Inyarubha ya okwamba ya
Yowana
Obhutangati
Jinyarubha jisatu jinu ejiruubha, jitakutogora unu ajikaamire. Nawe obhusimukwa okusooka riyimbo rya okwamba Kirisito amarire okwibhurwa obhwayika ati, omukaami wa jinyarubha ejo ni Yowana. Yowana oyo aariga ari umwi wa jitumwa ekumi na bhabhiri bha Yeesu. Ka wone, niwe ꞉aakaamire Echitabho chinu echitogwa Yowana na Echitabho cha Obhusweruro. ꞉Aakaamire jinyarubha jinu bhunu aariga ekaaye mu‑musi gwa Efeeso mu‑chaaro cha Asiya. Ku‑mwanya gunu orubhaara orwo orutogwa ati Ebhuturuuki. Omukaami omwanya gunu kaayika ati “eswe,” ku‑nyarubha jaaye, kaayika inguru yaaye na jitumwa jeejaabho.
Yowana aariga akokoowe omwanya gunu ꞉aajikaamire. Omwaka gunu ꞉jaakaamirwe gutakumenyakana kisi, nawe ugutura okubha agati ya omwaka 85 okukingira omwaka 95 Yeesu Kirisito eebhuuywe.
Ku‑nyarubha jinu, omukaami kakaamira abheekirisya bhanu bhaariga nibheekumanya mu‑makanisa ga mu‑chaaro cha Asiya. ꞉Aabhendere muno na ku‑nyarubha jinu ꞉aabhabhirikiiye ati “abhaana bhaani mu‑riikisya” (2:1) na “abheendwa bhaani mu‑riikirisya” (2:7).
Ku‑nyarubha ya okwamba, ꞉aakaamiiye abheekirisya abho korereki abhatongere inguru ya obhurame bhwa Echikirisito, na okubhakengya inguru ya ameeyigisyo ga orubheeyi. Bhaariga bhari‑wo abheeyigisya abharebhe bhanu bhaariga bhaasigeene na rikanisa, bhaagendaga erya na enu mu‑rubhaara orwo na okwiyigisya ameeyigisyo ga orubheeyi. Okukira ejo, Yowana ꞉aakomeeresiisye inguru ya echimari cha eriikirisya rya Echikirisito, korereki abhakomeesye na okusimbisya abhaanu mu‑riikirisya. Mu‑meeyigisyo gaaye ꞉eeyigisiisye inguru ya eryenda, okufwirana echigongo, okubha na obhumwi, okuyiga ebhibhiibhi na obhuwanga bhwa akajaanende koone.