Inyarubha ya okwamba ya
Peetero
Obhukeesya
1
1 Inyarubha inu niikaamire anye Peetero, itumwa ya Yeesu Kirisito.Enikaamira emwe abhaanu bhanu musorerwe na Nyamuwanga, bhanu munyarageene rwa abhagenyi mu‑mikoowa ja Pooto, Garaatiya, Kapadookiya, Asiya na Bhitiniya. 2 Kara awo, Raata Nyamuwanga ꞉aatangatire okubhamenya, ˆnaabhasora, Mwoyo waaye ˆnaabhakora mubhe bheeru, korereki mugayuke Yeesu Kirisito na okwesibhwa mu‑sagama yaaye.a
Obhwitiriranya na omurembe okusooka ku‑Nyamuwanga bhyongesibhwe kw‑imwe.
Obhwiyikanyo bhwa obhuwanga
3 Akusibhwe Nyamuwanga, Esemwene Raatabhugenyi weeswe Yeesu Kirisito. Ku‑chigongo chaaye echaafu, ꞉aachiibhuuye rwa kabhiri ku‑njira ya okusuurura Yeesu Kirisito okusooka mu‑bhafuuwe. Kurwa ejo, chibhwene obhwiyikanyo obhwa obhuwanga. 4 Woori echirindirira okwanjura amabhando ganu Nyamuwanga abhiikiiye abhaana bhaaye mu‑rwire. Amabhando ago, gatakutura okubhora, okunyamuka, noorwo okuwotoka. 5 Emwe, Nyamuwanga kaabhaangarira ku‑managa gaaye, kwa okubha mwikirisiisye Yeesu Kirisito. Obhwangarisi obhwo, obhugenderera okukingira anu obhuchungusi bhuribhonekana ku‑mwanya gwa obhuteero.
6 Mbe mukondererwe muno emisango ejo, noorwo kutyo ku‑mwanya mufuyi gunu, omutura okusurumbara inguru ya amaregeejo maafu ga bhuri mbaga. 7 Amaregeejo ago, agaregeeja eriikirisya ryemwe, korereki ribhonekane ati ni rya echimari. Noorwo inaaryo, inu eyitura okusingaarika, eyochiibhwa mu‑muriro korereki wone iregeejibhwe. Nyabhuriko, eriikirisya ryemwe rinu riri na obhurambu obhunene okukira inaaryo, ni bhusibhusi wone riregeejibhwe, ribhonekane ati ni rya echimari. Awo niwo, Yeesu Kirisito aribhakuuya, aribhayaana rikusyo na echibharo, orusuku runu ariswerurwa. 8 Emwe muchaariga okumurora, nawe mumwendere. Ka wone, noorwo kutyo mutakumurora woori, nawe omumwikirisya. Kurwa ejo, omukonderwa rikonderwa rinu ritakwayikwa na rinu riijuuye rikusyo, 9 kwa okubha omuramira obhuchungusi bhwemwe. Obhuchungusi obhwo, nibhwo obhwira bhwa eriikirisya ryemwe.
10 Abharagi bha kara ꞉bhaayenjeresiisye muno okusombookerwa obhuchungusi obhwo, nibhasoosya obhuragi inguru ya obhwitiriranya bhwa Nyamuwanga bhunu bhwakingire kw‑imwe. 11 Mwoyo wa Kirisito unu aariga ari mu‑myoyo jeebhwe, ꞉aasoosiisye obhuragi ati Kirisito arinyaaka na akasooka mu‑nyaako ejo, aribhona rikusyo. Abharagi abho, ꞉bhaayenjeresiisye muno okumenya ati, emisango ejo, jirikorekana rusuku ri na jirimubhona kutiki. 12 Nyamuwanga ꞉aasweruriiye abharagi abho ati, emisango jinu ꞉bhaaragire, jaariga jitari jeebhwe abheene, tari jaariga jiri jeemwe. Emisango jinu ꞉bhaayikire, nijo ꞉mwaraasisiibhwe na abhaanu bhanu ꞉bhaabhareteeye Emisango ja Ekisi inguru ya Yeesu Kirisito. Abheene ꞉bhaabhabhwiriiye emisango ejo, ku‑bhuturo bhwa Mwoyo Mweru unu ꞉aatumirwe okusooka mu‑rwire. Emisango ejo, noorwo bhamaraayikab wone abheegomba muno okujisombookerwa.
