ma kufwibar ibar botuan ye ber tomwatar ma to Yahudi sir, nema ralele Yesus. Safe ma kfwalak ye botuan ma to klwepusuk.
Snyurat ber bate merwane noak ma rafburat sir ma rsampayang
8 Timoteus, yak ktwak ma farlan mifburat ma msyampayang e, merwane ma keta nsempayang ne ka ni momorip naglerap ma nose lan kabain ngamonar, i to nares ma to nkafre nor tomwatar.
9 Yak ktwak a nbal ma batar e ka rfonak sir fen ngafele. Ma kete rtengin ulnir ror kabanir felnir mpane, kete rpaki masar nre mutiara nre rabtyar ma kotkir. 10 Nempa ka rafyamping sir ror nir adat ngamonar, iane betno diat ma nfatutu feti sir rose rlarat Ratu Ni mpempeang. 11 Ma farlan tomwatar raftutu sir e ka ramlin ma ralang sir ma ka rlangun safe-safe ma raftutu ne fengamone. 12 Yak to kwinrang ma batar raftutu nre rfarete merwanar. Farlan rafburat sir ror soranyar e ka ramlin. 13 Fali Ratu nose Adam baluan betno Eva. 14 Ma smwangat yatkar nir ulun e to nfule Adam nempa nfule Eva nwayat ma nfuf far sale dalam. 15 Boloka farane keta Ratu nfair batar fali ramtoranbab ma lan feti ralele dedesar Yesus, ma rkamis tomwatar, ma rmorip e ranglerap. Ma ka rmorip e far biase motak ma to rafdas sir.