Petrus ni surat pertama
Salam
1:1-2
1-2 Ye surat nof yakw Petrus.
Yakw kweluk Yesus ninr Ray Silai Ni Mangsiduk.
Yakw kurengi surat ye ber kmi monuk ma Ratu nfil a kmi a ne.
Kmi ye ma myeluk mangum ma mimin monuk mpenempen na propinsi Pontus,
Galatia,
Kapadokia,
Asia ma Bitinia.
Amninrar Ratu nfil a nkese kmi ma myeluk Ni tomwatar nlarat safe ma ntetak nof luryain lo.
Ma Ratu Smwangtany nkarya na dalmir ma nose ma myeluk Ni tomwatar.
Ratu nose farane nema dedesar ma mlyarat Yesus ninr Ray Silai.
I nfil a kmi a nbal nema darany ma ntarbui na katutun sangwalu ne la ntebus mir salar ma nose ma minglerap.
Yakw ktwak ma weni Ratu nfatutu Ni dalamy ngamone,
ma nal maline ma nlie nlengan ber a kmi.
Kit talele Yesus mpa bise ma tdaf safe ma Ratu nyoding ber kit a ne
1:3-12
3 Wangur,
mya ma tdangin Ratu.
Ratu ye Yesus ninr Mangnrure ma neluk ninr Ray Silai ne Amany.
Mya ma tdangin I fali nlompang resi kit mpa nal momorip beberi ber kit.
Ma Ratu nafmorip a nbali Yesus ninr Ray Silai nof Ni mamate,
mpa safe ma kit tdaf a ne la nafdiat ber kit a nbal.
4 Safe ma kit tdaf a ne Ratu nau na surga.
Iane berkat ma keta to nayatak,
to npusuk ma to naweng.
5 Ratu nau berkat monuk a ne ber a kmi.
Ma fali kmi milele I mpa najake kmi nor Ni kuase,
terik ler famudi.
Na lere ne keta kmi msyalan desar ma Ratu nfair a kmi farlan ma nyoding a ne.
6 Mpa ka dalmir a rsenang na safe-safe monuk ma Ratu nose ber a kmi a ne.
Boloka lere ye kmi mkyoman susar yadin nempa keta to dodo.
7 Susar yadin ma kmi mkyoman a ne la nfatutu feti kmi milele botuan Yesus nre tate.
Iane feleles farlan mase ma tomwatar rapu nema rsalan feti mase botuan nre tate.
Mase ma keta namemetam motak e tomwatar rose farane,
ma nlengan a nbal e kmi.
Ka mtyungan anteman yadin nema bise ma mifai feti milele botuan Ratu nre tate.
Farlan dedesar ma milele I,
noak ma Yesus nma nbali saryamprene,
keta Ratu ndangin a kmi,
nalang a kmi ma nafdas a kmi.
8 Botuan feti kmi to msyalan Yesus a fuky nempa mkyamis I.
Ma terik lere ye kmi to mkyeban I nempa dedesar ma milele I.
Iane nwayat ma mimpumpuki kmi ma nlie nlengan,
9 fali Ratu nfair a kmi lo.
Ma I nfair a kmi fali kmi milele Yesus ninr Ray Silai.
10 Luryain e nabyar rafbotin lo feti keta Ratu nfair a kmi fali Ni dalamy ngamone ber a kmi.
Ma sir rareke ma rsalan fen ngamone ngriar a ne,
nema rkaul ral feti felan farpe ma Ratu nfair tomwatar ma ralele I.
11 Ma Yesus ninr Ray Silai Ni Smwangtany norang sir ma nafbotin feti Yesus ninr Ray Silai keta nkoman suse,
nempa lama nkoman suse e,
Ratu keta nafdas I.
Iane nwayat ma rareke ma rsalan fen ngamone feti bengfir ma felan farpe ma Ratu nfair sir.
12 Ratu nafbotin Ni snyurat ber nabyar.
Ma nabyar rareke ma rkaul ral Ni snyurat a ne.
