Tomwatar ma ralele Yesus kete rmangadu wanir ber mangtetak ma to nalele Yesus
1 Wangur, farlan nof a kmi ye tomwatar sa ma nkafre nor wain ma nalele Yesus, ka kete nmangadu i desar ber mangtetak ma to nalele Yesus ma ntetak ni ngrie ne. Nempa ka ntak soranyar ma ralele Yesus ma rtetak ni ngrie ne. 2 Kmi mifai lo feti keta nait ni tewat e tomwatar ma ralele Yesus rtetak tomwatar na saryamprene ye nir ngriar. Mpa farlan kmi keta mtyetak tomwatar na saryamprene nir ngriar, safema kmi to bise ma mtyetak ngri marumtar ma farane? 3 Kmi mifai lo feti kit ye ma keta tetak malaektar nir ngriar. Mpa nlengan a nbal e ngri marumtar na ninr momorip lerar a ne, keta kit bise ma tetak. 4 Mpa farlan kmi myurus ngriar ma farane, ka kete myonr ngriar a ne ber tomwate ma to nalele Yesus ma to ni kuase sasaf ma ntetak ngriar a ne. 5 Yak kfwalak farane la kufmweat a kmi. Ali to tomwate fen lese nof a kmi ye ma ni andaun ngamone mpa bise ma nurus soranyar a ne nir ngriar e? 6 Nempa kmi ma milele Yesus e to myose farane, fali sa nkafre nor sa motak e mtyi myangadu desar nir ngrie ne ber mangtetak ma to nalele Yesus. 7 Ma farlan kmi ma milele Yesus a ne mkyafre, ma myangadu mir ngriar a ne ber tomwatar ma to ralele Yesus, iane to uban, ma mfyatutu feti safe ma myose ne sale desar. Ni ngafele e msyalan lonri motak ma tomwatar rose yatak a kmi ma rane rafere mir kabanir. 8 Nempa koko kmi ma myose yatak a mbyali wamir ma ralele Yesus ma mine mifere nir kabanir.
9-10 Kmi mifai feti tomwatar ma rose kabain yatkar, keta to reluk Ratu Ni tomwatar noak ma Yesus nma nbali saryamprene ma nfarete neluk Ray.
Ma ka kete miflepusuk a mbyali kmi fali tomwatar ma rose kabanir ye keta to reluk Ratu Ni tomwatar. Sir a ne ma ranronr, rsampayang ber ratwawatar, ralalin, merwane nafsawe merwane, ramnang, rkampres, ranabuk, rarikan tomwat walyetar, ma sir a nbal ma rtean tomwatar ma ral nir kabanir. 11 Luryain e tomwatar ketnir rof a kmi ye nir adat farane. Nempa lere ye milele Yesus ninr Ray Silai ma neluk ninr Mangnrure ne. Ma Ratu Smwangtany nkarya na dalmir, mpa I naflerap a kmi nof mir salar, ma nfil a nkese kmi ma myeluk Ni tomwatar. Ma I nose farane nema to mir sal na sounlury.
Ka mtyayan tenmir ma kete minronr
12 Wangur, tomwatar ketnir rfalak feti, kit bise ma tose safe-safe motak tlarat ninr mpempeang. Iane botuan nempa safe-safe ma kit tose ne to monuk-monuk ma ubany ber kit. Mpa boloka bise ma kose safe-safe motak, nempa to kwinrang ma kabanir ma kose ne rkuase yakw. 13 Tomwatar ketnir rfalak a nbal feti tnyamar ma kit tane nti kampninrar, ma kampninrar ye ain ma tnyamar ramin. Iane botuan nempa na lere ma nma ne keta Ratu nose ma tnyamar na kampninrar ne to ramin lo. Mpa ka tajake teninrar nema kete tanronr, nempa ka tpaki teninrar la tlangun ninr Mangnrur Silai fali I ye ma nkuase teninrar. 14 Ratu nafmorip a nbali Yesus ninr Mangnrure nof Ni mamate ma keta nafmorip kit a nbal nor Ni kuase.
15 Wangur, kmi mifai lo feti tenmir a ne farlan Yesus ninr Ray Silai matnir, tangnir, emnir ma ramin tenany. Mpa farlan mpyaki tenmir ma minronr myor bat yatkar iane nangafel nre tate? Tate desar nre! Fali iane feleles farlan myal ninr Ray Silai matnir, tangnir, emnir ma minronr myor bat yatkar a ne. 16 Mpa ka mifai feti tomwatar ma rkoil bat yatkar iane feleles farlan ma radu lese. Fali rarengi na Kitap Lelerap dalam feti merwane ma nkoil sawan keta radu lese. 17 Nempa ise ma dalam lese nor ninr Mangnrur Silai, i dalam lese nor Ni Smwangtany a nbal. 18 Wangur, nof salar monuk ma tomwatar rose, to fen lese ma nafyatak tenir lan ma ranronr. Fali farlan ranronr iane feti rafyatak a rbali tenir. Mpa ka mlyiak a kmi ma kete minronr. 19 Kmi mifai feti tenmir a ne farlan Ratu Smwangtany Ni das, mpa namin a kmi lo. Fali Ratu koko I ma nal Smwangtany a ne ma namin a kmi, mpa tenmir a ne kmi mire tate nempa Ratu nie. 20 Fali Ratu nbaras kmi monuk lo. Iane feti I ntebus kmi nor Anaky daran ma kotkyan. Mpa ka myal tenmir ma myose kabain ngamonar la mdyangin Ratu nema tomwat walyetar rdangin Ratu nbal.