Filipus i

Paulus ni surat ber soranyar na

Filipi

Ngribatin Luryain

Paulus ni surat ber soranyar na kote Filipi. I narengi surat ye noak ma namin sel. Kote Filipi ye namin propinsi Makedonia balisya timur. Noak ma Paulus nmpan ma nafwibar Ibar Ngamone na Yesus ninr Ray Silai ber tomwatar fen lain du, i nafburat soranyar na Filipi ye. Sir ye luryain e, reluk soranyar na Eropa. Noak a ne i nti e, nor tbwarnir tel. Sir a ne Silas, Timotius ma Lukas.

Paulus narengi surat ye ma nfalak ber soranyar na Filipi feti i dalamy a nsenang fali rtulung i a na ni karyae ma rafwibar Ratu Ni Ibar Ngamone na Yesus ninr Ray Silai ber tomwatar. Sir rtulung i noak ma betno luryain ma ralele Yesus ninr Ray Silai (1:13-14). I nfalak a nbal feti keta rfen i fali nafwibar Ratu Ni Ibar Ngamone ber sir. Ma farlan botuan farane keta i nlangun monuk-monuk a ne nor dalamy senange (2:17). I nmpeang a nbal ma nfalak ber sir ma ka ranremi ma dedesar e ralele Yesus ninr Ray Silai boloka rkoman suse (1:27-30; 4:1). I nfalak a nbal nema dedesar ma rmorip e, dalmir lese, rakamis sir ma to rafdas sir farlan Yesus ninr Ray Silai (2:1-5). I nfalak a nbal ma ka tafai feti Yesus ninr Ray Silai ye ubany nlengan nof safe-safe monuk. (3:1-11). Na surat ye Paulus ntak terima kasih nbal nof soranyar na Filipi fali rtulung i ma ral doit ber Epafroditus ma nonry ber i (4:15-20).

Surat ye isiny

1:1-11 Paulus ni ngribatin luryain

1:12-26 Paulus namin sel nempa Ibar Ngamone ntafal ma nsor

1:27; 2:18 Tomwatar ma ralele Yesus nir momorip

2:19-30 Timotius ma Epafroditus

3:1; 4:9 Paulus ni snyurtar ber soranyar na Filipi

4:10-20 Paulus nose terima kasih ber tbwarnir a na Filipi

4:21-23 Penutup.