Ma snyurat a ne keta to ber koko sir na are luryain a ne,
nempa ber a kmi na are ye nbal.
Safe ma Ratu nafbotin ber nabyar luryain a ne,
lere ye kmi mdyengar desar lo myof tomwatar ma rafbotin Ibar Ngamone na Yesus ninr Ray Silai.
Ratu nsiduk Smwangtany nof surga ma norang tomwatar ma rafbotin Ibar Ngamone ne.
Ma malaektar a nbal rmpeang ma rafai feti felan farpe ma Ratu nfair tomwatar.
Ratu nfil kit ma ka tmorip e tanglerap
1:13-25
13 Iane nwayat ma ka mdyaun fen ngamone ma msyusan dalmir,
ma mtyayan myal mir makeus.
Ma ka dedesar mdyaf safe ma Ratu nyoding ber a kmi a ne,
nema Ratu keta nal berkat silai ber a kmi,
noak ma Yesus ninr Ray Silai nma nbali saryamprene.
14 Ma kmi myeluk Ratu angkir lo mpa ka myorip a mlyarat Ni mpempeang.
Ma kete mlyarat mir makeus yatkar farlan luryain ma to mifai Ratu.
15 Fali Ratu ma nfil kmi a ne nanglerap ma to Ni sal.
Mpa ka myorip e minglerap feleles farlan I a nbal,
ma kete myose sale na safe kabain.
16 Fali na Kitap Lelerap dalam nfalak:
“Ka myorip e,
minglerap ma to myose sale na safe kabain fali Yakw kunglerap ma to Ningw sal.”
17 Ma noak ma msyampayang e,
kmi mtyar Ratu feti “Amo.”
Ratu ye nbal ma nukun tomwatar nlarat safe ma sir rose,
ma to nasalan sou.
Mpa noak ma myorip a na saryamprene ye ka myalang I desar.
18 Fali mifai feti Ratu ntebus a kmi nof mir wewelmpampanar ma to ubnir.
Ma wewelmpampanar a ne ma empmir nusmir rnau ber a kmi.
Ma I ntebus a kmi to nor mase nre perak ma bise ma nayatak.
19 Nempa Ratu ntebus a kmi nor ninr Ray Silai darany ma kotkyan desar.
Yesus ninr Ray Silai nmat feleles farlan domba anak ngafele sa ma rfen i neluk snyompe ber Ratu.
20 Ratu nfil Yesus ninr Ray Silai ye noak ma saryamprene to namin a fuky.
Nempa Ratu betno nafbotin I ma nfair a kmi noak ma saryamprene ketla namsos.
21 Ratu nafmorip a nbali Yesus ninr Ray Silai nof Ni mamate ma nau I a na ain medase.
Iane ma nwayat ma kmi milele Ratu,
ma keta dedesar ma mdyaf safe ma nyoding ber kmi a ne.
22 Ma lere ye kmi myorip a mlyarat Ratu Ni anftutw botunar mpa minglerap ma mtyate monuk mir adat yatkar lo.
Iane nwayat ma mkyamis waninrar ma ralele Yesus myor dalmir kateman.
Mpa yakw ktwak ma ka mireke ma mikamis a kmi myor dalmir kateman.
23 Kmi myonri momorip beberi lo.
Ma mir momorip beberi ne to nof tomwatar ma keta rmat,
nempa nof Ratu ma nmorip dedesar.
Ma kmi myonri momorip beberi fali mlyarat Ratu Ni ngribatnir.
Ratu Ni ngribatnir ye ma rmon dedesar.
24 Na Kitap Lelerap dalam nfalak farye:
“Tomwatar na saryamprene ye sir farlan urwar,
ma nir ngafele ne feleles farlan urw fusyar ma rangafel.
Ma urwar a ne keta to dodo e raplai,
ma fusyar e ramtabar.
25 Nempa Ratu Ni ngribatnir ye dedesar ma ramin.”
Ratu Ni ngribatnir a ne,
iane Ibar Ngamone ma rafwibar ber a kmi.