Ka mujake ko mof tomwatar ma raftutu anftutw lepuskwar
1 Ratu smwangtany nfalak desar feti keta lerar ma nma ne tomwatar to ralele Yesus ni anftutwar lo. Ma keta rlarat tomwatar ma raftutu anftutw lepuskwar rof smwangat yatkar. 2 Ma tomwatar a ne keta rlepusuk ma rose felnir farlan tomwat ngamonar. Iane nose ma to rafai ma rtetak feti mpe ma diat. 3 Sir rose rteri tomwatar ma rafsau, ma rose rteri sir a nbal ma rane tnyamar ketnir. Safo Ratu nose tnyamar ber tomwatar ma rane mpa farlan talele Yesus ma tafai Ni anftutw botunar ma tose terima kasih ber I, kit bise ma tane monuk tnyamar a ne. 4-5 Mpa tose terima kasih motak ber Ratu ma tane monuk tnyamar a ne, fali I nfalak feti kabanir monuk ma I nose ne nangafel ma to fen lese ma ramoli. Ni ngafele nbal e ka tsampayang a fuky betno tane.
Yesus ninr Ray Silai Ni mangkaryae ngamone
6 Timoteus, farlan ko muftutu ngriar ye monuk ber waninrar ma ralele Yesus ninr Ray Silai, keta ko mweluk Ni mangkarya ngamonar sa. Ma keta dalam a namkoran fali dedesar ma mulele Ratu Ni ngribatnir, ma mose mlwarat anftutw botunar a ne. 7 Ka mkwatar ko mof emninrar nusninrar nir nangyar ma ansaur lepuskwar ma to ubnir sasaf. Ma lerar monuk e ka mureke desar ma mose mlwarat Ratu Ni mpempeang farlan tomwate ma nlati tenany nema namkoran. 8 Botuan feti tlati teninrar ma ramkoran e iane nangafel nempa uban lan rufuk. Nempa farlan tlati teninrar ma tlarat Ratu Ni mpempeang, keta uban silai to na lan ninr momorip lere ye nempa noak ma tmorip dedesar tor Ratu nbal. 9 Safe ma kfwalak ye botuan mpa ka talele monuk. 10 Iane nwayat ma ka tkarya ma tmat a tlai desar ber Ratu fali talele lan Ratu ma nmorip. Lan I ye ma bise ma nfair tomwatar monuk nof nir salar. Keta nfair sir ma ralele Yesus.
11 Timoteus, ka muftutu ngriar monuk ye ber tomwatar ma ralele Yesus ma mfwalak ber sir ma ka rose rlarat.
12 Boloka tabweri ko e kete mwinrang ma tomwatar to releng ko. Nempa ka mweluk contoh ber tomwatar ma ralele Yesus na ngriar ye: ka mutanuk fen ngafele, ka mkwamis tomwatar, ma mfwatutu nim wewelmpampan ngamonar. Ma ka mulele dedesar Yesus ma ka nim momorip nanglerap. 13 Ma ka kete mufengi ma mbwaca Kitap Lelerap, ma muftutu ma mfwalyole isiny ber tomwatar monuk titerik ma kmwa. 14 Ma kete mufengi nbal ma mpwaki kuase ma Ratu nal ber ko a ne. Fali kuase ne Ratu nal ber ko nema boam mal ma mkwarya ber Ratu. Ma I nal kuase ne ber ko lo noak ma mangnrur gerejar rsaup limnir a na ko mla rafbotin snyurat nof Ratu na ko. 15 Ka mkwaryae kabanir monuk a ne mor dalam kateman, nema tomwatar rsalan feti mtwafal ma bise mkwarya ber Ratu. 16 Ma ka mujake fengamone nim wewelmpampane ma na safe ma muftutu ne. Farlan mose farane Ratu keta nfair ko numur tomwatar monuk ma rdengar nim anftutwar a ne.