Okwangarira abhaana bha Nyamuwanga
5
1 Woori, enaayika na emwe abhakaruka bha rikanisa. Anye niri omukaruka oweejaanyu, unu ꞉neeroreeye omwene kutyo Kirisito ꞉aanyaasiibhwe. Ka wone, anye niri omusangisi oweejaanyu wa rikusyo rinu riri yeeyi okuswerurwa. Kurwa ejo, enibheerembeeresya emwe, 2 mubhe abhareefi bha ekisi ku‑bheekirisya bhanu ꞉mwayaaywe na Nyamuwanga. Ka wone, mubhaangarire mu‑mutima gwa ekisi, kutari kwa okusinyiirisibhwa, kutyo nikwo Nyamuwanga keenda. Musige okukora emirimu jeemwe kwa okurigira jipirya, tari okusooka mu‑mitima jeemwe joone. 3 Mwasiga okubha abhareefi abharuru ku‑bhanu omutangasya, tari rwa kutyo mwikaaye, mubhe echijekekanyo cha ekisi ku‑bheene. 4 Mbe, Omureefi Omukuru wa rikanisaa aribha aswerurwa, muriyaanwa orutengya rwa rikusyo runu rutakunyamuka.5 Nyabhuriko, emwe abhasigaji wone, mugayuke abhakaruka bha rikanisa. Emwe bhoone, abhasigaji na abhakaruka, bhuri muunu eekeeyega ku‑weejaabho na okusakirana. Mukore kutyo, kwa okubha jikaamirwe mu‑Bhikaame Ebhyeru ati,
“Nyamuwanga kaayaajana na abha echigundu,
tari bhanu abheekeeya, kaabhayaana obhwitiriranya.”b
6 Mbe, mwikeeyega emwaro ya obhuturo bhwa Nyamuwanga, omwene aribheenamusya omwanya gwaye gukakinga. 7 Muyaane Nyamuwanga jinyaako jeemwe joone, kwa okubha kaabhegana muno.
Okurema Syetaani na okwikirisya Nyamuwanga
8 Mwiyingirire na okutengeeja, omwanya gwone. Okubha omusoko weemwe, Syetaani,c keeyinda enu na erya rwa itare inu eyiruuta, niiyenja omuunu wa okusingaarisya. 9 Mbe, mureme Syetaani, murumatane mu‑kwikirisya Nyamuwanga. Mumenye ati, abheekirisya abheejaanyu ku‑chaaro choone, wone abhanyaaka rwa emwe.
10 Nyamuwanga wa obhwitiriranya bhwone, ꞉aabhabhirikiiye korereki musangire aamwi nage mw‑ikusyo ryaye rya akajaanende koone, aamwi na Kirisito. Omunyaaka kwa omwanya mutooto era, nawe Nyamuwanga omwene aribhakomeesya, aribhayaana amanaga na okubhakuumisya. 11 Nyamuwanga niwe ari na obhuturo akajaanende koone! Jibhe kutyo.
Obhukeesya bhwa obhuteero
12 Naabhakaamira inyarubha ifuyi inu, kwa obhusakisi bhwa Sirwano.d Anye enisombookerwa kisi ati, omwene ni omwiyikanyibhwa. Obhukarariiye bhwani ni kukomeesya emyoyo jeemwe na okubhabhwira ati, emisango jinu chimari ni bhwitiriranya bhwa Nyamuwanga. Woori, mwimereeguru murumateene mu‑bhwitiriranya obhwo. 13 Abheekirisya bha rikanisa rinu riri Bhaabheeri,e abhasorwa abheejaanyu, abhabhakeesya. Noorwo Maariko, omwana waani mu‑riikirisya, kaabhakeesya. 14 Mukeesyanye mu‑ryenda rya echimari.f
Emwe bhanu mwikirisiisye Kirisito, omurembe gubhe aamwi na emwe bhoone.