1 Yowana 2

Yeesu Kirisito niwe kaachisabhirwa

1 Emwe abhaana bhaani mu‑riikirisya, nibhakaamiiye emisango ejo, korereki musige okukora ebhibhiibhi. Nawe araabha omuunu woonewoone aakakora ebhibhiibhi, chiri na omubhagisi ku‑Raata Nyamuwanga. Omubhagisi oyo niwe Yeesu Kirisito, omurengeresi. 2 Yeesu niwe echoogo cha okusoosya‑wo ebhibhiibhi bhyeswe na okuchigwatanya na Nyamuwanga. Ka wone ꞉ataasoosisye‑wo ebhibhiibhi bhyeswe era, tari na ebhibhiibhi bhya abhaanu bhoone bha ku‑chaaro choone.

3 Araabha chikagayuka ebhiraagiro bhyaye, niwo echimenya ati echimusombookerwa. 4 Omuunu woonewoone unu kaayika ati kaamusombookerwa, nawe atakugayuka ebhiraagiro bhyaye, ni mubheeyi, atakumenya echimari. 5 Tari omuunu unu kaagayuka ebhiraagiro bhyaye, chimari eryenda rya Nyamuwanga erikuumira mu‑mwoyo gwaye. Kutyo nikwo echimenya ati chiri na obhumwi na Nyamuwanga. 6 Omuunu unu kaayika ati ari na obhumwi na Nyamuwanga, kaakenwa akore rwa kutyo Yeesu aariga ˆnaakora.

Echiraagiro cha Yeesu inguru ya eryenda

7 Abheendwa bhaani mu‑riikirisya, echiraagiro chinu enibhakaamira chitari chiyaaya, tari ni chiryachirya cha kara chinu mwariga muri nacho okusookerera omwanya gunu ꞉mwaambire okwikirisya Yeesu Kirisito. Echiraagiro echo, ni musango gurya ꞉mwoonguuwe inguru ya eryenda. 8 Nooro kutyo, echiraagiro chinu enibhakaamira ni chiyaaya. Echimari cha echiraagiro echo, ꞉chaabhonekeene mu‑tungwa ja Yeesu Kirisito na mu‑tungwa jeemwe, kwa okubha, echisuute echisooka‑mo na obhweru bhwa echimari bhwangʼarabhiisye.

9 Omuunu woonewoone unu kaayika ati ekaaye mu‑bhweru, keenu kaasoka oweejaabho, achekaaye mu‑chisuute. 10 Tari muunu woonewoone unu keenda oweejaabho, ekaaye mu‑bhweru. Chitari‑mo echiikuujuro choonechoone mu‑mwoyo gwaye, cha okukora akore ebhibhiibhi. 11 Nawe omuunu unu kaasoka oweejaabho, ari mu‑chisuute. Kaaribhata mu‑chisuute, atakumenya anu kaaja, kwa okubha, ebhibhiibhi bhimukorere okubha rwa omuwofu.

12 Enibhakaamira emwe abhaana bhaani mu‑riikirisya,

kwa okubha Nyamuwanga aabhafwiriiye echigongo ebhibhiibhi bhyemwe, kwa risiina rya Yeesu Kirisito.

13 Enibhakaamira emwe abhakaruka mu‑riikirisya,

kwa okubha omusombookerwa Yeesu Kirisito,

unu aariga ari‑wo chichaari kubha‑wo echiinu choonechoone.

Enibhakaamira emwe abhasigaji mu‑riikirisya,

kwa okubha muyigire Omubhiibhi urya.

Enibhakaamira emwe abharera mu‑riikirisya,

kwa okubha omusombookerwa Raata Nyamuwanga.

14 Enibhakaamira emwe abhakaruka mu‑riikirisya,

kwa okubha omusombookerwa Yeesu Kirisito,

unu aariga ari‑wo chichaari okubha‑wo echiinu choonechoone.

Enibhakaamira emwe abhasigaji mu‑riikirisya,

kwa okubha eriikirisya ryemwe ku‑Yeesu Kirisito riri na amanaga muno

na omusango gwa Nyamuwanga bhuri rusiku guri mu‑myoyo jeemwe,

ka wone muyigire Omubhiibhi urya.

