Paulus ntak a nbal ma soranyar na Filipi ma rose lan kabain ngamonar
4:1-9
1 Mpa wangur mir kateman,
ka mimkoran ma milele Yesus ninr Ray Silai far ma kfwalak ber a kmi a ne.
Yakw kwamis resi kmi ma kmpweang desar ma kutungan kor a kmi.
Fali kmi ye ma mfyair yakw ngarangw ma myose ma dalangw a nsenang resi.
2 Ma ber Euodia ma Sintikhe,
yakw ktwak desar ma ka midu a mingamon a mbyali ma dalmir lese,
fali kmi ye milele Ratu lo.
3 Ma tbwaringw Sunsugos ko.
Ko ye ma dedesar mor yakw ma tkarya ber Ratu.
Yakw ktwak ma mtwulung ma mufngamone sir,
fali radu a rkarya ma rmat a rlai desar la rtulung yakw ma mafwibar Ibar Ngamone.
Sir ye ma raktem Klemens ma tbwaringw walyetar ma rtulung yakw ma mkarya ber Ratu.
Yakw kulele feti ngarnir a ramin kitap momorip dalam.
Iane kitap ma rarengi tomwatar ngarnir ma keta rmorip dedesar ror Ratu.
4 Wangur,
ka dedesar ma mimpumpuki kmi fali dalmir lese myor Yesus ninr Mangnrure lo.
Yakw kfwalak kuflyair a nbal ma ka mimpumpuki kmi.
5 Ma ka mfyatutu mir adat ngamonar ber tomwatar monuk,
fali to dodo a nbal e,
Yesus ninr Mangnrure nma.
6 Ka kete dalmir suse na safe kabain.
Nempa ka msyampayang ma mlyoik safe kabain ma mpyerlu a ne ber Ratu.
Ma kete mimlufe ma myose terima kasih ber Ratu nbal.
7 Mpa farlan myose farane e,
Ratu keta nal maline ber a kmi.
Ma maline ne keta nose ma dalmir ma mir andanwar a ne rtai,
fali dalmir lese myor Yesus ninr Ray Silai lo.
Ma keta tomwatar rampriang a kmi fali mir andanwar rtai desar boloka susar diat a kmi.
8 Mpa wangur mir kateman,
to kufter ningw surat ye fuky e,
yakw ktwak ma ka dedesar ma mdyaun ngriar ma kfwalak ye:
Safe-safe ma botuan,
safe-safe ma rangamon,
safe-safe ma ramlonry,
safe-safe ma ranglerap,
safe-safe ma rose la rafsenange tomwatar,
ma safe-safe ma tomwatar rmpeang ma rdengar.
Ma ka mdyaun a nbal safe kabain ma ubany,
ma kabain ngamonar ma tomwatar rose nwayat ma tomwat walyetar rdangin sir.
9 Ma safe-safe monuk ma kuftutu ma kfwalyole ber a kmi,
ma kmi mdyengar a ne,
ka myose mlyarat.
Ma ka msyalan contoh myof yakw nbal,
ma myose mlyarat.
Farlan myose farane keta Ratu ma nal maline ber tomwatar a ne,
dedesar ma norang a kmi.
Paulus nose terima kasih na safe ma ral ber i
4:10-20
10 Soranyar mir kateman,
yakw kswenang resi ma kdwangin Yesus ninr Mangnrure fali boloka takes kit doan ye lo nempa kmi bise ma mtyulung yakw nbal.
Yakw to kfwalak feti mimlufe yakw lo.
Ni botuan e,
minremi yakw dedesar nempa to let ber a kmi ma mtyulung yakw.
11 Yakw kfwalak farye to feti kuwatan,
fali boloka ningw kabanir ramin nre to ramin,
nempa kose ma safe-safe ma ramin yakw ne dengan motak.
12 Ma yakw krwase monuk lo,
noak ma kmworip e,
ningw safe kabain nres nre to ningw sasaf desar.
Mpe suse nre senange,
kubotan nre kumlafar,
ma ningw kabanir a nres nre to ningw sasaf e,
iane dengan lo fali kmworip kor safe-safe ma ramin yakw.
13 Ma yakw boangw kal safe-safe monuk ma diat yakw ne fali Yesus ninr Ray Silai nal fakoran ber yakw.
14 Boloka farane kmi mtyulung yakw noak ma kwoman suse,
ma safe ma myose ne nangafel.
15 Tomwat Filipiar a kmi,
koko kmi a mifai lo feti noak ma betno kufwibar Ibar Ngamone ber a kmi,
ma ktwi a ktwate Makedonia ne,
to soranyar ma rof kote walyet ma rtulung yakw na ningw perluar,
lan a kmi.
16 Ma noak ma kumin Tesalonika e,
to lan lain lese ma mkyirim doit ber yakw.
17 Yakw kfwalak farane to feti kmpweang ma myal dedesar ber yakw.
Ni botuan e,
kmpweang ma kswalan a kmi ma dedesar ma myose kabain ngamonar nema Ratu ntafal ma nal berkat ber a kmi.
18 Mpe safe-safe ma mkyirim ber yakw ne klwangun lo ma nlengan a nbal.
Ma safe-safe ma yakw kpwerlu a ne ramin monuk lo fali Epafroditus nonry safe-safe ma mkyirim ber yakw ne.
Ma iane farlan mir snyompe ber Ratu ma nafsenange dalamy.
19 Ratu ma kswatngur ber I a ne Ni anoskai ma nlie nlengan desar.
Ma keta I nal safe-safe ma mpyerlu a ne nlarat Ni anoskai ma nlie nlengan a ne fali dalmir lese myor Yesus ninr Ray Silai.
20 Mpa mya ma tdangin Amninrar Ratu terik ma dedesar!
Amen.
Salam
4:21-23
21 Ka mfyalak ningw salam ber Ratu Ni soranyar monuk ma dalmir lese ror Yesus ninr Ray Silai ma ramin iane.
Ma soranyar ma ror yakw na ye rkirim salam ber a kmi a nbal.
22 Ma Ratu Ni tomwatar monuk ma ramin kote ye rkirim salam ber a kmi.
Ma nlengan a nbal e,
sir ma rkarya na Kaisar ni istana.
23 Yakw ktwak ma ka weni Yesus ninr Ray Silai nfatutu Ni dalamy ngamone ber a kmi.
Salam nof kam,
Paulus ma Timotius.