Okwikara rwa abhaana bha Nyamuwanga
13 Kurwa ejo, mubhe mutengeejere na mwiyangariiye ku‑jinu omuja okukora na mubhe mwiyingiriiye. Mutuure obhwiyikanyo bhwemwe bhwone mu‑bhwitiriranya bhunu muriramira, orusuku runu Yeesu Kirisito ariswerurwa. 14 Emwe muri bhaana bha Nyamuwanga. Mbe woori, mumugayuke, musige okuruubha rindi okurigira kunu mwariga muri nakwo muchaari okumenya Emisago ja Ekisi inguru ya Yeesu Kirisito. 15 Nyamuwanga unu ꞉aabhabhirikiiye ni mweru. Woori emwe wone omukenwa mubhe abheeru mu‑katungiiywe keemwe, 16 okubha omwene ꞉aayikire mu‑Bhikaame Ebhyeru ati, “Mubhe abheeru, kwa okubha anye niri mweru.”c
17 Omwanya gunu omusabhwa, omubhirikira Nyamuwanga ati Raata. Omwene atari na isoroore ku‑muunu woonewoone. Ariramura abhaanu bhoone okuruubhana na ebhikorwa bhinu bhakorere. Kurwa ejo, mwikare nimuramya Nyamuwanga omwanya gunu gusigaaye emwe okwikara ku‑chaaro kunu. 18 Emwe omusombookerwa ati ꞉mweruuywe okusooka mu‑tungwa jeemwe jimbiibhi jinu ꞉mwanjuuwe okusooka ku‑bhasaaja waanyu. ꞉Muteeruuywe okuruubhana na ebhiinu bhinu ebhitura okusingaarika, rwa jipirya amwi inaaryo. 19 Tari, ꞉mweruuywe kwa isagama ya obhurambu obhunene ya Kirisito. Omwene aariga ari rwa omwana wa inaamad unu atari‑ko esoro noorwo ekoomo. 20 Echaaro noorwo chichaari okubhumbwa, Nyamuwanga omwene aariga aamarire okumwawura ku‑bhukarariiye obhwo. Nawe ˆnaarindirira okukingira jisiku ja obhuteero jinu, ˆnaamubhuurisya abhwerubhweru ku‑bhaanu bhoone. Ejo joone, ꞉jaakorekeene ku‑songa yeemwe. 21 Okutura ku‑Yeesu Kirisito, woori emwe omwikirisya Nyamuwanga, unu ꞉aamusuuruuye okusooka mu‑bhafuuwe na okumuyaana rikusyo. Ogwo nigwo ogukora eriikirisya na obhwiyikanyo bhwemwe bhubhe ku‑Nyamuwanga.
22 Mbe, kwa okubha omuruubha ameeyigisyo ga echimari inguru ya Yeesu, emyoyo jeemwe jeesiibhwe. Woori mukomeerega okwenda abheejaanyu mu‑mwoyo gwa echimari, 23 kwa okubha mwibhuuywe rwa kabhiri. Okwibhurwa okwo, kutakusooka ku‑bheesomwana, abheene abhafwa, tari mwibhuuywe kwa omusango omuwanga gwa Nyamuwanga, ogwene ogugenderere okubha gwa echimari akajaanende koone. 24 Jikaamirwe mu‑Bhikaame Ebhyeru ati,
“Abhaanu bhoone bhari rwa amanyaasi,
na rikusyo ryebhwe riri rwa obhwaso bhwa amanyaasi.
Amanyaasi agawotoka, na obhwaso obhuwunguruka,
25 nawe omusango gwa Raatabhugenyi gurigenderera okubha gwa echimari akajaanende koone.”e
Omusango ogwo, ni Emisango ja Ekisi jinu ꞉mwaraasisiibhwe.