Ka dedesar ma tanriak Ratu Ni ngribatnir
2:1-3
1 Wangur, kmi mdyengar safe ma Ratu nose ber a kmi lo, mpa ktwak ma ka myebas monuk mir adat yatkar, kete sukmir a rtarful, kete myose lole ma mingamon safo dalmir mpusuk, kete dalmir maninik tomwatar ma rlengan a kmi, ma kete misompun. 2 Ma ka dedesar ma minriak Ratu Ni ngribatnir, feleles farlan kanak ma betno ramtoranbabe i ma dedesar e nanriak ma nsusw enany. Farlan myose farane keta mtyafal ma mimkoran ma milele Ratu, ma keta I nfair a kmi. 3 Fali kmi mifai feti Yesus ninr Ray Silai ne dalamy nangamon desar.
Yesus ninr Ray Silai farlan bati ma nmorip
2:4-10
4 Yesus ninr Ray Silai ye farlan bati ma nmorip mpa mya ma mikmat I. Bati ne tomwatar ryebas i fali rdaun feti to kotkyan, nempa Ratu nfil bati ne fali na sounlury e bati ne kotkyan desar. 5 Kmi mikmat I lo mpa kmi farlan bati ma nmorip a ne nbal. Ma Ratu nfil a kmi ma myeluk das banir la nafdiri Ni das ma namin. Ma nfil a kmi a nbal ma myeluk mangsompar ma mlyangun I. Ma keta kmi mlyoik snyompar ber Ratu mlyarat Ni mpempeang. Ma Ratu dalamy nsenang ma nlangun mir snyompar a ne fali dalmir lese myor Yesus ninr Ray Silai lo. 6 Na Kitap Lelerap dalam nfalak feti Yesus ninr Ray Silai farlan bati ma namkoran. Ngribatnir a ne nfalak farye:
“Msyalan, Yakw kfwil batyar sa ma kotkyan desar ma neluk bati ma namkoran
la kufdiri das na Yerusalem.
Mpa ise ma nalele tomwate ma neluk bati ma namkoran a ne keta Ratu to nafmweat i.”
7 Bati ne ubany desar ber tomwatar ma ralele Yesus, nempa sir ma to ralele Yesus ka ranremi safe ma nfalak na Kitap Lelerap dalam,
“Bati ma tuknar rdaun feti to kotkyan a ne lere ye neluk bati ma namkoran.
8 Ma bati ne bise nose nbal ma tomwatar rtutuk sir a na ma rfufw. Sir rtutuk sir a na bati ne fali to rose rlarat Ratu Ni ngribatnir. Ma rtutuk sir fali Ratu ntetak ber sir farane lo.”
9 Nempa kmi e to farane fali Ratu nfil a kmi ma myeluk Ni tomwatar lo. Ma nfil a kmi a nbal ma myeluk mangsompar. I nose farane nema mlyangun I neluk Ray. Ma Ratu nfil a nkese kmi ma myeluk Ni tomwatar. Ma I nalin a kmi nof makrokap, ma nor a kmi far ngaodir ma idak resi. I nose farane nema mifwibar kabain mpasalnar ma I nose.
10 Luryain e kmi to myeluk Ratu Ni tomwatar, nempa lere ye kmi myeluk Ni tomwatar lo. Luryain e I to nlompang a kmi, nempa lere ye I nfatutu Ni lolompang ber a kmi.
Tomwatar ma ralele Yesus ninr Ray Silai ka rfatutu nir wewelmpampan ngamonar
2:11-17
11 Wangur ma kwamis a kmi, ka minremi feti kmi myorip a na saryamprene ye farlan tomwat mangum. Mpa ktwak kof a kmi ma ka mtyate mir makeus yatkar, fali mir makeus a ne nose ma keta dedesar ma mbyangal Ratu Ni mpempeang. 12 Ka mfyatutu mir wewelmpampan ngamonar ber tomwatar ma to ralele Ratu. Kmi myose farane nema farlan rfasale kmi ma rfalak feti myose kabain yatkar, koko sir bise ma rsalan mir wewelmpampan ngamonar a ne. Ma keta rdangin Ratu noak ma nma saryamprene.
13 Wangur, farlan mpyeang ma tomwatar rdangin Ratu, ka myose mlyarat safe ma mangfaretar rfalak, fali nir kuase ma rfarete safe-safe monuk. 14 Ma ka mlyarat a nbal tomwatar ma mangfaretar rfil sir a ne. Fali sir ye ma nir kuase ma rukun tomwatar ma rose kabain yatkar, ma nir kuase nbal ma rdangin tomwatar ma rose kabain ngamonar. 15 Ratu nmpeang ma myorip e myose kabain ngamonar, nema noak ma tomwatar ma to ralele Ratu rsalan mir momorip a ne, to bise ma rfasale kmi ma to rfalak sasaf. 16 Ratu nalin kmi nof mir salar lo mpa kete myorip farlan salar rakawar a kmi. Ma kete mdyaun feti Ratu nalin a kmi lo, mpa myose salar motak. Nempa ka myorip farlan Ratu Ni mangkaryayar. 17 Ka myalang tomwatar monuk, mkyamis tomwatar ma ralele Yesus. Ma ka myalang Ratu, ma mir mangfaretar a nbal.
Yesus ninr Ray Silai nkoman suse nema neluk contoh ber kit
2:18-25
18 Wangur ma myeluk kawar, ka myalang mir bos ma myose mlyarat safe ma nfalak. Ka kete myalang lan mir bos ma nmarkein ma nangamon ber a kmi, nempa ka myalang a nbal mir bos ma nose yatak a kmi. 19 Farlan to myose sal sasaf nempa mir bos dedesar ma nsiksa kmi, ka msyabar motak ma mibare susar a ne boloka to mir sal. Fali mifai feti iane ma mifsenange Ratu dalamy mpa keta nberkat a kmi. 20 Ma farlan mir bos nsiksa kmi fali myose salar, keta Ratu to ndangin a kmi boloka msyabar ma mibare susar a ne. Nempa farlan mir bos a nsiksa kmi fali myose ngamone, ma dedesar ma msyabar ma mibare susar a ne, keta Ratu nberkat a kmi. 21 Ratu nfil a kmi nema dedesar ma myose kabain ngamonar boloka tomwatar rsiksa kmi. Fali Yesus ninr Ray Silai nkoman suse nbal ber a kmi. Ma I neluk contoh ber a kmi nema mlyarat I a nbal. 22 Farlan ma rarengi na Kitap Lelerap dalam farye:
“I to lain sa ma nose sale, ma to lain sa ma nlepusuk.”
23 Noak ma tomwatar ryaman I, I to nbalas. Noak ma tomwatar rsiksa I, I to nfalak ber sir, “La kbwalas a kmi.” Nempa I nloik ngriar monuk ne ber Ratu ma neluk mangtetak ma namlonry. 24 Noak ma Yesus ninr Ray Silai nmat a na katutun sangwalu, I nabare ninr salar monuk. I nose farane nema nalin kit tof ninr salar ma tmorip e tlarat Ratu Ni mpempeang. Ma Ni mngalar ma darany a ne ma nafngamone kit. 25 Luryain e kmi myorip farlan domba ma nlai. Nempa lere ye mbyali kmi ma mlyarat Yesus ninr Ray Silai, ma neluk Mangnrure ber a kmi a nbal. Keta I dedesar ma najake kmi, farlan mangajak domba najake ni dombayar.