Paulus nafdiat i a na rai Agripa soun lury
1
Paulus nafdiat i na Rai Agripa soun lury (26:1)
4 Tomwat Yahudyar monuk rafai ningw momorip, fali ningw ngarufuky e kmworip kor sir na Yerusalem. 5 Sir rafai yakw dodo lo, mpa farlan rmpeang e, bise ma rasaur na yakw feti yakw ye tomwat Farisyar sa ma klwarat desar mamy agame ni yayatur mabertar. 6 Ma lere ye kumin ye ma rtetak ningw ngrie, fali kulele feti keta Ratu nafdiat safe ma nyoding ber nusmyamar. 7 Mpe mamy suku buti resin du a na Israel dedesar ma ralele safe ma Ratu nyoding a ne nbal, nwayat ma lere nronram e rsampayang ber Ratu. O rai Agripa, tomwat Yahudyar rfasale yakw fali kulele safe ma Ratu nyoding a ne. 8 Waingw Yahudyar a kmi, safema to milele feti Ratu nafmworip a nbali mangmwate? 9 Luryain e yak kdwaun feti farlan kose safe-safe motak la kose yatak tomwatar ma ralele Yesus ma nof Nazaret a ne, iane nangafel. 10 Mpe kose farane nbal na Yerusalem fali mangsomp ulnir ral surat kuase ber yakw ma komat tomwatar yadin ma ralele Yesus far sel. Ma kyoding a nbal ma ral tetetak mamate ber sir. 11 Na das sampangar e lain yadin ma kswiksa sir ma kureke ma ramsoal safe ma ralele ne. Ma dalangw maninik desar mpa kunriak kureke sir terik kotar na yampren walyetar.”
Paulus nasaur felan farpe ma nalele Yesus
12 “Iane nwayat ma ktwi Damsyik ma konr surat kuase nof mangsompar ulnir nema bise ma kukun tomwat anlelar na iano. 13 Rai Agripa, noak ma lere nfat langit e, yakw lolone dalamtene lety, metryat e kswalan snyain ma idak resi nlengan nof lere, ntompur nof langit nbebar yakw numur tomwatar ma maktem a mpan a ne. 14 Ne kam mfuf monuk. Ma kdwengar liliri ma nfalak nor Ibrani lirin la nfalak ber yak farye, ‘Saulus, Saulus! Safema mtwean Yakw? Ko mose suse mbwali ko, fali ma msiksa I a ne ko nim Tuhan.’ 15 Ne kfwalak, ‘Tuhan, ise ko?’ Ne Tuhan a nfalak, ‘Yakw ye Yesus ma mtwean Yakw ne. 16 Mpa mumdir! Kufbotin Yakw ber ko fali kfwil ko ma mweluk mangkaryae. Ma ka mufwibar na kabanir monuk ma mswalan lere ye, ma na kabanir ma keta kuftutu ber ko. 17 Keta kujake ko kof tomwat Yahudyar ma kof tomwatar ma to Yahudi sir. Ma keta kswiduk ko ber tomwatar ma to Yahudi sir a ne. 18 Ma mose ma rakeban nema bise ma rbie rof makrokap ma rti ngaodir, ma rbie rof smwangat yatkar nir ulun ni kuase ma rbali sir ber Ratu. Mpe farlan ralele Yakw keta klwure nir salar ma reluk Ratu Ni tomwatar.’
Paulus nfalyole feti felan farpe ma nafwibar Ibar Ngamone
19 “Mpe rai Agripa, klwarat dedesar safe ma Yesus nfalak ber yakw noak ma nafbotin I nof surga. 20 Luryain e kufwibar ber tomwat Yahudyar na Damsyik, ma Yerusalem ma Yudea ni kateman, numur a nbal ber tomwat walyetar. Mpe kufwibar ber sir feti ka rtate nir salar ma ralele Ratu, mla rose lan kabain ngamonar la rfatutu feti rtate nir salar lo. 21 Iane nwayat ma tomwat Yuhudyar a romat yakw na Ratu Ni das silai ma rareke ma rfen yakw. 22 Nempa Ratu najake yakw mpa lolone kmworip titerik lere ye, ma bise ma kumdir ye ma kufwibar ber tomwat silayar ma tomwat marumtar. Ma safe ma kfwalak ye feleles far ma nabyar ma Musa rfalak lo. 23 Iane feti Rai mangtebus ka nkoman suse, ma keta I nmorip baluan nof mangmwatar. Nema keta I nonry ngaodir ber tomwat Yahudyar ma tomwatar ma to Yahudi sir.”
Paulus nfalak ber Agripa ma nalele Yesus
24 Paulus lolone natanuk ma nafdiat i e, Festus nafwayak, “Hei Paulus ko mfukat, nim anfai nres mpa mfwukat lo!” 25 Nempa Paulus a nfalak, “Amangw Festus, to kfwukat! Ma safe ma kfwalak ye botuan ma ningw andaun lolone nangafel. 26 Yak kufai feti rai Agripa nafai ngriar monuk ma kfwalak ye lo fali to ngrie fen lese ma rfalak ramudim. Iane nwayat ma kbwaran ma kfwalak safe-safe monuk ber i. 27 Rai Agripa, yak kufai feti ko mulele safe ma nabyar a rfalak a ne nre!” 28 Ne rai Agripa nfalak, “Mufliak feti nim tnyangkwar a ne rose ma kusnyalik ma kulele Yesus e?” 29 Ne Paulus a nfalak, “Keta kswampayang ber Ratu, nema manrilak nre mangonim e, to lan ko nempa tomwatar monuk ma rdengar ma kutanuk ye bise ralele Yesus ma kete reluk napi far yakw ye.” 30 Mpene rai ma gubernur ma Bernike numur tomwatar monuk ma ramtoran ror sir, ramdir ma rti burit. 31 Lama rti burit e rafalak ber sir feti, “Tomwate ne to nose ngri sasaf ma bertyan nor tetetak mamate nre tal i far sel. 32 Ne Agripa nfalak ber Festus, “Farlan tomwate ye to naloran ni ngrie ye ber Kaiser e, ni botuan e lere ye nbie sel e lo.”