Gubernur Festus nsidang Paulus na tomwat Yahudyar sonir lury
1 Lama Festus nait provinsi Yudea, ni lerar tely e i nof kote Kaisarea ma kote Yerusalem. 2 Na iano mangsompar ulnir ma mangfaret Yahudyar rti rmangadu Paulus ber Festus. 3 Ma rtak Festus ma ntulung sir, nema nluan ma ror Paulus far Yerusalem. Fali rfat lo ma rfen i a na dalamtene lety. 4 Nempa Festus nfalak, “Paulus lolone namin sel a na Kaisarea, mpa kusnyalik ma kbwali yakw far iano. 5 Mpa ni ngafele e msyiduk tomwat silayar ketnir rof a kmi ma nor yakw ma mti Kaisarea. Ma farlan botuan feti i nose salar sa, ka myangadu i na iano.”
6 Festus namin Yerusalem fafa lerar wal terik lere buti, betno nbali i far Kaisarea. Ni bobole ne Festus nafburat mangtetkar ma rsidang Paulus, mpe nluan ma ror i far ain sidang a ne. 7 Lama Paulus nait e, tomwat Yahudyar ma rof Yerusalem ramdir a rkolu i, betno rose ma rfalak nir sosoy mabertar na i. Nempa to nir sasaf la rfatutu nir sosoyar a ne. 8 Ma Paulus nafdiat i ma nfalak, “Yak to kose sal sasaf. To klwangas Musa ni tetetkar nre Kaiser Roma ni faretar ma to kufaknise nbal Ratu Ni Das silai.” 9 Nempa Festus nose ma nalonge tomwat Yahudyar dalmir, mpa nenrat Paulus, “Mpweang ma mtwi Yerusalem e, nema kswidang nim ngriar na iano?” 10 Ne Paulus a nfalak, “Amangw, ko mufai feti yak to ningw sal sasaf ber tomwat Yahudyar. Ma lere ye rsidang yakw rlarat Kaiser Roma ni tetetkar, mpa ka mtwetak ningw ngrie na ye nbal. 11 Ma farlan botuan feti kose salar sa ma bertyan nor tetetak mamate e, yak knwengar motak ma mfyen yakw. Nempa farlan nir sosoyar a ne to botuan, to tomwate fen lese ma bise nanrenre yakw ber tomwat Yahudyar. Mpa ktwak ma Kaiser a ntetak ningw ngrie ye.” 12 Lama Festus nor ni mangsnyurtar raale monuk andaun e nfalak, “Ko muloran nim a ngrie ti nait Kaiser, mpa ka mtwi mukmat Kaiser.”
Festus naluru Paulus ma nbali Agripa ma Bernike
13 Lerar fir a rsak e, rai Agripa radu Bernikea rti Kaisarea ma rose selamat ber Festus. 14 Lama ramin iane lerar fir a ne, Festus nfalyole Paulus ni ngrie ber rai Agripa, “Noak ma Feliks nose gubernur a na ye, i nau tomwatar sa na sel. 15 Noak ma yak kumin Yerusalem, mangsompar ulnir numur mangfaret Yahudyar rti rmangadu tomwate ne ber yakw, ma rtak nema kukun i. 16 Nempa kfwalak ber sir feti tomwat Romar to biase ma ranrenre tomwatar sa ma rfasale i ma rukun i farane motak. Nempa ka ral lety ber i a fuky la nafdiat i a na tomwatar ma rsoi i a ne sonir lury. 17 Mpe maktem a ma ye. Ma ni bobole ne klwuan ma ror Paulus a nma ma ktwetak desar ni ngrie ne. 18 Ne tomwatar monuk ma rsoi i ramdir ma rfalak nir sosoyar. Ma kufliak feti keta rfalak tomwate ye ni adat yatkar far ma kdwaun, safo tate. 19 Sir rabangal na lan nir ngri agamar, ma na tomwat sa ngarany Yesus. Tomwate ne nmat lo nempa Paulus namkoran ma nfalak feti nmorip a nbali lo. 20 Ma yakw to kufai feti kurus ngrie farpe, mpe kwenrat i feti mpweang ma nti Yerusalem e, nema rsidang nim ngrie na iano. 21 Nempa Paulus ntak ma naloran ni ngrie ber Kaiser ma ntak a nbal ma namin sel terik ma Kaiser a ntetak ni ngrie ne. Mpa ktwayan i terik ma letyar sa betno kunrenre i ber Kaiser.” 22 Ne rai Agripa nfalak ber Festus, “Yak kpweang ma kdwengar tomwate ne ma natanuk.” Ne Festus a nfalak, “Bobole la mdwengar i ma natanuk.”
23 Ni bobole e Agripa radu Bernike rma. Noak ma rti sidang dalam e, sir rfonak rayar nir rabtyar ma tomwatar ramdir ma rose alang ber sir. Sir raktem suldadwar ulnir mla tomwat silayar na kote ne rti ain sidang, betno Festus nluan ma ror Paulus far dalam. 24 Ne Festus a nfalak, “Rai Agripa ma ninr kateman ma tamin ye. No msyalan tomwate ye! Tomwat Yahudyar monuk ma ramin ye mla ma ramin Yerusalem rmangadu i ber yakw lo. Sir rma rakmat yakw ma rafwayak dedesar feti kete mwinrang ma nmorip.” 25 Nempa to ktwungan ni sale ma bertyan nor tetetak mamate. Ma i ntak ma naloran ni ngrie ye far Kaiser, mpa ktwetak ma ror i ber Kaiser. 26 Nempa to kufai feti kfwalyole farpe ber Kaiser mpa kor i ber mir kateman na ye, ma nlengan desar e ber rai Agripa ko ma mwenrat i na ni ngrie ne, nema bise ma kurengi kabar sa ber Kaiser. 27 Fali kdwaun feti, tor tomwate ti motak e to diat. Nempa ka tarengi ni sale nbal na surat dalam nema ror i numur surat ne ber Kaiser.”