Obhurame bhunu obhukondisya Nyamuwanga
4
1 Mbe, Kirisito ꞉aabhwene ebhinyaasyo ku‑mubhiri gwaye, emwe wone mubhe mwimaririiye okubhona ebhinyaasyo rwa omwene. Enaayika kutyo, kwa okubha omuunu unu eekirisiisye okunyaaka echinyamubhiri, atakutura okugenderera okutungwa na ebhibhiibhi. 2 Ku‑njira eyo, jisiku jaaye joone jinu jisigaaye omwene okwikara ku‑chaaro kunu, ariikara rwa kutyo Nyamuwanga keenda, kutari okuruubha obhurigire bhwa echinyamuunu. 3 Kara awo, mwariga nimukora rwa kutyo abhaanu bhanu bhatakwikirisya Nyamuwanga bhaakoraga. Mwaruubhaga obhurigire bhwemwe obhubhiibhi na orukubho. Ka wone mwariga muri bhakorwa na okwenda muno jichikukuru ja ku‑chaaro, na mwariga nimuramya amasusano. Omwanya gwemwe gwa okukora emisango ejo gweyire. 4 Abhaanu bhanu bhatakwikirisya Nyamuwanga, abharuguura omwanya gunu abharora ati, mutakusangira aamwi nabho rindi okukora ebhibhiibhi, kurwa ejo, abhabhafuma. 5 Nawe, abheene bharikenwa bheebhagire ku‑Nyamuwanga. Omwene atengeejere okuramura abhaanu bhoone abhaanga na abhafuuwe. 6 Okubha inu niyo isonga abhaanu bhanu bharafuuwe, ꞉bhaaraasisiibhwe Emisango ja Ekisi, korereki noorwo kutyo ꞉bhaaramuuywe echinyamubhiri rwa abhandi, bhabhe abhaanga ku‑bhuturo bhwa Mwoyo Mweru,a rwa kutyo Nyamuwanga ari.7 Obhuteero bhwa emisango joone, bhuri yeeyi. Kurwa ejo, mwiyingirire na okwiyangarira mu‑misango joone, korereki mubhe na obhuturo bhwa okusabhwa. 8 Okukira ejo joone, mwendane muno, kwa okubha obhwendani obhubhisa obhwafu bhwa ebhibhiibhi.b 9 Mubhega abhafura emwe abheene kwa abheene mutajujuuma wuri.
10 Bhuri umwi weeswe ayaaywe echiyaanwa okusooka ku‑Nyamuwanga, korereki asakire abheejaabho. Kaakenwa okuchikorera emirimu kisi, rwa omwangarisi wa ekisi wa obhwitiriranya bhwa bhuri mbaga bhwa Nyamuwanga. 11 Omuunu woonewoone unu kaaraasya, araasye rwa omuunu unu kaaraasya emisango ja Nyamuwanga chimari. Unu kaasakira abhaanu abhandi, abhasakire ku‑bhuturo bhunu Nyamuwanga amuyaaye, korereki Nyamuwanga akusibhwe ku‑misango joone, okutura ku‑Yeesu Kirisito. Omwene oyo, ayaanwe rikusyo na obhuturo akajaanende koone. Jibhe kutyo.
Okunyaaka inguru ya Yeesu
12 Abheendwa bhaani, mwasiga okuruguura inguru ya ebhinyaasyo ebhiruru kabhukabhu bhinu ebhisookerera mw‑imwe okuregeeja eriikirisya ryemwe. Mwasiga okurora wuti ni chiinu chigenyi chinu echibhabhona. 13 Nawe mukondererwe ati omunyaaka rwa kutyo Kirisito ꞉aanyaakire. Mukonderwe woori, korereki mubhe na risandabha ryone, omwanya gunu arisubha na rikusyo ryaye niriswerurwa abhwerubhweru. 14 Araabha mukafumwa ku‑songa ya risiina rya Kirisito, mumenye ati muyaaywe amabhando. Omusango ogwo, ogweresya ati Mwoyo wa Nyamuwanga owa rikusyo ari aamwi na emwe. 15 Nawe, omuunu woonewoone kw‑imwe aasiga okunyaasibhwa kwa okubha ati ni mwiti, ni mwifi, ni mukosi wa ebhibhiibhi amwi omusokanya wa abhaanu. 16 Omuunu woonewoone akanyaaka kwa okubha ni muruubhirisya wa Kirisito, asige okurora jiswaro. Tari akuuye Nyamuwanga, kwa okubha omuunu oyo, kaabhirikirwa kw‑isiina rya Kirisito. 17 Mumenye ati, omwanya gwa obhuramusi gwakinga na Nyamuwanga kaja okwamba okuramura abhaana bhaaye. Woori araabha obhuramusi bhukambira kw‑iswe abhaana bhaaye, angu, jiribha kutiki ku‑bhanu bhatakwikirisya Emisango ja Ekisi ja Nyamuwanga? 18 Jikaamirwe mu‑Bhikaame Ebhyeru ati,
“Araabha ni kukomeeye ku‑bharengeresi okuchunguka,
jiribha kutiki ku‑bha ebhibhiibhi, bhanyataramya Nyamuwanga?”c
19 Kurwa ejo, bhanu abhanyaaka okuruubhana na okwenda kwa Nyamuwanga, bhamenye ati Nyamuwanga niwe Omubhumbi omwiyikanyibhwa. Kurwa ejo, bheetuure mu‑mabhoko gaaye, nibhagendereraga okukora ja ekisi.