Snyurat ber mangnrur gerejar ma soranyar
5:1-11
1 Wangur,
kmi ma myeluk mangnrur gerejar ne,
mdyengar fen ngamone safe ma kfwalak.
Yakw ye kweluk mangnrur gerejar farlan kmi a nbal,
ma kswalan desar ma ninr Ray Silai nkoman suse.
Ma noak ma I nma nbali saryamprene nor Ni dadangin keta yakw konri Ni dadangin a ne nbal.
2 Yakw ktwak kof a kmi,
ma ka msyalan fen ngamone soranyar ma Ratu nal ber kmi a ne,
farlan mangajak domba ma najake ni dombayar.
Ka msyalan sir myor dalmir senange mlyarat Ratu Ni mpempeang,
ma kete myor dalmir tubun.
Ka kete myose farane la minriak doit,
nempa myose farane fali mpyeang desar ma mtyulung sir.
3 Ka kete myose felmir far bos,
mpa mfyarete soranyar ma Ratu nal ber a kmi a ne mlyarat mir suke.
Nempa ka myose contoh ma nangafel ber sir nema bise ma rose rlarat a kmi.
4 Nema noak ma ninr Mangnrur Silai nma saryamprene,
keta I nal makota ma nangafel resi ber a kmi ma snyain idak dedesar.
5 Ma ber tabweryar a kmi a nbal,
ka mdyengar tomwatar ma rbalun rof a kmi a ne.
Ma kmi monuk ma milele Yesus ninr Ray Silai,
ka kete mifdas a kmi ma ka sa nalang sa.
Fali rarengi na Kitap Lelerap dalam farye:
“Ratu to nlangun tomwatar ma rafdas sir nempa nfatutu Ni dalamy ngamone ber tomwatar ma to rafdas sir.”
6 Mpa ka msyatngur ber Ratu ma Ni kuase ma nlie nlengan a ne,
nema nait ni tewat e,
I npote somir na tomwatar sonirlury.
7 Ma ka mlyoik dalmir ber Ratu na safe kabain ma rose ma dalmir suse,
fali I nsalan dedesar a kmi.
8 Ka mfyenai ma mijak dedesar myof smwangat yatkar nir ulun ma neluk mir musu ne.
I farlan singa ma npor ma nmpan a nlole ma nanriak tomwatar ma ntelan sir.
9 Ka mimkoran ma milele Yesus ninr Ray Silai nema bise ma mbyangal smwangat yatkar nir ulun a ne.
Fali kmi mifai feti tomwatar ma ralele Yesus ninr Ray Silai ma ramin mpenempen a ne rkoman suse rbalak a kmi.
10 Lere ye kmi mkyoman suse,
nempa keta to dodo,
fali Ratu keta nal safe-safe ma mpyerlu a ne,
ma nafkoran dalmir nema dedesar ma milele Yesus ninr Ray Silai.
Ratu Ni dalamy ngamone ber a kmi mpa nfil a kmi ma msyalan Yesus ninr Ray Silai Ni dadangin ma to terik fali dalmir lese myor I.
11 Ratu ye ma Ni kuase terik ma dedesar.
Amen.
Salam penutup
5:12-14
12 Wangur,
Silas ye ma ntulung yakw ma narengi surat ye.
Ma yakw kal i a kweluk waingw ma kulele i mpa ka milele i a nbal.
Yakw kurengi surat ye la kufkoran a kmi nema mifai feti Ratu nkamis desar a kmi mpa nfatutu Ni dalamy ngamone ber a kmi.
Mpa boloka ningw surat ye to melawas nempa la ntulung a kmi ma minremi dedesar Ratu Ni dalam ngamone.
13 Soranyar ma ralele Ratu ma ramin Babilon ye rkirim salam ber a kmi.
Sir a ne ma Ratu nfil sir a nbal.
Ma Markus nkirim salam ber kmi a nbal.
I ye ma kal i a kweluk anakw ma kwamis i.
14 Ma myose salam ber soranyar monuk na iane,
ma miomat lim la mfyatutu feti mikamis a kmi.
Ka weni Ratu nal maline ber a kmi monuk ma dalmir lese myor Yesus ninr Ray Silai.
Amen.
Nater lan ye.
Salam nof yakw Petrus.