Inyarubha ya kabhiri ya
Peetero
Obhutangati
Inyarubha inu, ꞉yaakaamirwe na Peetero, itumwa ya Yeesu Kirisito. ꞉Aakaamiiye abheekirisya bhoone, korereki bhagenderere okumenya echimari cha Kirisito (1:1). Obhukarariiye bhwaye bhwariga bhuri kuyingirira ameeyigisyo ga orubheeyi ga abhaanu abharebhe, ganu gaariga gataasyanyiisye na echimari cha Emisango ja Ekisi. Injira ya okuyingirira ameeyigisyo ago mw‑ikanisa niyo inu, abheekirisya bhagwate ameeyigisyo ga echimari ganu agareterera abhaanu okumenya Nyamuwanga na omwana waaye Yeesu Kirisito. Ameeyigisyo ga echimari ago, geeyigisibhwaga na bhanu ꞉bhaarorere Yeesu Kirisito na ameeso geebhwe abheene na okutegeresya jinu aariga ˆneeyigisya (1:16-18). Peetero kaakomeeresya jinu ejikenwa mu‑bhurame bhwa Echikirisito na inguru ya obhwiyikanyibhwa ku‑mirimu ja Nyamuwanga.
Ka wone, kaagonya kwa obhururu emirimu na jitungwa ja abhaanu bhanu bhaariga nibhaswisya ameeyigisyo ga orubheeyi. Keeresya ati abhaanu abho, abhaswasya bhanu bhaariga nibharindirira Kirisito okusubha rwa kabhiri kwa okubhabhwira ati eryo richaari okukorekana. Peetero kaabhasubhya kwa okukomeeresya ati Yeesu achaari kusubha ku‑songa ya obhwigumiirisya bhwa Nyamuwanga. Nyamuwanga keenda okurindirira muno, korereki abhaanu bhaafu bhamwikirisye na okuchunguka.