Paulus ni surat ber soranyar na
Kolose
Ngribatin Luryain
Paulus narengi surat ye noak ma namin sel. I namin sel dalam fali i nafwibar Ibar Ngamone na Yesus. I narengi surat ye ber soranyar a na Kolose. Kolose ye kotar sa na propinsi Asia Kecil, balisya timur na Efesus. Noak a ne tomwatar ketnir rof Efesus rma Kolose ma rafwibar Ibar Ngamone ber tomwatar ma to Yahudi sir. Iane nwayat ma tomwatar ketnir na Kolose ralele Yesus.
Noak a ne tomwatar ketnir rof soranyar a ne raftutu anftutw lepuskwar. Sir rfalak feti soranyar ka rsatngur ber smwangtar ma rkuase saryamprenar betno Ratu nfair sir. Sir rfalak a nbal feti ka rose rlarat tetetkar ma Ratu nal ber Musa, ka rsunat sir, kete rane tnyamar ma ramoli, ka rose Yahudyar nir ler silayar na mpane bulan beberi nre na ler Sanari.
Paulus narengi surat ye ma naftutu soranyar a na Kolose feti Yesus ninr Ray Silai Ni kuase silai nlengan nof kuasar monuk na langit ma saryamprene (1:15-17; 2:10). Mpa soranyar ka rtikloi ma ralele Ray Silai ma kete rtikloi ma ralele kabain walyetar. Paulus nfalak a nbal ma ka kete rfaduli ror tuanggurw lepuskwar a ne (2:16). I nfalak feti yayatrwar monuk ma tomwatar rose ne to nir kuase sasaf ma nose ma tomwatar rliak sir rof makeus yatkar. Yesus ninr Ray Silai nose safe-safe monuk lo nema Ratu nfair kit tof ninr salar. Tomwatar monuk smwangtir a rmat lo nempa Ratu nafmorip a nbali sir nalyole Yesus ninr Ray Silai (2:13; 3:1). Iane nwayat ma tomwatar ma ralele Yesus ka rtate nir momorip wangim ma rose rlarat Ratu Ni mpempeang (3:1-17).
Surat ye isiny
1:1-14 Paulus ni ngribatin luryain
1:15-23 Yesus Ni kuase silai nlengan nof kuasar monuk
4:2-18 Penutup.