2
1 Mbe, musige obhujabhi bhwone, obhujigi bhwone, obhwirimaanya, orwiso noorwo okuroma oweejaanyu. 2-3 Woori mwamarire okurabha na okumenya ati Raatabhugenyi Yeesu ni wa ekisi.a Mbe mubhe rwa abhaana abharera kutyo abhakena amata, emwe wone mubhe na obhwiro bhwa amata ga ekisi ga echinyamwoyo, korereki ku‑managa gaago murumatane mu‑bhuchungusi bhwemwe.Okubha abhaanu abheeru bha Nyamuwanga
4 Mbe, mufogere ku‑Yeesu, omwene ari rwa ribhuyi riwanga rya okuumbakira. Ribhuyi eryo, abhaanu ꞉bhaariremere, nawe niryo Nyamuwanga ꞉aasorere, ka wone riri na obhurambu obhunene mu‑meeso gaaye. 5 Mumenye ati, emwe wone muri rwa amabhuyi amawanga, Nyamuwanga kaabhoombaka mubhe inju ya echinyamwoyo. Ka wone abhawuuwe na okubhakora mubhe abhagabhisi bhanu abhasoosya ebhyogo bhya echinyamwoyo bhinu ebhimukondisya ku‑njira ya Yeesu Kirisito. 6 Okubha mu‑Bhikaame Ebhyeru jikaamirwe ati,
“Murore, enituura ribhuyi rinene rya orufuka mu‑musi gwa Sayuuni,b
ka wone niryo ribhuyi rya obhurambu obhunene rinu ꞉naasorere.
Omuunu woonewoone unu ariikirisya unu ari ribhuyi eryo
atariiswasibhwa noorwo na akatyari!”c
7 Kw‑imwe bhanu omwikirisya ribhuyi eryo, ni rya obhurambu bhunene. Nawe, ku‑bhanu bhatakwikirisya,
“Ribhuyi rinu abhoombaki ꞉bhaaremere,
niryo ryabha ribhuyi rinene rya orufuka.”d
8 Ka wone,
“Ribhuyi eryo ni rya okwikuujura‑ko,
ni rutare rwa okugwisya abhaanu.”e
Abhaanu abheekuujura‑ko, kwa okubha bhatakugayuka omusango gwa Nyamuwanga. Ka wone nikwo kutyo bhaariga bhakarariiywe okusookerera kara.
9 Nawe emwe muri rwibhuro orusorwa, muri bhugabhisi bhwa echikama, echise cha abheeru, abhaanu bhanu mwawuuywe na Nyamuwanga, korereki muraasye ebhikorwa bhyaye ebhikuru. Omwene ꞉aabhabhirikiiye okusooka mu‑chisuute, mwingire mu‑bhweru bhwaye bhwa okuruguusya.f 10 Kara eyo, emwe mwariga mutari bhaanu bha Nyamuwanga, nawe woori emwe muri bhaanu bhaaye. Ka wone, Nyamuwanga aariga atabhafwiriiye echigongo, nawe woori, abhafwiriiye.g
Okurama mu‑chaaro muri rwa abhaanu bha Nyamuwanga
11 Abheendwa, emwe muri rwa abhagenyi na abhayitingʼani ku‑chaaro kunu. Kurwa ejo, enibheerembeeresya ati, mwikenge obhurigire bhwa emibhiri jeemwe bhunu obhuyaajana na emitima jeemwe. 12 Mubhe na jitungwa ja ekisi agatigati ya abhaanu bhanu bhatakwikirisya Nyamuwanga, korereki araabha abhabhakuurisya ati, muri bhajabhi, bhaakarora ebhikorwa bhyemwe bhya ekisi, bhakusye Nyamuwanga ku‑songa yeemwe, orusuku rwa okusubha kwaye.
13 Mugayukega abhatungi bha abhaanu inguru ya Raatabhugenyi Yeesu. Mugayukega omukama, kwa okubha omwene niwe omutangasya weemwe omukuru ku‑chaaro. 14 Ka wone, mugayuke abhatungi bha emikoowa, abho nibho omukama oyo ꞉aawuuwe. ꞉Aabhawuuwe, korereki bhabhe nibhayaana ebhitiibha abhaanu bhanu abhakora ebhikayo na okukuuya bhanu abhakora ebhikorwa bhya ekisi. 15 Nyamuwanga keenda ati, mukore ebhikorwa bhya ekisi, korereki mujibhisye abhaanu abhamuumu bhanu bhatakumenya emisango jaaye.
16 Mwikare rwa abhaanu bhanu bhari na obhwitaage, nawe mu‑bhwitaage obhwo, mwasiga okukora ebhibhiibhi. Mwikare rwa kutyo Nyamuwanga kaakena abhakosi bhaaye bheekare. 17 Muyaane echibharo abhaanu bhoone na mwende abheekirisya abheejaanyu. Mugayuke Nyamuwanga na muyaane echibharo omukama weemwe.
Amaragiriro ku‑bhagaya
18 Emwe abhagaya, mugayuke abhaami bheemwe muno, ka wone mubhayaane echibharo, bhabhe bhari bhoorooro amwi bharuru. 19 Ni musango gwa kisi muno ku‑Nyamuwanga, mukeegumiirisya ebhinyaasyo bhinu bhitari bhya rirenga, bhinu omubhona inguru ya okumuyaana echibharo, omwene aribhayaana amabhando. 20 Ni chibharo ki chinu omubhona araabha mukeegumiirisya okuyaanwa ebhitiibha inguru ya ebhibhiibhi bhinu omukora? Nawe mukeegumiirisya ebhinyaasyo bhinu omubhona inguru ya okukora ja ekisi, ni musango gwa kisi muno ku‑Nyamuwanga.
21 Omukenwa mwigumiirisye kutyo, kwa okubha noorwo Kirisito omwene ꞉aanyaasiibhwe inguru yeemwe. Ejire aakora kutyo, ꞉aabhasigiiye echijekekanyo, korereki muruubhe orugere rwaye. 22 Omwene ꞉ataakorere echibhiibhi choonechoone, noorwo ꞉ataayikire orubheeyi rwonerwone.h 23 Omwene ejire aafumwa, ꞉ataasubhiisye efumo. Ejire aanyaasibhwa, ꞉ataakangiisye okusubhya orusiima. Tari ꞉aasigire joone ku‑Nyamuwanga, omuramusi omurengeresi. 24 Yeesu omwene ꞉aagegere ebhibhiibhi bhyeswe ku‑mubhiri gwaye, ˆnaabhambwa ku‑musarabha. ꞉Aakorere kutyo, korereki chisige okutungwa rindi na ebhibhiibhi, tari chiikare nichikondisya Nyamuwanga. Mu‑kuwutaasibhwa kwa Yeesu, emwe ꞉mwawosiibhwe.i 25 Okubha mwariga muri rwa jinaama jinu jibhurire, nawe woori, mwasubhire ku‑Mureefi na ku‑Mwangarisi wa emyoyo jeemwe.