Abheeyigisya bha orubheeyi
2
1 Nawe omwanya gwa abharagi, ꞉bheebhukire abharagi abhabheeyi agati ya Abhayisirayeeri. Nikwo kutyo wone, abheeyigisya bha orubheeyi bhariibhuka agati yeemwe. Abhaanu abho, bhariyigisyaga ku‑bhurigerige ameeyigisyo ga okuyabhya abhaanu, noorwo bhariigaana Raatabhugenyi, unu abhagurire. Ku‑njira eyo, abheene bhariireetera bhwangu okusingaarika kwebhwe abheene. 2 Ka wone, abhaanu bhaafu bhariruubha jinjira jeebhwe ja orukubho. Ku‑songa ya abheeyigisya abho, injira ya echimari irifumwa. 3 Mu‑kurigira kwebhwe kwa ebhiinu, bharibha nibhabhabhwira jingani ja orubheeyi, korereki bhabhone chinu abheenda okutura kw‑imwe. Nawe okusookerera kara, indamu yeebhwe yeerabhirwe na chimari bharisingaarisibhwa!4 Nikwo kutyo bhamaraayika bhanu ꞉bhaakorere ebhibhiibhi,a Nyamuwanga ꞉ataabhasigire, tari ꞉aabheesere nyombe,b anu bhabhoyerwe na amaseega. Mu‑chisuute echirafuru cha nyombe eyo, abharindirira orusuku rurya rwa okuramurwa. 5 Ka wone omwanya gurya gwa Nuuwu, Nyamuwanga ꞉ataasigire abhaanu bhanu bhaariga bhatakumugayuka, tari ꞉aareetere induruma ku‑chaaro, abhaanu nibhafwa. ꞉Aawoniisye Nuuwu aamwi na abhaanu abhandi bhataanu na bhabhiri. Nuuwu oyo niwe aariga araasisiisye abhaanu bha emyanya jaaye ati bhakore jinu Nyamuwanga keenda. 6 Ka wone, Nyamuwanga ˆnaasingaarisya kwa omuriro emisi ja Sodoma na Gomoora na abhaanu bha emisi ejo. ˆNaabhakora bhabhe echijekekanyo ku‑bhaanu bhanu bhatakumugayukaga. 7 ˆNaawonʼya Ruuti, omuunu omurengeresi, unu ꞉aasurumbasiibhwe muno na akatungiiywe ka orukubho ka abhaanu abhanyamusi bha emisi ejo. 8 Omuunu omurengeresi oyo, aariga eekaaye agati yeebhwe kwa siku nyafu. Omwoyo gwaye ogwa obhurengeresi, gwariga nigunyaaka muno inguru ya jitungwa jeebhwe jimbiibhi jinu aariga ˆnaarora, na inguru ya emisango jinu aariga ˆnoongwa. 9 Kurwa ejo, Raatabhugenyi kaamenya kutyo kaawonʼya okusooka mu‑maregeejo abhaanu bhanu abhamugayuka. Ka wone, kaamenya kutyo kaja okuyaana ebhitiibha abhakosi bha ebhibhiibhi orusuku rurya rwa okuramurwa, 10 chimwichimwi bharya abharuubha okurigira okubhiibhi kwa echinyamubhiri na okugaya obhuturo bhwa Nyamuwanga.
Abheeyigisya bha orubheeyi abho, bhari na jitungwa ja jimamba na orwikuuya, noorwo bhatakuubhaya okufuma ebhibhumbwa bhya rikusyo bhya mu‑rwire. 11 Noorwo kutyo bhamaraayikac ni bhakuru ku‑managa na ku‑bhuturo okukira abho, nawe bhatakusitaaka na okufuma ebhibhumbwa ebhyo, imbere ya Raatabhugenyi. 12 Abhaanu abho abhafuma emisango jinu bhatakusombookerwa. Abhasusana na jityanyi jinu jitari na obhwenge, kwa okubha, ejiibhurwa era, korereki jigwatwe na okwitwa! Bharisingaarisibhwa rwa kutyo ꞉bhaasingaarisiisye abhaanu abhandi. 13 Ka wone, bhaririywa ebhinyaasyo rwa kutyo ꞉bhaaretereeye abhaanu abhandi. Abhakonderwa okukora emisango ja okurigira kwebhwe okubhiibhi abhwerubhweru. Noorwo omwanya gunu abharya aamwi na emwe, abhakondererwa okukora ejo, na kutyo okubhajiga.d Ku‑njira eyo, abheene bhari rwa obhutonetone ku‑myenda emyeru na abhabhaswasya. 14 Ameeso geebhwe geejuuywe obhuromesi na okurigira kwebhwe kwa okukora ebhibhiibhi kutari na obhuteero. Abhakongya abhaanu bhanu bhatarumateene mu‑riikirisya bhakore rwa abheene. Bhanasiisye emyoyo jeebhwe okurigira obhuniibhi. Abhaanu abho bheeyiimirwe! 15 Bhasigire injira ya obhwima, bhabhurire na okuruubha injira ya Bharaamu, omwana wa Bhewori.e Omwene ꞉eendere okuramira omuyeero ku‑njira ya okukora ebhibhiibhi. 16 Okuruubhana na jitungwa ejo, Bharaamu ꞉aagonyiibhwe na isikiri. Isikiri ni tyanyi nawe ꞉yaaromere kwa obhuraka bhwa echinyamuunu, korereki okuyingirira omuragi oyo, asige okukora emisango ja echimuumu.
17 Abhaanu abho bhari rwa amajibha ganu goomirire, bhari rwa orukoowa runu oruyembwa na echifurafufi. Echisuute echirafuru ti chibhiikirwe inguru yeebhwe. 18 Abhaayika emisango ja orwikuuya na jinu jitari na obhugajuro, na mu‑kuruubha okurigira kwebhwe okubhiibhi kwa orukubho, abhatega abhaanu bhakore kutyokutyo. Abhaanu bhanu abhategwa, bhaamamara okwikirisya na okusiga okukora jinu abhanyamusi abhakora. 19 Abheeyigisya bha orubheeyi abho abharaga abhaanu ati bhakabheekirisya bharibha na obhwitaage, kasi abheene abho nibho abhagaya bha obhunyamuke. Jiri kutyo kwa okubha bhuri muunu kaabha omugaya wa choonechoone chinu chimutamire. 20 Na abhaanu bhaakabha bhaasigire obhujabhi bhwa ku‑chaaro chinu kwa okumenya kisi Raatabhugenyi na Omuchungusi weeswe Yeesu Kirisito, nibheeya nibhakomwa rindi na okutaamibhwa okusooka mu‑bhujabhi obhwo, ku‑bhuteero itungwa ya abhaanu abho, eyibha mbiibhi muno okukira kutyo yaariga iri ku‑bhwambiro. 21 Jikabheeye ja ekisi ku‑bheene araabha bhakabheeye bhatakumenya chimwi injira ya rirenga, okukira okuyimenya nibhamara nibhasiga echiraagiro echeeru chinu Nyamuwanga ꞉aabhayaaye. 22 Iri‑wo inyaayika ya echimari inu eyayika ati, “Imbwa eyirya amatanake gaayo,”f wone iri‑wo eyindi inu eyayika ati, “Imbiiji inu yosiibhwe eyigaragasya rindi mu‑matoto!” Nikwo kutyo abheene wone ꞉bhaakorere.