Ameeyigisyo ku‑bhagasi na ku‑bharume
3
1-2 Nyabhuriko, emwe abhagasi bhanu mutwawe, mugayuke abharume bheemwe, korereki araabha bhari‑wo abharume bhanu bhatakwikirisya Emisango ja Ekisi, bhajiikirisye kwa okubha abharora jitungwa jeemwe ja ekisi. Kurwa ejo, abhatura okwikirisya Nyamuwanga noorwo bhatabhwiriiywe omusango. 3 Mwasiga okubha abhaanu bha okwinojoorya anja era, okusuka jifwiri, okufwara ebhiinu bhya inaaryo amwi emyenda ja obhurambu obhunene. 4 Tari okwinojoorya kwemwe kwambire mu‑myoyo jeemwe, okwinojoorya okwo kutakunyamuka noorwo okukokora. Ogwo nigwo omwoyo gwa obhworooro na okufungʼama, nicho echiinu cha obhurambu obhunene ku‑Nyamuwanga. 5 Nikwo kutyo kara wone, abhagasi bhanu bhaariga nibheeyikanya Nyamuwanga, bheenojooryaga na okugayuka abharume bheebhwe. 6 Owumwi wa abhagasi abho ni Saara omugasi wa Bhurayimu. Saara aariga ˆnaagayuka kisi omurume waaye, okukingira okumubhirikiraga ati, omwami waaye. Nyabhuriko, emwe wone, araabha omukora ja ekisi rwa omwene, okuubhaya echiinu choonechoone wuri, mbe woori, muri abhayaasya bhaaye.7 Nyabhuriko, emwe abharume, mwikare na abhagasi bheemwe muri na obhwenge, mumenyere ati bhatari na amanaga rwa emwe. Mubhaangarire, nimubhaayanaga echibharo, kwa okubha Nyamuwanga ꞉aaragire ati emwe na abheene muryanjura obhwitiriranya bhwa obhuwanga. Kurwa ejo, emwe abharume, mukore kutyo, korereki risabhwa ryemwe risige okuyingirirwa.
Mukore ja ekisi ku‑managa goone
8 Ku‑bhuteero, enibhabhwira emwe bhoone ati, mubhe na obhwira bhumwi, mufwirane echigongo, mwendane rwa abha inda imwi, mubhe abhafura na mubhe abheekeeya. 9 Mwasiga okuriya omuunu echibhiibhi ku‑chibhiibhi, amwi efumo kwa efumo, nawe musabhirane amabhando. Okubha mubhirikiiywe okukora ejo, korereki muyaanwe amabhando. 10 Rwa kutyo jikaamirwe mu‑Bhikaame Ebhyeru ati,
“Omuunu akeenda okubha na obhuwanga na rikonderwa,
asige okuroma abheejaabho noorwo okubhabheeyeresya.
11 Asige okukora ebhibhiibhi, akore ja ekisi.
Ka wone eekomeesye okubha na omurembe aamwi na abheejaabho,
12 kwa okubha ameeso ga Raatabhugenyi agaringiraga abharengeresi,
na amatwi gaaye agategeresyaga risabhwa ryebhwe.
Nawe, bhanu abhakora ebhibhiibhi, kaabhafutatira.”a
13 Niga unu aribhakorera emibhiibhi, araabha omwikomeesya okukora ja ekisi? 14 Nyamuwanga aribhayaana amabhando araabha omunyaaka kwa okubha omukora ja obhurengeresi. Kurwa ejo, musige okuyaya noorwo musige okuubhaya bhanu abhabhanyaasya, tari mukusye Raatabhugenyi Yeesu Kirisito mu‑myoyo jeemwe. 15 Ka wone, siku joone, mubhe mwimaririiye okusubhya omuunu woonewoone unu aribhabhuusya chinu omwiyikanya. Nawe mukore kutyo, mu‑bhworooro na echibharo. 16 Mubhega na emitima emyeru, korereki bhanu abhabhakuurisya amabhiibhi bhaakarora akatungiiywe keemwe ka ekisi ku‑Kirisito, bheesware. 17 Ni akiri okunyaaka inguru ya okukora ja ekisi, araabha nikwo okwenda kwa Nyamuwanga, okukira okunyaaka inguru ya okukora emibhiibhi.
18 Kirisito omwene ꞉aanyaakire rumwi era inguru ya ebhibhiibhi bhya abhaanu bhanu bhatari bha rirenga, korereki achigwatanye na Nyamuwanga. Nawe omwene aariga ari murengeresi. ꞉Eetirwe echinyamubhiri, nawe ˆnaakorwa omuwanga ku‑bhuturo bhwa Mwoyo Mweru.b 19 ˆNaagenda anu emyoyo ja abhafuuwe jibhoyerwe, ˆnaabharaasisya omusango gwa Nyamuwanga. 20 Emyoyo ejo, ni ja abhaanu bhanu ꞉bhataagayukire Nyamuwanga kara awo, omwanya gunu Nuuwu aariga achaakonja ingarabha. Nyamuwanga ꞉eegumiirisiisye ebhibhiibhi bhyebhwe okukingira omwanya gunu ingarabha ꞉yaamarirwe okukonjwa. Mu‑ngarabha omwo, nimwo ꞉bheengiiye abhaanu bhatooto era, abhaanu bhataanu na bhasatu, bhanu ꞉bhaawonere okusingaarika mu‑manji. 21 Amanji ago, ni chijekekanyo cha obhubhatiijo bhwemwe, kwa okubha omwanya gunu omubhatiijibhwa, eyeeresya ati Nyamuwanga kaabhachungura ku‑njira ya obhusuuruko bhwa Yeesu Kirisito. Obhubhatiijo obhwo, bhutari bhwa okusoosya‑ko riiko ku‑mibhiri jeemwe, tari ni kubha na omutima omweru ku‑Nyamuwanga. 22 Omwene ꞉aagendere mu‑rwire na woori eenyanjire orubhaara rwa ebhuryo rwa Nyamuwanga. Kaatunga bhamaraayika, ebhibhumbwa bhyone ebhya obhuturo na ebhya amanaga.