Orusuku rwa Raatabhugenyi
3
1 Abheendwa bhaani, inyarubha inu ni ya kabhiri inu enibhakaamira. Ku‑nyarubha joone ebhiri niikomeesiisye okwimusya obhwiganirisya bhwemwe bhwa ekisi, ku‑njira ya okubheechukya. 2 Eneenda mwichuke emisango jinu ꞉bhaayikire kara abharagi abheeru na wone jinu ꞉aaragiriiye Raatabhugenyi na Omuchungusi okutura ku‑tumwa jaaye.3 Omusango gwa bhusibhusi gunu omukenwa mumenye ni ati, mu‑siku ja obhuteero, bhariija abhaanu abha okusiijaaka muno, bhanu bhariruubhaga okurigira kwebhwe okubhiibhi. Bharisiijaaka 4 nibhaayikaga ati, “Kirisito ꞉aaragire ati, arisubha! Woori ari aaki? Okusookerera bhasaaja weeswe bhafwe, emisango joone jiri kutyokutyo rwa kutyo jaariga jiri ku‑bhwambiro bhwa echaaro!” 5 Abhaanu abho, bhariikora wuti bharabhiiywe ati kara Nyamuwanga ꞉aayikire omusango era, orutumba na echaaro nibhibhumbwa. ꞉Aabhumbire echaaro okusooka mu‑manji na ku‑njira ya amanji. 6 Ku‑musango ogwo na ku‑manji ga induruma, echaaro cha omwanya gurya nichisingaarisibhwa. 7 Ka wone ku‑musango ogwoogwo Nyamuwanga aangariiye orutumba na echaaro chinu, korereki bhyochibhwe kwa omuriro. Abhyangariiye inguru ya orusuku runu ariramura abhaanu bhanu bhatakumugayuka, awo woori niwo bharisingaarika.
8 Nawe, abheendwa bhaani, mwasiga okurabhirwa omusango gunu ati, ku‑Raatabhugenyi, orusuku rumwi ruri rwa emiguuga chiwumbi na emiguuga chiwumbi ku‑mwene jiri rwa rusuku rumwi era.a 9 Abhaanu abhandi abheetogera ati Raatabhugenyi kaakoora okukuumisya jinu ꞉aaragire, nawe atakukoora. Tari omwene keegumiirisya ku‑songa yeemwe, okubha atakwenda omuunu noorwo umwi abhure. Chinu keenda ni ati bhoone bhate ebhibhiibhi bhyebhwe. 10 Orusuku rwa okusubha Raatabhugenyi Yeesu ruriija kwa okutakya rwa omwifi. Orusuku orwo, orutumba rurisooka‑wo kwa omurundumo munene, ebhiinu bhinu bhiri‑mo bhiryochibhwa kwa omuriro, echaaro wone chirisingaarisibhwa aamwi na ebhiinu bhyone bhinu bhiri‑mo.
11 Mbe, kwa okubha ebhiinu bhyone bhirisingaarisibhwa ku‑njira eyo, angu, emwe mwenderwe okubha abhaanu bha jitungwa ki mu‑chaaro chinu? Mwenderwe okwikara mu‑bhweru na okuyaana echibharo Nyamuwanga, 12 nimurindiriraga orusuku rurya rwa Nyamuwanga na okuyenja ati ruuje bhwangu. Ku‑songa ya orusuku orwo, orutumba ruryochibhwa kwa omuriro na okusingaarika na ebhiinu bhinu bhiri‑mo bhirigera kwa ribhirabhira riruru muno. 13 Nawe eswe echirindirira orutumba oruyaaya na echaaro echiyaaya rwa kutyo ꞉aachiragire, omwo nimwo abharengeresi bhariikara akajaanende koone.
14 Kurwa ejo abheendwa bhaani, omwanya gunu omurindirira orusuku rurya, mwikomeesye okubha abha omutima omweru muno mutari na esoro imbere ya Nyamuwanga, na mubhe na omurembe nage. 15 Mumenye ati, Raatabhugenyi keegumiirisya abhaanu, korereki bhabhone omwanya gwa okuchunguka. Nikwo kutyo omuyiri weeswe Pawuro omwendwa ꞉aabhakaamiiye ku‑bhwengeeso bhunu Nyamuwanga amuyaaye. 16 Ku‑nyarubha jaaye joone kaayikira emisango ejo. Jiri‑wo emisango ejindi jinu ni bhikomeeye okujisombookerwa ku‑nyarubha jaaye ejo. Emisango ejo, abhaanu bhanu bhatakusombookerwa na bhatarumateene mu‑riikirisya, abhajiyabhya, rwa kutyo abhayabhya Ebhikaame Ebhyeru ebhindi. Mu‑kukora kutyo, abheereterera okusingaarika.
Emisango ja obhuteero
17 Mbe, emwe abheendwa bhaani, mwamenyere emisango ja abheeyigisya bha orubheeyi abho. Kurwa ejo mutengeeje, korereki mwasiga okujigwa mu‑bhwengebhwenge bhwa abhakayi abho, nimugwa na okusiga okurumatana kwemwe. 18 Tari mugenderere okukura mu‑bhwitiriranya bhwa Raatabhugenyi na Omuchungusi weeswe Yeesu Kirisito, na mu‑kumumenya. Omwene akusibhwe, woori na akajaanende koone. Jibhe kutyo.