Inyarubha ya kabhiri ya
Peetero
Obhukeesya
1
1 Inyarubha inu niikaamire anye Simooni Peetero, omukosi na itumwa ya Yeesu Kirisito. Enikaamira emwe bhanu muyaaywe eriikirisya riryarirya rya obhurambu rinu eswe wone chibhwene, okutura rirenga rya Nyamuwanga na Omuchungusi weeswe Yeesu Kirisito.2 Obhwitiriranya na omurembe okusooka ku‑Nyamuwanga bhyongesibhwe kw‑imwe, ku‑njira ya okumenya Nyamuwanga na Yeesu, Raatabhugenyi weeswe.
Mubhirikiiywe na okusorwa na Nyamuwanga
3 Nyamuwanga okutura ku‑bhuturo bhwaye, achiyaaye emisango joone jinu echikena, korereki chibhe na obhuwanga na chimuyaane echibharo. Achiyaaye ejo, ku‑njira ya okumumenya unu achibhirikiiye ku‑songa ya rikusyo na obhwa ekisi bhwaye omwene. 4 Kw‑ijo, achiyaaye ebhiyaanwa ebhinene bhya obhurambu, bhinu ꞉aachiragire. Ebhiyaanwa ebhyo, ebhireterera chisige obhunyamuke bhunu bhuri ku‑chaaro ku‑songa ya okurigira okubhiibhi. Ka wone ebhireterera chisangire obhusimukwa bhwa Nyamuwanga.
5 Ku‑songa ya ejo, mwikomeesye muno korereki eriikirisya ryemwe ryongesibhwe bhwa ekisi, bhwa ekisi obhwo bhwongesibhwe obhumenyi. 6 Ka wone, obhumenyi obhwo bhwongesibhwe okwiyingirira, okwiyingirira okwo kwongesibhwe obhwigumiirisya, obhwigumiirisya obhwo bhwongesibhwe okuyaana Nyamuwanga echibharo. 7 Okuyaana Nyamuwanga echibharo okwo kwongesibhwe okwendana rwa abhayiri, okwendana rwa abhayiri okwo kwongesibhwe obhufura bhwa eryenda. 8 Araabha jitungwa ejo jikeyongesya kw‑imwe, jiribhasakira musige okubha rwa amati ganu gatakusoosya amatwasyo, mu‑kusombookerwa Raatabhugenyi weeswe Yeesu Kirisito. 9 Nawe omuunu unu atari na jitungwa ejo, omwene ari rwa omuwofu, nikwo okwayika ati, atakurora kura, kwa okubha arabhiiywe ati Nyamuwanga amwesiisye ebhibhiibhi bhyaye.
10 Mbe, abhayiri bhaani, mwikomeesye muno okweresya chimari ati Nyamuwanga abhabhirikiiye na okubhasora. Araabha muramire ku‑njira eyo, mtariikuujura wuri. 11 Kutyo, murikumibhwa kisi mu‑bhukama bhwa akajaanende bhwa Raatabhugenyi na Omuchungusi weeswe Yeesu Kirisito.
12 Kurwa ejo, nirigenderera okubheechukya emisango ejo siku joone, noorwo kutyo omujimenya na okwimaririra mu‑chimari chinu ꞉mweeyigiiye. 13 Enirora ati, ni bhusibhusi nibhe nimbechukya inguru ya emisango ejo, omwanya gwone gunu nichaaramire mu‑mubhiri gunu guri rwa echiwuuna. 14 Nimenyere ati omwanya gwani gwa okusooka ku‑chaaro kunu guri yeeyi, kwa okubha nikwo kutyo Raatabhugenyi weeswe Yeesu Kirisito ꞉aansweruriiye. 15 Ka wone, niriikomeesya nikaame emisango ejo, korereki omwanya gunu niribhaga nifuuwe, mubhe nimujiichuka.
Abhabhambaasi bha rikusyo rya Kirisito
16 Omwanya gunu chaariga nichiiyigisya kutyo ariija ku‑bhuturo bhwaye, Raatabhugenyi weeswe Yeesu Kirisito, chaariga chitakwiyikanya jingani ja kara jinu jikaamirwe kwa obhwenge. Tari eswe ꞉chaarorere rikusyo ryaye kwa ameeso geeswe abheene. 17-18 Eswe chaariga chiri aamwi na Yeesu mu‑chiima echeeru, omwanya gunu ꞉aayaaywe echibharo okusooka ku‑Raata Nyamuwanga. Omwanya ogwo, obhuraka bhwa rikusyo rikuru ꞉bhwasookere mu‑rwire ku‑Nyamuwanga omwene, nibhwayikaga ati, “Unu niwe Omwana waani omwendwa,a niwe kaankondisya.” Kurwa ejo, eswe abheene chaariga chiri abhabhambaasi bhanu ꞉choonguuwe emisango ejo.b
19 Wone chiri na emisango ja abharagi, jinu jirumateene muno. Emwe murikora kisi araabha murijigwata, rwa kutyo omugwata idara inu eyimirika mu‑chisuute, okukingira omwanya gunu obhucheera na inyamaananga okubhamirikira mu‑myoyo jeemwe. 20 Nawe, okukira ejo, mwichuke ati bhutari‑wo obhuragi bhwa Ebhikaame Ebhyeru bhunu abharagi ꞉bhayobhoowe okuruubhana na obhwiganirisya bhwebhwe abheene. 21 Okubha gutari‑wo wuri omusango gwa obhuragi gunu gusookeene na okwenda kwa omuunu. Tari abhaanu ꞉bhaasoosiisye obhuragi okusooka ku‑Nyamuwanga nibhatangasibhwaga na Mwoyo Mweru.