Ka tmorip e, tbalak Yesus ninr Ray Silai ma nafufu nbali I
2:1-11
1 Wangur mir kateman,
yakw kulele feti dalmir lese myor Yesus ninr Ray Silai mpa kmi myakoran.
Ma dalmir a rsenang fali I nkamis a kmi.
Ma kulele feti Ratu Smwangtany norang kmi a nbal,
mpa myorip e,
milompang a kmi ma mikamis a kmi.
2 Iane nwayat ma yakw ktwak desar ma mtyafal ma mifsenange dalangw myor ngriar ye:
Ka dalmir lese ma mikamis a kmi,
ma ka mir andaun lese ma myorip e,
mfyat ma lese nbal.
3 Ma myose kabanir e,
kete mdyaun lan tenmir nre la mifdas a kmi.
Nempa ka mtyomu kmi ma mdyaun feti tomwat walyetar rlengan rof a kmi.
4 Ma kete msyalan lan mir perluar,
nempa ka msyalan tomwat walyetar nir perluar a nbal.
5 Ma ka myorip e,
mlyarat Yesus ninr Ray Silai Ni adat ma farye:
6 Boloka Ni kuase silai ma feleles farlan Ratu nempa to nareke ma nomat Ni kuase ma farlan Ratu ne.
7 Ma nmpeang motak ma nafufu nbali I,
ma nose felany farlan karwar sa.
Ma nmorip feleles farlan tomwatar.
8 Noak ma nmorip neluk tomwate ne,
I nafufu nbali I ma nose nlarat Ratu Ni mpempeang terik ma nmat,
ma nlengan a nbal e,
nmat na katutun sangwalu.
9 Iane nwayat ma Ratu nafdas desar I ma nal kuase silai ma nlengan nof kuasar monuk.
10 Ratu nose farane nema sir monuk ma ramin surga ma saryamprene numur sir ma ramin mangmwat anir a ne rsatngur ber Yesus.
11 Ma keta sir monuk ryoding feti Yesus ne nir Ray Silai ma Mangnrure nbal,
ma farlan ryoding farane keta tomwatar rdangin Amninrar Ratu.
Ka ninr momorip farlan ngaodir ma nidak saryamprene
2:12-18
12 Wangur ma kwamis a kmi,
yakw kufai feti noak ma kor a kmi a ne dedesar ma myose mlyarat ningw snyurtar.
Ma lere ye ka myose mlyengan a nbal boloka to kor a kmi.
Fali Ratu nfair a kmi nof mir salar ma to nukun a kmi,
mpa ka dedesar ma myose kabain ngamonar,
ka myose farane ma myalang Ratu.
13 Ma fali Ratu nkarya na dalmir nwayat ma kmi mpyeang ma mlyarat Ratu ma keta nal fakoran ber kmi a nbal nema bise ma myose mlyarat Ni mpempeang a ne.
14 Mpa farlan myose safe kabain e,
ka kete nroke nraki kmi nre mibangal.
15 Nema tomwatar monuk bise ma rsalan feti kmi ye Ratu angkir ber a kmi,
ma sir to bise ma rfasale kmi fali mir momorip nanglerap.
Ma boloka myorip myor tomwat yatkar,
nempa mir adat a ne ka nangafel nema mir momorip idak farlan ftunar ma ridak saryamprene.
16 Kmi myorip farlan ftunar ma ridak saryamprene iane feti ka mifwibar Ibar Ngamone ber sir nema ronri momorip dedesar.
Farlan myose farane e,
dalangw a nsenang noak ma Yesus ninr Ray Silai nma nbali saryamprene.
Iane nfatutu feti ningw mangolnir to rti letkape,
ma iane farlan tomwate ma nmenang na pertandingan a nbal.
17 Noak ma luryain kufwibar Ibar Ngamone ber a kmi a ne,
kmi milele Yesus ninr Ray Silai ma myal mir momorip ber I ma myose mlyarat Ni mpempeang.
Iane nwayat ma boloka tomwatar rfen yakw fali kufwibar Ibar Ngamone ber a kmi,
keta klwarat motak,
ma dedesar ma kose terima kasih ber Ratu,
ma taktem a tsenang resi.
18 Ma kmi a nbal e,
ka msyenang ma taktem a tampumpuki kit.
Timotius ma Epafroditus
2:19-30
19 Wangur mir kateman,
yakw kulele feti to dodo a nbal e,
Yesus ninr Mangnrure nal dalamten ngamone ma klwuan Timotius ma nti nakmat a kmi.
Nema noak ma nbali i ma kdwengar ibar na kmi e,
dalangw a nsenang.
20 Yakw klwuan Timotius fali lan i ma ni andaun far yakw ma i nfaduli desar ma nmpeang ma ntulung a kmi na mir perluar.
21 Tomwat walyetar rmpeang lan ma rurus koko sir nir momorip ma to rperlu ma rose rlarat Yesus nir Ray Silai Ni mpempeang.
22 Koko kmi a mifai lo feti Timotius ye tomwatar sa ma nalarat liry.
Ma i ntulung yakw farlan kangkir sa ma ntulung amany noak ma madu a mafwibar Ibar Ngamone.
23 Mpa farlan kufai feti keta ralin yakw kof sel nre tate,
betno kusnyalik ma klwuan i ma nti nakmat a kmi.
24 Nempa kulele feti Yesus ninr Mangnrure ntulung yakw mpa keta to dodo a nbal e,
ktwi kukmat a kmi.
25 Ma yakw kdwaun feti ka klwuan tbwarninrar Epafroditus ma nbali i ber a kmi.
Luryain e,
kmi mlyuan i ma nma ma ntulung yakw na ningw perluar.
Ma i ye ma maktem a mkarya ma mabare susar monuk noak ma mafwibar ibar na Yesus ninr Ray Silai.
26 Mpe yakw klwuan ma nbali i ber a kmi fali nanremi resi kmi.
Ma dalamy suse nbal fali nafai feti mdyengar ibar na i lo feti nafanas.
27 Botuan feti i nafanas ma ketla nmat,
nempa Ratu nlompang i mpa nose ma nangamon.
Ratu to nlompang lan i nempa nlompang yakw a nbal nema dalangw kete ntafal ma suse.
28 Iane nwayat ma kmpweang desar ma klwuan ma nbali i ber a kmi.
Nema noak ma msyalan i e,
dalmir a rsenang,
ma yakw na ye dalangw a ntai nbal.
29 Mpa ktwak ma ka mlyangun i myor dalmir senange farlan ma mlyangun soranyar sa.
Ma ka myalang tomwatar monuk ma nir adat farlan i a ne.
30 I ketla nmat fali nkarya ber Yesus ninr Ray Silai.
Ma nkarya e,
to ndaun ni mamate la nlitan a kmi ma ntulung yakw na ye nbal.