Ka myalin tomwatar ma ranronr myof soranyar
1 Wangur, yak kdwengar ma tomwatar rfalak feti nof a kmi ye tomwatar sa naosangri. Tomwate ne nanronr nor aman sawan kedua. Ma tomwatar ma to rafai Ratu motak e, to rose ngrie yatak ma farane. 2 Boloka farane kmi to myeat nempa mifdas a kmi. Safo ni botuan e ka myeat ma dalmir suse. Ma kete myinrang ma nlarat soranyar na safe-safe motak. 3 Boloka yak kumin dodo nempa dedesar ma kunremi kmi farlan ma kor a kmi a na iane. Mpa boloka to kor a kmi nempa farlan ma yak kor a kmi ma ktwetak feti ka myukun tomwate ma nose ngri yatak a ne. 4 Ma farlan mifburat a kmi ka minremi feti yak kor a kmi ma Yesus ninr Mangnrure Ni kuase nor a kmi a nbal. 5 Mpa nor Yesus ninr Mangnrure Ni kuase ne yak ktwak ma ka minrenre tomwate ne ber smwangat yatkar nir uluny. Iane feti kete myinrang ma nafburat i nor soranyar. Kmi myose farane nema boloka tenan nayatak a na saryamprene ye, nempa noak ma Yesus ninr Mangrure nma nbali saryamprene keta nfair tomwate ne smwangtany. 6 Mpa ka kete mifdas a kmi na tomwate ma ni adat yatak ma farane. Ka minremi ngribatnir ye, boloka ragi lan rufuk nempa bise nose ma adonan nbar. Iane feti boloka lan du sir ma rose yatak nempa nir adat yatak a ne bise ma nafyatak soranyar monuk. 7 Mpa ka myebas ragi wangim ma namin a kmi a ne, iane mir adat yatkar ma myose luryain. Farlan myose farane keta minglerap ma to mir sal, farlan ma myeluk adonan beberi. Ni botuan e kmi myorip farane fali Yesus ninr Ray Silai nmat la ntebus kit lo nema Ratu nlure ninr salar. I nmat la ntebus kit farlan domba ma tomwat Yahudyar rfen i neluk snyompe ber Ratu, la ranremi rbali noak ma nusnir rbie rof Mesir. 8 Wangur, fali Yesus nmat la ntebus kit mpa ka tyebas ninr adat yatkar ma tose luryain a ne. Iane farlan tomwat Yahudyar ma ryebas ragi ma to rpaki na roti noak ma rose na ler silai paskah. Mpa kit a nbal e ka tyebas ninr adat yatkar ma ka dalminrar a rlerap ma tose tlarat Ratu Ni mpempeang. Iane farlan ma rose ler silai paskah ma rane roti ma to ragi.
9 Wangur, na ningw surat luryain a ne yakw kufbotin ber a kmi lo feti kete mitbwarin myor tomwatar ma ranronr. 10 Yak to kose ktweri kmi ma mitbwarin myor tomwatar monuk ma to rafai Ratu ma rose kabanir far ranronr, nre rose kabanir far rkampres, rlepusuk, ma rsampayang ber ratwawatar. Fali farlan to mitbwarin myor sir a ne iane feti to mimin saryamprene lo. 11 Nempa yakw kfwalak farane nema kete mitbwarin myor tomwatar ma rfalak feti sir ralele Yesus, nempa dedesar ma rose kabain yatkar far ranronr, rkampres, rsampayang ber ratwawatar, rasompun, ranabuk, ma ramnang. Tomwatar ma farane ka kete mtyame desar myor sir. 12-13 Yakw to ningw kuase ma ktwetak tomwatar ma to ralele Yesus ne nir ngriar. Lan Ratu ma Ni kuase ma ntetak nir ngriar. Nempa kmi ma milele Yesus, ka myurus mir soranyar nir ngriar. Fali rarengi na Kitap Lelerap dalam, “Ka myalin tomwatar ma rose kabain yatkar rof a kmi.”