15 Kurwa ejo, musige okwenda ebhibhiibhi nooro jitungwa jimbiibhi joonejoone ja ku‑chaaro. Araabha omuunu woonewoone aakeenda ebhibhiibhi, atakwenda Raata Nyamuwanga. 16 Okubha ebhibhiibhi, nijo jitungwa jinu, okurigira okubhiibhi kwa omubhiri, okurigira okubhiibhi kwa ameeso na okwikuuya kunu okusookana na ribhona rinene. Jitungwa jinu jitakusooka ku‑Raata Nyamuwanga, tari ejisooka mu‑chaaro munu. 17 Echaaro aamwi na okurigira kwacho okubhiibhi, bhiri na obhuteero. Nawe woonewoone unu kaakora jinu ejikoondera Nyamuwanga, kaabha na obhuwanga bhwa akajaanende.

Mwikenge na abhasoko bha Kirisito

18 Abhaana abheendwa mu‑riikirisya, jisiku ja obhuteero jaakinga! Mwonguuwe ati omusoko wa Kirisito kaaja, nooro woori abhasoko abhaafu bha Kirisito bheejire. Kutyo nikwo echimenya ati chiri mu‑siku ja obhuteero. 19 Abhaanu abho, bhaariga bhachiri‑ko, nawe mbachisoka‑ko, kwa okubha bhaariga bhatari na obhumwi bhwa echimari na eswe. Okubha, araabha bhakabheeye na obhumwi obhwo na eswe, bhaakasigaaye kw‑iswe. Nawe ꞉bhaachisookere‑ko, korereki bhaswerurwe abhweru ati bhaariga bhatari na obhumwi bhwa echimari na eswe.

20 Nawe emwe, Yeesu Omweru abhayaanire Mwoyo waaye, kurwa ejo, woori bhoone omumenya echimari. 21 Isonga ya okubhakaamira inyarubha inu, itari ati, mutakumenya echimari, tari kwa okubha muchimenyere. Ka wone ameeyigisyo goonegoone ga orubheeyi gatakusooka mu‑chimari. 22 Angu, omuunu omubheeyi niga? Omuunu omubheeyi ni woonewoone unu kaayika ati Yeesu atari Omusorwa wa Nyamuwanga. Omuunu woonewoone unu kaarema Raata Nyamuwanga na Yeesu Omwana waaye, oyo niwe omusoko wa Kirisito. 23 Omuunu woonewoone unu kaarema Omwana wa Nyamuwanga, atari na obhumwi na Raata Nyamuwanga. Nawe, unu keekirisya Omwana, imbere ya abhaanu, kaabha na obhumwi na Raata Nyamuwanga wone.

24 Kurwa ejo, mu‑myoyo jeemwe, mugenderere okuruubha emeeyigisyo garya ꞉mweeyigisiibhwe okusookerera omwanya gunu ꞉mwaambire okwikirisya Yeesu Kirisito. Okubha, araabha mukagenderera okuruubha ameeyigisyo ago, niwo omugenderera okubha na obhumwi na Omwana, aamwi na Raata Nyamuwanga. 25 Kutyo echiramira obhuwanga bhwa akajaanende koone bhunu ꞉aachiragire.

26 Nibhakaamiiye emisango ejo, korereki okubhakengya inguru ya abhaanu bhanu abharegeeja okubhayabhya. 27 Nawe emwe, Kirisito abhayaaye Mwoyo Mweru unu ari mu‑myoyo jeemwe. Mutakukena omuunu owundi wa okubheeyigisya emisango ja echimari. Okubha Mwoyo Mweru kaabheeyigisya bhuri chiinu chinu omukena okumenya. Ameeyigisyo gaaye ni ga echimari, gatari ga orubheeyi. Kurwa ejo, mugenderere okubha na obhumwi na Kirisito.

28 Woori, abhaana bhaani mu‑riikirisya, mugenderere okubha na obhumwi na Kirisito, korereki omwanya gunu arisubha rindi, chisige okuubhaya na okwiswara, tari chibhe na ribhaasi.

29 Mumenyere ati Kirisito ni murengeresi. Kurwa ejo, mumenye ati, omuunu woonewoone unu kaakora eja rirenga, omwene ni mwana wa Nyamuwanga.