Snyurat ber ene sawe
3:1-7
1-2 Mpa ber bat mangafsawar kmi a nbal,
ka dedesar ma mlyarat safe ma sawmir a rfalak,
nema farlan nof a kmi ye sawmir to ralele Yesus ninr Ray Silai,
keta sir bise ma ralele boloka to mfyalak sasaf ber sir.
Ma sir bise ma ralele Yesus fali rsalan mir wewelmpampan ngamonar ma myorip e,
myalang Ratu.
3 Ka kete mfyatutu mir ngafele ber tomwatar na lan tenmir burit,
far ma mtyengin ulmir myor kabanir felnir mpane,
mpyaki masar,
nre rabtyar ma kotkir.
4 Nempa ka mfyatutu mir ngafele ne myof dalmir,
far ma myarkein ma myorip e mingamon myor tomwatar.
Mir adat a ne ma keta to nlai,
ma iane ma ubany desar na Ratu sounlury.
5 Luryain e,
batar ma ralele Ratu rose farane nbal la rfatutu nir ngafele.
Iane feti sir dedesar ma ralele Ratu ma dedesar ma rlarat sawnir.
6 Feleles farlan Sara ma nose nlarat safe ma sawany Abraham a nfalak.
Iane nwayat ma ntar i feti,
“Maken.”
Mpa farlan myose kabain ngamonar ma to mimtaut sasaf mlyarat safe ma Sara nose,
keta myeluk angkir.
7 Ma ber merwan mangafsawar a kmi a nbal,
ka myorip fen ngamone myor sawmir,
ma minremi feti sir to ramkoran rbalak a kmi.
Ma ka myalang sir fali keta miktem a myonri momorip dedesar.
Kmi myonri momorip dedesar a ne fali Ratu nfatutu Ni dalamy ngamone ber a kmi.
Ma ka myorip fen ngamone myor sawmir nema to sasaf a rfarangal mir sampangar.
Ka tmorip e tangamon tor tomwatar ma tose lan kabain ngamonar
3:8-12
8 Wangur,
to kufter ningw surat ye fuky e,
kfwalak ber a kmi:
Ka mir andaun lese na safe ma myose.
Ma farlan suse nre senange ka miktem a mibare.
Ma ka mikamis a kmi feleles farlan ma mkyamis wamir.
Ma ka mfyatutu mir dalam ngamone ma kete mifdas a kmi.
9 Farlan tomwatar rose yatak a kmi e,
kete mbyalas yatak ber sir.
Ma farlan ryaman a kmi e,
kete mbyalas ma myaman sir,
nempa ka mtyak Ratu ma nberkat sir.
Fali Ratu ntar a kmi ma mbyerkat tomwat walyetar nema keta Ratu nberkat kmi a nbal.
10 Na Kitap Lelerap dalam rarengi farye:
“Ise nmpeang ma ni momorip nangafel ma nsenang,
ka najake sukany ma to nlang ngribatin yatkar nre sukany a ntarful.
11 Ka nyebas ni adat yatkar ma nose kabain ngamonar.
Ka nareke dedesar ma nmorip e nangamon nor tomwatar.
12 Fali Ratu nsalan tomwatar ma rose rlarat Ni mpempeang ma ndengar nir tatakar,
nempa I natliur tomwatar ma rose kabain yatkar.”
Noak ma tkoman suse ka dedesar ma tsabar
3:13-22
13 Wangur,
farlan dedesar ma myose kabain ngamonar,
keta tomwatar to rose yatak a kmi.
14 Nempa boloka kmi mkyoman suse fali myose mlyarat Ratu Ni mpempeang,
ni botuan e,
Ratu keta nberkat a kmi.
Mpa kete dalmir suse ma mimtaut tomwatar ma rose suse kmi.
15 Ka myalang Yesus ninr Ray Silai ma myoding I myor dalmir kateman fali I a ne mir Mangnrur Silai.
Ma ka msiap dedesar nema farlan tomwatar renrat a kmi feti safema mtyikloi ma milele Ratu,
keta bise mfyalyole ber sir.
Nempa noak ma mfyalyole ber sir e,
ka myarkein ma myalang sir.
16 Ma ka dalmir a ranglerap ber sir,
nema farlan tomwatar rfalak kabain yatkar a na kmi fali myorip e,
mlyarat Yesus ninr Ray Silai,
mpa keta koko sir a rmeat na safe ma rfalak a ne.
17 Farlan Ratu nmpeang ma tkoman suse e,
ni ngafele e tkoman suse fali tose kabain ngamonar,
ma kete tkoman suse fali tose kabain yatkar.
18 Iane farlan ninr Ray Silai ma nkoman suse fali nose kabain ngamonar.
Ma I nmat lan lain lese la ntebus tomwatar nir salar.
Boloka I to Ni sal nempa nmat ber tomwat salar.
I nose farane nema tangamon a tbali tor Ratu.
Tomwatar rfen I noak ma neluk tomwate nempa Ratu Smwangtany nafmorip a nbali I.
19 Ma Ratu Smwangtany nafkoran I ma nti nafwibar Ratu Ni ngribatnir ber mangmwatar smwangtir.
Sir ye ma ramin ain makrokap farlan sel.
20 Mangmwatar smwangtir a ne,
iane sir ma rmat noak na are nabi Nuh.
Sir ye ma to rose rlarat Ratu Ni mpempeang.
Noak ma Nuh nose ni kabal,
Ratu nsabar la ndaf sir ma rtate nir salar.
Nempa lan tomwatar wal ma rfangat kabal a ne mpa Ratu nfair sir nof kjaip silai.
21 Kjaip silai ma natloram saryamprene noak a ne,
iane feleles farlan tomwatar radiris a kmi lere ye,
la nfatutu feti Ratu nfair a kmi.
Noak ma radiris a kmi iane to feti ralin kalin rayar rof tenmir,
nempa mtyak Ratu ma naflerap dalmir.
Ma nof ma radiris a kmi a nbal,
kmi milele feti Ratu nfair a kmi fali nafmorip a nbali Yesus ninr Ray Silai.
22 Ma noak ma Yesus ninr Ray Silai nmorip a nbali,
I nfangat far surga,
ma namtoran Ratu seriny fian.
Ma nfarete malaektar,
ma smwangtar monuk ma rkuase na langit ma saryamprene.