Paulus ni surat luryain ber Timoteus
Salam
1-2 Ye surat nof yakw Paulus, ber Timoteus ko. Yakw ye Yesus ninr Ray Silai Ni mangsiduk. Ratu ma nfair kit tof ninr salar ma Yesus ninr Ray Silai ma talele I a ne rtutu yakw lo ma kweluk Nir mangsiduk. Yak kal ko fen anakw fali kuftutu ko ma mulele ninr Ray Silai. Yak ktwak ma weni Amninrar Ratu ma Yesus kit ninr Ray Silai rfatutu nir dalam ngamone ma nir lolompang, mla ral maline ber ko.
Ka mijake kmi fengamone myof anftutw lepuskwar
3 Noak ma kose ma kuloran ningw mpampane far provinsi Makedonia ne yakw kfwalak ber ko lo ma mumin dedesar Efesus, ma mfwalak ber tomwatar ketnir ma raftutu anftutw lepuskwar a ne nema kete raftutu lo. 4 Ma mfwalak ber sir nema kete ral mate na ansaur lepuskwar ma na empnir nusnir nir dasdalmir ma to terik. Fali kabanir monuk a ne nose ma tomwatar rabangal, ma nose nteri Ratu Ni mpempeang ma nfair sir nof nir salar. Safo sir bise ma rafai ma rlarat Ratu Ni mpempeang a ne nof lan ma ralele ninr Ray Silai. 5 Yak kfwalak ma mswurat sir farane nema rakamis sir. Ma sir bise ma rakamis sir farlan dalmir a rlerap ma nir andaun ma rtetak feti mpe ma diat. Ma bise ma rakamis sir a nbal farlan ralele botuan ninr Ray Silai. 6 Nempa tomwatar ketnir e to rmorip farane ma rpeang lan ma rabangal na kabanir ma to ubnir sasaf. 7 Sir a ne rpeang ma raftutu tetetkar ma luryain e Ratu nal ber Musa. Ma noak ma raftutu tomwatar, sir rdaun feti diat sir lo safo sir desar e to rkaul ral safe ma rfalak.
8 Ma farlan kit tafmpwane tetetkar ma luryain Ratu nal ber Musa ne fen botuan iane nangafel. 9 Ma botuan feti to tal tetetkar ma luryain Ratu nal ber Musa ne la tfasale tomwat ngamonar nempa la tfasale tomwatar ma rlangas yayatrwar, tomwatar ma to rafai Ratu, tomwatar ma rose sale dedesar, tomwatar ma to ralele Ratu, tomwatar ma to rpafe agame, tomwatar ma rfen enir amnir, ma ber mangafen walyetar. 10 Tetetkar a ne nbal ber tomwatar ma ranronr, ma merwane nafsawe merwane nre bate nafsawe bate. Tetetkar a ne nbal ber tomwate ma nomat tomwate ma nfenri i neluk kawar, ma ber tomwat lepuskwar, ma mangtungan lepuskwar ma ber se nre se motak ma to nose nlarat anftutw botunar. 11 Anftwutwar a ne ramin Ibar Ngamone nof Ratu ma Ni kuase nlie nlengan, ma tomwatar rdangin I. Ma I nalele yakw ma kufwibar Ibar Ngamone ne ber tomwatar.
Paulus nose alang ber Ratu
12 Yakw kose alang ber Yesus ninr Ray Silai ma ninr Mangnrure ne ma nalele yakw ma nafkoran yakw ma kwarya ber I. 13 Luryain e kufbwere I, ma kose yatak sir ma ralele I, ma kurikan I, nempa I nlompang yakw, fali noak a ne to kulele I a fuky ma to kufai safe ma yak kose. 14 Boloka farane kit ninr Mangnrure ne dedesar ma nfatutu Ni dalam ngamone ber yakw. I nose ma kulele I ma kwamis tomwatar fali yakw kmworip dalam lese kor Yesus ninr Ray Silai.
15 “Yesus ninr Ray Silai nma saryamprene ma nfair tomwatar nof nir salar,” ngribatnir ye botuan ma bise ma talele. Ma to tomwate fen lese ma ni salar yadin nlengan nof yakw. 16 Boloka farane Yesus ninr Ray Silai ne nlompang yakw nema tomwatar rsalan feti I nsabar desar ber yakw, tomwatar sa ma ningw salar yadin desar ye. Iane neluk contoh ber tomwatar ma keta ralele I nema rmorip dedesar ror I.
17 Mpa mya ma tdangin ma dedesar ma tafbwerat Ratu fali I ye lan lese ma tomwatar to bise ma rsalan I. I ye Rai ma nfarete to terik, ma keta nmorip dedesar! Amin.
Paulus nsurat Timoteus
18 Timoteus yak anakw ko, yakw kal karyae ye ber ko klwarat snyurat ma luryain Ratu nafbotin ber tomwatar ketnir nof soranyar a na ko. Nema snyurat a ne la nafkoran ko ma boam mal ma mbwangal tomwatar ma raftutu anftutw lepuskwar a ne farlan tentarar sa ma nbangal ni muswar. 19 Ma ka mulele dedesar ninr Ray Silai ma nim andaun ma mtwetak feti mpe ma diat, fali tomwatar ketnir to rpeang ma nir andaun farane. Iane nwayat ma to ralele ninr Ray Silai lo. 20 Nof sir a ne Himeneus ma Aleksander. Yak kwalin sir nof soranyar ma kunrenre sir ber smwangat yatkar nir ulun ni tomwatar. Yak kose farane nema rfenai rbali ma rtate nir salar ne ma to rarikan Ratu lo.