Ka tafbweberi tbali ninr momorip ma tlarat Ratu Ni mpempeang
4:1-6
1 Wangur,
noak ma Yesus ninr Ray Silai neluk tomwate I nkoman suse lo.
Mpa ka mifkoran dalmir ma mkyoman suse feleles farlan I a nbal.
Fali tomwate ma nkoman suse na ni momorip a ne,
ntate ni salar lo.
2 Nema noak ma lolone myorip na saryamprene ye,
ka kete myose kabanir mlyarat mir makeus yatkar nempa myose mlyarat Ratu Ni mpempeang.
3 Luryain e lain yadin ma kmi myose kabain yatkar mlyarat tomwatar ma to rafai Ratu.
Noak a ne miosangri bolar motak la mifsenange tenmir mlyarat mir makeus yatkar.
Ma dedesar ma minabuk ma miosfesta.
Ma dedesar ma mifburat a kmi ma myenum tuak mlyarat mir makeus.
Ma kmi mlyangas Ratu Ni faretar ma msyampayang ber ratwawatar nwayat ma Ratu namkini kmi.
4 Ma lere ye tomwatar ma to rafai Ratu ne rampriang desar a kmi,
fali to mifburat a kmi myor sir,
ma mlyarat sir ma myose kabain yatkar.
Iane nwayat ma rarikan a kmi.
5 Nempa nait ni tewat e ka sir ryoding kabain yatkar ma sir rose na Ratu sounlury.
Fali Ratu nose ma nukun tomwatar monuk ma rmorip nre rmat lo.
6 Iane nwayat ma luryain e Yesus nafwibar Ibar Ngamone ber mangmwatar.
Nema boloka Ratu nukun sir ma rmat farlan tomwatar monuk,
nempa keta smwangtir a rmorip ror Ratu dedesar.
Tomwatar ma ralele Yesus nir momorip
4:7-11
7 Wangur,
saryamprene ketla namsos.
Mpa ka mtyayan myal tenmir,
ma mir andaun a ntai nema bise ma msyampayang ber Ratu.
8 Nempa ma ubany nlengan nof safe-safe monuk a ne iane feti ka dedesar ma mikamis a kmi.
Farlan myose farane keta bise ma mlyure tomwatar boloka dedesar ma rose yatak ber a kmi.
9 Farlan tomwatar ma ralele Ratu rma mir dasar ma rkoil a kmi,
ka mlyangun sir myor dalmir kateman ma kete nroke nraki kmi.
10 Ma Ratu Smwangtany nal fakoran ber a kmi mpane.
Mpa ka mpyaki mir fakoran a ne fen ngamone la mitulung a kmi.
Fali Ratu Ni dalamy ngamone ma nal fakoran felnir mpane ber a kmi.
Kmi myose farane iane fen mir ngamone monuk.
11 Tomwatar ma Ratu nal fakoran ber sir ma rafwibar Ratu Ni ngribatnir,
ka rfalak rlarat lan Ni ngribatnir a ne.
Ma tomwatar ma Ratu nal fakoran ber sir ma rtulung tomwat walyetar,
ka rtulung tomwat walyetar a ne ror fakoran ma Ratu nal ber sir.
Kmi myose farane nema tomwatar rdangin Ratu fali Yesus ninr Ray Silai nal fakoran ber a kmi ma myose safe-safe ne.
Ma lan I ma Ni kuase terik ma dedesar.
Amen.
Snyurat ber tomwatar ma rkoman suse fali rlarat Yesus ninr Ray Silai
4:12-19
12 Wangur ma kwamis a kmi,
ka kete mimpriang noak ma mkyoman suse silai,
fali nof suse ne bise ma mifai feti milele botuan ninr Ray Silai nre tate.
Ma kete mfyalak feti suse ma mkyoman a ne silai nlengan nof safe-safe monuk,
fali kit tafai feti kit ma talele ninr Ray Silai ne ka tkoman suse far ma tamin au dalam.
13 Noak ma mkyoman suse ne ka dedesar ma msyenang,
fali kmi mkyoman suse farlan Yesus ninr Ray Silai nbal ma mfyatutu feti dalmir lese myor I.
Mpa noak ma I nma nbali saryamprene ma nbotin nor Ni dadangin,
keta dalmir a rsenang resi.
14 Farlan tomwatar rarikan a kmi fali mlyarat Yesus ninr Ray Silai e ka msyenang.
Iane nfatutu feti Ratu Smwangtany ma Ni kuase nlie nlengan a ne namin dalmir.
15 Botuan feti keta kmi mkyoman suse nempa ka kete mkyoman suse fali mifen,
mimnang,
myurus tomwat walyetar nir ngriar,
nre myose kabain yatak walyetar.
16 Ma farlan mkyoman suse fali mlyarat ninr Ray Silai ka kete myeat,
nempa ka myose alang ber Ratu fali mlyarat Yesus ninr Ray Silai.
17 Lere ye ni tewat lo ma Ratu nukun tomwatar na saryamprene.
Nempa keta nukun Ni tomwatar baluan.
Mpa farlan I nukun baluan kit ma talele I,
keta sir ma to ralele Ibar Ngamone nof Ratu ne sir farpe?
Keta I nukun sir maberat desar.
18 Rarengi na Kitap Lelerap dalam farye,
“Tomwatar ma ralele Ratu,
sir ka rkoman suse betno I nfair sir.
Mpa sir ma to ralele Ratu ma rose kabain yatkar a ne keta sir farpe?
Keta I nukun sir e nlie nlengan desar.”
19 Mpa farlan Ratu ntetak ma kmi mkyoman suse,
ka mlyoik dalmir ber I,
ma dedesar ma myose kabain ngamonar.
Fali I ye ma nose ma kit tmorip,
ma dedesar ma nafdiat safe ma nyoding.